ང་ཡི་སྨྱུག་མིང་ཁ་བའི་ལྷ་མོ་ཟེར།།
ཕ་ཡུལ་སི་ཁྲོན་དཀར་མཛེས་རྫོང་ནས་ཡིན།།
སློབ་འབྲིང་འགྲིམ་པའི་སྐལ་བ་ལྡན་ན་ཡང༌།།
རྗེས་སུ་སློབ་བཤོལ་མི་བྱེད་ཀ་མེད་བྱུང༌།།

ཉེ་བའི་ལོ་ཤས་རིང་ལ་གང་སར་འཁྱམས།།
སྐྱིད་སྡུག་རེས་མོས་སོས་ཀའི་གནམ་ངོ་འདྲ།།
ང་འདྲའི་ཉམ་ཐག་བོད་མོའི་ལས་དབང་ལ།།
དོན་གྱི་སྙིང་རྗེ་སྐྱེ་མཁན་སུ་ཞིག་ཡོད།།

ཆུང་དུས་བོད་ཡིག་སྦྱོང་འདོད་རབ་ཆེ་ཡང༌།།
རྩ་ཆེའི་དུས་ཚོད་བར་ཆད་བདུད་ཀྱིས་ཁྱེར།།
རང་ལུས་མཛེས་པ་རང་གི་དགྲ་རུ་གྱུར།།
ཕོ་གཞོན་མང་པོའི་རྩེད་ཆས་ཙམ་དུ་སོང༌།།

ད་ནི་མོ་ལོ་སུམ་ཅུ་བརྒལ་ལ་ཉེ།།
གཞོན་པའི་ལང་ཚོ་ཉིན་བཞིན་མཐའ་ནས་བསྡུ།།
སེམས་པའི་ཁོང་དུ་དཀའ་ཁག་རི་ལྟར་བརྩེགས།།
སེམས་ཀྱི་སྙིང་གཏམ་ཙམ་ཞིག་ཤོད་ས་མེད།།

ཚེ་གཅིག་མི་གཡོག་བྱེད་པའི་ལས་བསྐོས་འདི།།
ང་ཚོ་བོད་མོ་ཕལ་གྱི་ལས་དབང་འདྲ།།
སྦྱིན་བདག་ངོ་སྲུང་མི་ཤེས་བཀའ་བཀྱོན་རག།
སྐྱོ་བའི་མིག་ཟུར་ཕ་ཡུལ་ཕྱོགས་སུ་འཁོར།།

ཚེ་འདིར་མ་ལོའི་བཀའ་ལས་འགལ་བའི་ཕྱིར།།
ཨ་མར་འཕྲད་པའི་སྤོབས་པ་ཉིན་བཞིན་ཡལ།།
ནངས་ནུབ་གུས་པའི་ལྷ་ཕྱག་རིང་མོའི་བརྒྱུད།།
ཨ་མར་སྨྱུང་གཞི་མེད་པའི་སྨོན་ལམ་འདེབས།།

བུ་མོ་སྡོད་སའི་གསོལ་མགྲོན་ཁང་ཆེན་འདིར།།
རང་རིགས་སྤུན་ཟླ་སུ་དང་སུ་བྱུང་ཡང༌།།
མི་འགྱུར་ཨ་ཤེ་དཀར་པོའི་ཁ་བཏགས་བརྒྱུད།།
བུ་མོ་ང་ཡིས་སྙིང་ནས་གུས་འདུད་ཞུ།།

སྤོས་ངད་ལྡན་པའི་གྲོང་དུ་བཞུགས་པ་ཡི།།
བོད་ཡིག་བསྐྱར་དུ་སློབ་པའི་བཤེས་གཉེན་ཁོང༌།།
བུ་མོ་ང་ལ་བཀའ་དྲིན་ཆེ་བའི་ཕྱིར།།
ཚེ་འདིའི་ཕ་མ་གཉིས་དང་ཁྱད་པར་མེད།།

རང་གི་རིགས་ལ་ཤ་ཞེན་ཆེ་བ་ཡི།།
གཤིས་ཀ་འདི་ཡང་ཁོང་གི་ས་ནས་བྱུང༌།།
ད་ནི་ཚེ་མཇུག་སྲོག་གི་ཐག་པ་འདི།།
མི་རིགས་འདི་ཡི་དོན་དུ་འབུལ་ཡང་སྤོབས།།

རྩོམ་འདི་མིང་སྲིང་སུ་ཡིས་གཟིགས་གྱུར་ཀྱང༌།།
ཡིད་འགུལ་ཐེབས་པའི་སྨན་དུ་རབ་གྱུར་ཏེ།།
ལོག་པའི་ལམ་གྱི་གཡང་ས་ལས་ལྡོག་སྟེ།།
དོན་ལྡན་མི་ཚེའི་ལམ་ཆེན་རྙེད་གྱུར་ཅིག།

རྩོམ་ཁུངས། ངེད་དྲ་བ།