མེ་ལྕེའི་རུས་པ    ཡང་ན་མེ་ལྕེའི་རལ་བ་ལྗང་ཁུ
སྲོག་རྩ་རུ་ཟུག་པའི་དྲོད་ཀྱི་ཁྲག
རིག་པའི་འོད་དང་གློག་གི་འཁྱུག་གར     འཇའ་ཡི་ལག་པ
སྤྲིན་པ་སྔོ་ནག་འོག་གི་རླུང་བུ་འཁྱམས་པོ
མཚམས་མཚམས་སུ་ཁྱོད་ལ་ཉེ་ཞིང
ཡང་སྐབས་ལན་རེར་ང་ལ་ཉེ་བའི་འཇིག་རྟེན་གྱི་སྣང་བ

ཡིག་འབྲུ་ཐང་མར་བརྡལ
རྡོ་གཡའ་མ་དང་ཁ་དོག་མང་བའི་ཤོག་བུའི་སྟེང་དུ
ངག་གི་འགྱུར་ཁུག་ཡང་ཡང་བརྡར་བའི
ཚིག་གི་ཚོགས་པ   ཆུ་དང་ཆར་བའི་ཚོགས་པ
མིང་མེད་སྐར་ཕྲན་གྱི་ཚོགས་པ
སྐྱེ་བོ་སུ་ཞིག་གི་ཤེས་རབ་ཀྱི་གྲི་ཁ་ལས་མངོན་དུས
མྱོང་བས་ངོམས་པ་མེད

ཐང་ལ་ལྷུང་བའི་ལོ་རྒྱུས་ཀྱི་ལྡེ་མིག
གོས་ཀྱི་རི་མོ   སེམས་ཀྱི་རི་མོ
རོལ་དབྱངས་ཀྱི་ཁུག་ཏུ་བསྙལ་བའི་ཨ་རག
ཡུལ་ཡར་ཀླུང་ཁོག་གི་ང་རོ་རིང་མོ

མཚན་མོའི་ཤ་དང་རུས་པ
ཟླ་འོད་ཀྱི་སྐྱོ་བའི་འོ་ཟི
མཐིང་སྨུག་སྦྲ་ལས་འཁྲུངས་པའི་ཨག་སྐད
ལང་ཚོའི་སྟག་དང་གཟིག
སྨྱོ་ཧམ་རྒོད་པོའི་བྲག་གཡང་གི་སྟངས་སྟབས

གཤོག་པ་དཀར་པོ་ཆ་གཅིག་ལ་བྲིས་པའི་བརྩེ་འཕྲིན
ཁྲུང་ཁྲུང་བཅུ་གསུམ་གྱི་གཤོག་རྡང་གི་མཛེས་སྡུག
ཞེ་སྡང་གི་ལྗོན་རྩེ་ནས་འཐོར་བའི་ལོ་མ
བརྩེ་དུང་གི་ཆུ་མོར་འཁྱུག་པའི་གསེར་ཉྭ
ཡིད་ལ་འཛིན་རྒྱུ་ཞིག་ཡོད་ཡོད་འདྲ་བའི་འཁྲུལ་སྣང་གི་གཟུགས་རིས
མེད་པར་སྙམ་ཡང་མིག་གིས་ཟིན་ཉམས་སྟོན་པའི་སྒྲ་དབྱངས
མི་ཡི་སྙན་ཚིག    ལྷ་ཡི་སྙན་ཚིག

                           ༢༠༠༩．༢．༡༡ཁྱིམ་དུ།

རྩོམ་ཁུངས། ངེད་དྲ་བ།