འབྲལ་དཀའ་བའི་གྲིབ་གཟུགས།
བདེ་ལ་སྲེད་པའི་འཇིག་རྟེན་གནས་མལ་ནས།།
གཉེན་དང་བཤེས་ཀྱི་མཛའ་བ་མཐའ་མེད་ཀྱང་།།
ཁྱོད་ཞལ་ཟླ་བའི་འཛུམ་ཀོང་མཐོང་བ་ལ།།
འདག་ཡིད་དུང་བས་གདུང་བ་རབ་ཏུ་ཉེན།།
རྙོག་བྲལ་ཡིད་ཀྱི་མེ་ལོང་དྭངས་མོ་རུ།།
ཟིམ་ཟིམ་དགོད་པའི་ལང་ཚོའི་འོད་སྣང་འཕོས།།
མ་བསྒྲིགས་མཐུན་པའི་ཞེ་འདང་ཟབ་མོ་དེ།།
བསམ་གཞིགས་བརྩེགས་མའི་ཀློང་ནས་བསྙེལ་བ་མེད།།
འཆི་བདག་གཤིན་རྗེའི་གཤེད་ཀྱི་ལྕགས་ཀྱུ་ཡི།།
རེག་བྱ་རྩུབ་མོའི་ནད་ཀྱིས་མ་ཐེབས་པར།།
ཁྱོད་ལ་དུང་བའི་ཞེ་འདང་ཟབ་མོ་དེར།།
ཁྲེལ་དང་རྒོད་ཀྱི་མཆི་ཞགས་གཏོང་མི་སྤོབས།།
རེ་བའི་མིག་ཟུང་ཕྱི་ལ་འཁྲེང་བ་ཡི།།
ལོ་ཟླའི་བརྩེགས་རིམ་བསྟར་བའི་ཁུགས་སོ་ན།།
ཁྱོད་དང་རྩེན་པའི་ལྷས་ར་གྲུ་བཞི་དེ།།
ཡང་ཡང་བསམ་པའི་མྱོང་གོམས་ཟད་དུ་མེད།།
༢༠༠༩.༤.༢༧ ལ་བྲིས།
རྩོམ་ཁུངས། ངེད་དྲ་བ།