ནམ་མཁའ་གཡའ་དག་པ་མི་ཡག་གོ

ས་གཞི་རྡུལ་དག་པ་མི་མཛེས་སོ

རང་བྱུང་ཁམས་ཀྱི་ལྟོ་བར་ཚེར་མ་སྐྱེས་ཏེ

ང་ཡི་མིག་ནང་ལ་གཙག་པར་བྱེད

མཛའ་ཞིང་མཐུན་པའི་གྲོགས་པོ་དག་གང་དུ་སོང

ཕྱོགས་གང་སར་ཁུར་མོང་བཞིན་བདས་རྗེས

ཞག་སྒྲོན་དམར་པོའི་འོད་ངོགས་ནས་ཆང་དམར་འཐུང

ཆང་དམར་གྱིས་ང་ཡི་རྣམ་ཤེས་དཀྲུག་དཀྲུག་བཏང

ཕྱི་རུ་ལས་ལ་བྲེལ་བའི་མི་དག་གྲོག་མ་དང་འདྲ

མེ་འཁོར་འདྲ་བའི་འཕྲུལ་ཆས་ས་འབུ་དང་ཡང་འདྲ

ཕ་མ་གཉིས་ཀྱིས་དཔེ་ཆ་བསྡམ་ཐོ་ཞིག་བསྐུར་ཀྱང

དཔེ་ཆ་བརླན་གྱིས་བཟུང་སྟེ་ཡོངས་སུ་རལ

བུ་མོ་དེའི་ཁོག་གི་བུས་པར་འདང་རེ་བརྒྱབ་ན

མི་ཞིག་མི་ཁོམ་པའི་གནས་སུ་བཅར་ཡོང

མཚན་མོ་རྨི་ལམ་དུ་ཡང་སྦྲུལ་དང་སྦལ་བས་མཐའ་ནས་བསྐོར་ཡོང

མཛའ་གཞས་ཧ་ཅང་སྙན     ཨ་མའི་གཅེས་འབོད་ལྟར་དུ་སྙན

ཆང་ཕོར་བཀྱགས་ནས་རང་བྱུང་ཁམས་ལ་གྱེས་ཕྱག་ཕུལ

སྲ་མཁྲེགས་ཀྱི་དངོས་པོས་དབུ་ལོ་ཁྲག་ལ་བརྫིས

སྤྲིན་གྱི་གདན་སྟེང་ནས་རླུང་བུ་བསིལ་བསིལ་གདོང་ལ་ཕོག

སྤྲིན་གྱི་རྟ་དང་གླང་བོ་ཡང་ཉེ་བར་བཏུད

ཀི་ཤེད་ཀྱིས་བཏབ་པས་སྤྲིན་པ་སུལ་བུར་གཏོར་མ་ནུས

བྱ་རྒོད་ཀྱི་མིག་མདངས་ལ་ཁྲག་རྣག་བབས

ཁྲག་རྣག་གི་སྟེང་དུ་འབུ་སྦྲང་མང་པོ་འཁོར་ཞིང་འཁོར

ཞེ་འཁྲེང་པའི་བུ་མོ་གཅེར་བུའི་ལུས་ཀྱིས་ཙོག་པུར་སྡོད

མགོ་སྒུར་ཙམ་གྱིས་གཞང་སྒོ་མཐོང་བར་དོགས་ཙམ་བྱེད

ཆེ་ཆུང་ཤོར་བའི་ནུ་ཟུང་གིས་སྟེགས་ལྒང་སྤོ་ལོ་བཞིན་གདོང་ཐུག་རྒྱག

ང་ནི་དེ་ལ་དངངས་ཤིང་འབྲོ་བར་རྩོམ

མེ་ལོང་གས་ཆག་ཏུ་སོང་རྗེས་ང་ནི་མཚན་སྨག་གི་ཁུད་དུ་ལུས

རང་བྱུང་ཁམས་ཀྱི་ལྟོ་བར་ཚེར་མ་སྐྱེས་ཏེ

ང་ཡི་མིག་ནང་ལ་གཙག་པར་བྱེད

ནམ་མཁའ་ཡ         ས་གཞི

                        2009  4  24

རྩོམ་ཁུངས། ངེད་དྲ་བ།