རང་རིགས་འདུ་འཛོམས་ཀྱི་དོ་ར།།

བོད་ཡིག་ཟིན་བྲིས་ཀྱི་གསེང་ནས།།

སྐལ་བཟང་སྒྲོལ་མ་ཡི་བཞོ་དབྱངས།།

ཁྲ་ཆུང་མིག་མདུན་དུ་མངོན་བྱུང་།།

རྗོད་བྱེད་ཚིག་འགྲོས་ནི་ལེགས་ཤིང་།།

བརྗོད་བྱའི་དོན་སྙིང་ཡང་གཏིང་ཟབ།།

རྣམ་དཔྱོད་ལང་ཚོ་མཆོག་རྒྱས་པས།།

སྨན་ཤར་བུ་མོ་ཚོའི་རྒྱན་རེད།།

ཤེས་ཡོན་གཞི་རྩ་དེ་བརྟན་པས།།

ཡི་གེའི་དག་སྡེབ་སོགས་འགྲིག་ཅིང་།།

སྐབས་འབྲེལ་དོན་གནད་རང་འབྱིན་པའི།།

རྩོམ་འབྲིའི་ཁྱད་ཆོས་ནི་འབྱོར་འདུག །

གོ་སྟོབས་ངར་མ་ནི་ཁྱེད་ལྡན།།

ལ་རྒྱའི་སྤོབས་སེམས་དེ་ཁྱེད་འདུག །

སྣ་ཚོགས་གཟིགས་རྒྱང་དེ་ཁྱེད་ལྡན།།

མི་རིགས་ཞེན་ཁོག་ཀྱང་ཁྱེད་མངའ།།

སྐལ་སྒྲོལ་ངོ་སྤྲོད་ཀྱི་འཕྲིན་ཆུང་།།

སྐལ་སྒྲོལ་བཞོ་དབྱངས་ནང་མཐོང་དུས།།

སྐལ་སྒྲོལ་རོབ་རྟོགས་དང་ལྷན་དུ།།

ཁྱེད་ལ་གདུང་སེམས་ཤིག་སྐྱེས་བྱུང་།།

མི་འདོད་རྐྱེན་དབང་ལ་བརྟེན་ནས།།

རྩ་ཆེའི་སློབ་སྐལ་ནི་ཆད་ཀྱང་།།

ཞུམ་མེད་སྙིང་སྟོབས་རང་བཟུང་ནས།།

རྩོམ་པའི་ལས་གཉེར་དེ་ངོ་མཚར།།

སྨན་ཤར་སྐལ་བཟང་གི་སྒྲོལ་མ།།

ཁ་བའི་ལས་དབང་དེ་བསམ་བཞིན།།

གསེར་ལྟའི་རྣམ་དཔྱོད་ཀྱི་རྩལ་སྤྲུགས།།

རྩོམ་པའི་ལས་བཟང་གི་རྒྱུན་སྐྱོངས།།

སྙན་འཇེབས་བཞོ་དབྱངས་ཀྱི་ཁོར་ཡུག །

རྒྱ་བསྐྱེད་ཀུན་ཁྱབ་ཅིག་དགོངས་ན།།

བོད་རིགས་སྤུན་ཟླ་རྣམས་འདུ་གནས།།

ཧི་གཟུགས་ཟིན་བྲིས་སུ་ཕེབས་གནང་།།

གངས་རིའི་རང་མདངས་དེ་སྟོན་ཆོག །

བདེན་འབྲེལ་ལོ་རྒྱུས་ནི་བརྗོད་ཆོག །

ཕན་ཚུན་རྒྱུས་ལོན་དེ་བྱེད་ཆོག །

ཤར་ནུབ་ལྟ་གྲུབ་ཀྱང་གླེང་ཆོག །

རྩོམ་ཁུངས། ངེད་དྲ་བ།