—ཨ་མའི་ཞལ་རས་ཟླ་བ་ཡིན།  ཨ་མའི་འཛུམ་མདངས་ཉི་མ་འདྲ། 

ཁེར་རྐྱང་གི་མཚན་མོ་རེ་རེར།  ངས་རྨི་ལམ་སེར་པོ་ཞིག་རྨིས་མྱོང་།

འཇིག་རྟེན་འདིའི་མཛེས་སྡུག་གི་སྙིང་བོ་དང་འོད་སྣང་གི་ཡོད་ཚད།

ཚེ་སྲོག་གི་དབྱངས་རྟ་བཞིན་སྐྱོ་སྣང་གིས་བཞུར་ནས་འོངས་ཞིང་།

གདུང་སེམས་ཀྱི་མིག་ཆུ་ལྟར་ཞེན་ཆགས་ཀྱིས་འཁོར་ནས་འོངས།

མི་ལོ་སུམ་ཅུའི་སྔོན་གྱི་ན་ཟུག་གི་མཚན་མོ་དེ་ནང་བཞིན།

ཨ་མས་འཇིག་རྟེན་གཞན་ཞིག་གི་སྨག་རུམ་གྱི་གྲང་ངར་འོག་ནས།

ང་ལ་འོད་གསལ་གྱི་མིག་འབྲས་བསྩལ་བྱུང་།

ང་ལ་རང་ཉིད་ཀྱི་མདུན་ལྗོངས་མཐོང་བའི་ཁ་དོག་གནང་བྱུང་།

ཨ་མའི་ཞལ་རས་ཟླ་བ་ཡིན།  ཨ་མའི་འཛུམ་མདངས་ཉི་མ་འདྲ།

དུས་དེ་ནས།

ངས་ཨ་མའི་སྙིང་ཁ་ཡི་འོ་འཛིན་དང་མཆུ་སྒྲོས་ཀྱི་ཞལ་འདབ་ལ་འབྱར་ནས།

ཐོག་མའི་བྲོ་བ་མྱངས།  ཐོག་མའི་དུང་སོ་སྐྱེས།

ངས་ཨ་མའི་མི་ཚེ་ཡི་ལམ་ཐག་དང་གྲིབ་གཟུགས་ཀྱི་རིང་ཐུང་ལ་འཇུས་ནས།

ཐོག་མའི་གོམ་པ་སྤོས།  ཐོག་མའི་སྐད་ཆ་བཤད།

དུས་དེ་ནས།

ང་རང་རྨི་ལམ་ལྟ་བུའི་ཨ་མའི་གནའ་སྒྲུང་གི་རོལ་དབྱངས་ཁྲོད་འཇབ་ནས།

ལོ་ཟླ་དང་དུས་ཚོད་ཀྱི་བར་ཐག་ཐོག་མར་ཤེས།

ཉིན་མཚན་གྱི་དཀར་ནག་དང་དུས་ཚིགས་ཀྱི་སེམས་ངོ་དེ་དུས་ཚོར།

ཨ་མ་ལགས།

ཁྱོད་ཉིད་མེད་པའི་ངའི་བར་སྣང་ཧྲིལ་བོར།

འཁྱག་སོབ་སོབ་ཀྱི་ཁ་བ་ནག་པོ་རླུང་གིས་བསྐྱོད་ཅིང་།

གྲིབ་གཟུགས་ནག་པོ་ཅིག   སྨྲ་མི་ཤེས་པའི་ན་ཟུག་ཁྱུ་གཅིག་གིས་དེད་ནས།

ནམ་ཟླ་འདིའི་སྲུབས་ཀ་རུ་འཚང་ཁ་རྒྱག

ཨ་མ་ལགས།  རྩྭ་ཐང་དུ་ཉིན་ཞག་གང་མང་བརྗེས་པའི་མི་ལོ་སུམ་ཅུ་འདིར།

ཁྱོད་ཀྱི་བུ་དང་བུ་མོ་རེ་རེ།  ལས་དབང་གིས་ཞོགས་པའི་རྐྱང་ཁྱུ་བཞིན།

རང་རང་གི་ས་ན་དྲན་གདུང་གི་མཆི་མ་ངལ་དུབ་ཀྱིས་འབྱིད་།

ད་ལྟ་བསམ་ན། ཁྱོད་ནི་བཀླག་མི་ཚར་བའི་རྟོགས་བརྗོད་དེའི་འཁྲབ་ཚན་ནང་བཞིན།

སེམས་དང་མིག་ཆུ་ཤག་ཤག་བཞུར།  

ད་ལྟ་བསམ་ན། 

ཁྱོད་ནི་བདག་གི་ནམ་མཁའ་རུ་འཕེལ་འགྲིབ་མེད་པའི་ཉི་ཟླ་ལྟར།

ནམ་ཡིན་ཡང་།  ཁྱོད་ཀྱི་ཞལ་རས་ཟླ་བ་ཡིན། 

ཁྱོད་ཀྱི་འཛུམ་མདངས་ཉི་མ་འདྲ།

རྩོམ་ཁུངས། ངེད་དྲ་བ།