བྱམས་བརྩེ་ཆར་པ་སྟོང་དུ་འཇོ་བས་དབྱིག་འཛིན་བུ་མོའི་བཞིན་རས་རློན།།
ཚ་ཟེར་འབུམ་གྱི་འོད་རྣོན་སྒྲིབ་སྟེ་ཞི་བསིལ་བདེ་བ་སྦྱིན་པའི་གཏེར།།
ལྷ་ཡི་དབང་པོའི་ཁྱུ་མཆོག་འགྲོས་ལྡན་གནམ་མཐོངས་དབྱིངས་ཀྱི་སྤྲིན་པ་ལཊ།།
གལ་ཏེ་ཁྱོད་ཉིད་བྱང་ཕྱོགས་བསྐྱོད་ན་ཉམ་ཆུང་བུ་ངའི་འཕྲིན་འདི་ཁྱེར།།
 
གངས་རིའི་ཅོད་པན་རླུང་གིས་སྐྱོད་ཅིང་གངས་འདབ་གཙང་ཆུ་ལྷུང་ལྷུང་འབབས།།
མ་རྒད་སྤུངས་པའི་སྤང་རིའི་ངོས་ལ་ཤ་དང་ཡུ་མོས་རྩེད་འཇོ་རོལ།།
འབྲོང་རྒོད་དར་མའི་རྨིག་རྗེས་རེ་རེས་རྫ་ལམ་ཕྲ་མོའི་དྲན་རྟེན་འཇོག།
ཁོ་བོའི་སྙིང་གི་འཕར་སྒྲ་འདི་ཀོ་སྤྲིན་པའི་རུམ་དུ་སྣམ་མཛད་ནས།།
 
བྱང་ཕྱོགས་ཁ་བའི་ཕྲ་མཚམས་སྒྲིག་པའི་ཧི་མ་ལ་ཡའི་ཕ་རོལ་ན།།
ཡིད་འོངས་འཛུམ་མདངས་མངོན་པར་གསལ་པའི་གངས་ཅན་ལྷ་ཡི་ཞིང་ཁམས་དང༌།།
ལྷན་སྐྱེས་བྱམས་བརྩེ་ཁོག་ན་རྒོད་པའི་སྤྲེལ་སྲིན་འདུས་པའི་མི་རྒྱུད་ཡོད།།
ཁྱོད་ཉིད་བྲེལ་བས་རེངས་པར་མ་མཛོད་དེ་ན་དལ་བུར་ལྡིང་མཛད་དེ།།
 
བྱིན་རླབས་དྲི་བསུང་ཕྱོཊ་བརྒྱ་འཐིབས་པའི་ངོ་མཚར་ཇོ་ཁང་རྣམ་གཉིས་དང༌།།
ལུང་རིཊ་རླབས་ཀྱི་རྩེད་འཇོ་རྒོད་པའི་གདན་གསུམ་ངང་མོའི་རྒྱ་མཚོ་འཁྱིལ།།
གྲུབ་པའི་གཤོག་རྩེ་མཁའ་མཐར་སྐྱོད་པའི་གསང་ཆེན་རྒྱུད་གྲྭ་རྣམ་གཉིས་སོཊ།།
གདུང་སེལ་ཟླ་བའི་མཛོད་ལ་འགྲན་པའི་དད་རྟེན་དེ་ཀོ་མཇལ་བར་མཛོད།།
 
གཉའ་ཁྲི་བཙན་པོའི་ཞབས་རྗེས་བཀོད་པའི་ཕོ་བྲང་ཡུ་བུ་བླ་སྒང་དང༌།།
ལོ་རྒྱུས་མིག་སྟོང་ཕྱོགས་བརྒྱར་བགྲད་པའི་པོ་ཏཱ་ལ་ཡི་གཟི་རྔམས་འབར།།
ཕྱག་ན་པད་མོའི་འཛུམ་མདངས་བཞད་པ་ནོར་བུ་གླིང་གའི་མཛེས་ལྗོངས་སོཊ།།
བར་སྣང་དབྱིངས་ནས་དལ་བུར་གཟིགས་དང་ངོ་མཚར་ལྟད་མོ་དེ་ཀོ་མཐོང༌།།
 
རྒྱ་བོད་རང་ས་སོ་སོར་སྐྱིད་པའི་མི་འགྱུར་ཚིག་གི་རི་མོའི་འཛུམ།།
ཁྲི་རལ་བཙན་པོའི་ལག་རྗེས་གསལ་བ་པུར་རྒྱལ་བོད་ཀྱི་དཔང་རྟགས་ཆེ།།
ནམ་མཁའི་ངོས་ལ་ཀྲོང་ངེར་འགྱིང་པའི་ལོ་རྒྱུས་མེས་པོའི་རྡོ་རིང་ཡོད།།
ཁྱོད་ཉིད་དྲི་མེད་ལྷ་རེག་ཟོལ་གྱིས་དལ་བུར་མགུལ་ནས་འཁྱུད་པར་མཛོད།།
 
འོན་ཀྱང་བར་སྐོར་ཁྲོམ་གཟིགས་ཁ་སོགས་གྲོང་ཁྱེར་དཀྱིལ་གྱི་སྲང་ལམ་དུ།།
ཞུམ་མེད་སྤུན་ཟླ་དཔའ་བོ་སྟོང་གིས་བདེན་པའི་ལོ་རྒྱུས་རྩོད་པ་ལ།།
ཁྲག་རླབས་དམར་པོ་དགུང་ལ་ཕྱུར་བའི་གུང་ཁྲན་ཏང་གི་དྲག་གནོན་དེ།།
གལ་ཏེ་ཁྱོད་ཀྱིས་མཐོང་བར་གྱུར་ན་ཆར་པའི་མིག་ཆུ་དབང་མེད་བྲེན།།
 
དགའ་སྡུག་འདྲེས་མའི་ཚོར་བའི་ཀློང་ནས་མཐོན་པོའི་རི་ཡི་རྐང་སྟེགས་ལ།།
སྨུག་པོའི་ཟོལ་གྱིས་ངལ་བསོ་མཛད་ནས་སླར་ཡང་ཤར་ཕྱོཊ་ཕུར་མཛོད་དང༌།།
གངས་ཅན་མདོ་ཁམས་དབྱིག་འཛིན་དགའ་མོའི་ལང་ཚོའི་རི་ཡི་ནུ་འབུར་མཐོང༌།།
ཁྱོད་ཉིད་སྲེད་ནས་འཁྱུད་པར་མ་གནང་བར་སྣང་དབྱིངས་ནས་གཟིཊ་མོར་མཛོད།།
 
ཉི་ཟླའི་བགྲོད་པ་ཆེས་ཆེར་དམའ་བས་མཁའ་ལྡིང་ཕལ་རྣམས་མང་བུར་རྟོག།
སྤྲིན་སྔོན་རལ་པའི་ཁུར་གྱིས་དུབ་བའི་སྒང་དྲུག་རི་བོའི་རྐེད་པ་ནས།།
ཁྱུ་མཆོག་ཐལ་དཀར་གཞོན་ནུའི་ཟོལ་གྱིས་ཁྱོད་ཉིད་དལ་བུར་སྐྱོད་མཛོད་དང༌།།
གངས་ཅན་གདོད་མའི་ལྷ་སྲུང་དག་གིས་ཁྱོད་ལ་སྨུག་པའི་ལེགས་སྐྱེས་སྟེར།།
 
མ་རྒད་ཞུན་མའི་སྟོད་གཡོག་ཀླུབས་པའི་ཡིད་འོང་སྤང་རི་མཐོ་པོའི་ངོགས།།
གཡང་དཀར་ལུག་གིས་འབའ་སྒྲ་དང་ནི་ཕྱུཊ་རྫིའི་གླིང་བུའི་རམ་འདེཊ་ཀྱིས།།
ཁྱོད་ཉིད་ཕེབས་པ་ཤིན་ཏུ་ལེགས་ཞེས་དགའ་བའི་ཟློས་གར་རྩེན་ངེས་པས།།
ཁྱོད་ཀྱིས་ཆར་སྤྲིན་མདངས་ལས་འཕོས་པའི་དབང་གཞུ་གསར་པའི་ལེཊ་སྐྱེས་བྱིན།།
 
ཁ་འབབས་ཀླུང་བཞིས་མཚོན་ནུས་མ་ཡིན་དྭངས་གཙང་བདུད་རྩིའི་བཅུད་ལྡན་མ།།
གངས་རྒྱུན་ཞུན་མའི་གཙང་ཆུ་རྣམ་བཞིས་ཁྱོད་ཉིད་མཁའ་ལ་མཐོང་བའི་མོད།།
དགའ་བའི་རླབས་སྒྲ་ཤག་ཤག་ལྡིར་ཞིང་ལག་པའི་རླབས་ཕྲེང་རྩེན་པར་ངེས།།
ཁྱོད་ཉིད་དོཊ་པའི་དཔྱང་ཐག་མ་འཛིན་ཟོལ་མེད་ཆར་གྱི་འཛུམ་མདངས་ཐོན།།
 
ཤར་ཕྱོཊ་མཚམས་སྤྲིན་དམར་པོའི་ཀློང་ནས་ཐན་པའི་ཚ་རླབས་རབ་འབར་བས།།
སྐམ་པས་གདུང་བའི་མདོ་ཁམས་པ་རྣམས་ཁྱོད་ཉིད་ལྡིང་པ་མཐོང་བའི་མོད།།
རེ་བའི་མིག་ཞཊ་གྱེན་དུ་བསྲིངས་ནས་གདུང་འབོད་དབྱངས་སུ་གྱེས་ངེས་པས།།
ཁྱོད་ཉིད་རིངས་པའི་ཐུཊ་བྲེལ་མ་གནང་ཆར་པའི་སྐྱེས་བཟང་གནང་བར་གྱིས།།
 
མདོ་ཁམས་དབང་ཕྱོཊ་འཛིན་མའི་རྒྱན་གཅིག་དཀར་མཛེས་ས་ཡི་ཐིག་ལེ་ན།།
ནམ་མཁའི་སྐར་ཚོཊ་ས་ལ་ལྷུང་འདྲའི་བཀོད་ལེཊ་མཛེས་པའི་གྲོང་ཁྱེར་ཡོད།།
རྒྱ་བོད་ཧོར་གསུམ་མཉམ་དུ་འཛོམས་པའི་ཚོང་འདུས་མགྲོན་པའི་འཚང་ཀ་ལ།།
ཁྱོད་ཉིད་ཐུགས་ཀྱི་བྲེལ་བ་མ་གནང་སྐྱིད་སྡུག་སྒྱུ་མའི་ལྟད་མོ་གཟིགས།།
 
དེ་ཡི་ཉེ་འགྲམ་ཐུབ་བསྟན་ཡང་སྙིང་ཞྭ་སེར་ཅོད་པན་འཆང་བའི་སྡེ།།
དཀར་མཛེས་བཤད་སྒྲུབ་རླབས་སྟོང་རྒོད་པའི་ནོར་བུའི་གླིང་གི་རོལ་མཚོ་ཡོད།།
དེ་ན་རིགས་གྲོལ་འདུས་པ་རྒྱ་མཚོས་རྩོམ་འཆད་རྩོད་པའི་རྦ་རླབས་གཡོ།།
ཁྱོད་ཉིད་ནམ་མཁའི་བླ་རེ་ཟོལ་གྱིས་བསིལ་བྱེད་གྲིབ་མའི་མཆོད་སྦྱིན་མཛོད།།
 
དགོན་དེའི་བརྗིད་ཆཊ་ཀུན་དགའ་ར་བའི་རྒྱལ་མཚན་མཐོན་པོའི་གཟིམས་ཁང་ན།།
བདག་གི་གསུམ་ལྡན་རྗེ་བཙུན་བླ་མ་བློ་བཟང་འཇམ་པའི་དབྱངས་སྙན་གྱིས།།
སྐལ་བཟང་སློབ་ཚོཊ་ཀླུང་བཞིའི་རྡུལ་ལ་ཆོས་ཚུལ་མང་རྩི་འགྱེད་བཞིན་ཡོད།།
ཁྱོད་ཀྱིས་ང་ཡི་དད་པའི་མིག་ཆུ་ཆར་པའི་ཟོལ་གྱིས་དབབ་པར་མཛོད།།
 
དེ་ནས་ཆུ་ལྷའི་ཞགས་པ་རྒྱུད་དེ་ལེ་དབར་བཅུ་ཙམ་ལྡིང་མཛོད་དང༌།།
བྱིན་རླབས་མཚོན་ཁ་གཞན་ལས་རྣོ་བའི་འགྲོ་ཕན་གླིང་གི་དགོན་པ་ཡོད།།
ཉམ་ཆུང་ངེས་མེད་སྤྲང་འཁྱམས་བདག་གི་སྐྱིད་སྡུག་བཅོལ་སའི་ཆོས་སྡེ་དེར།།
སྤྲིན་གྱི་མེ་ཏོག་སིལ་བུ་གཏོར་ཞིང་སྙན་པའི་རྔ་སྒྲ་ལྡིང་བར་མཛོད།།
 
རྦ་རླབས་རལ་པ་མཁའ་ལ་བསྙེགས་པའི་རྫ་ཆུ་གཙང་པོའི་འགྲམ་ཉིད་ཀྱི།།
གདོད་མའི་ལྷ་ཡི་གྲོང་ནས་ཆད་པའི་གཙང་འགྲམ་ཞེས་བྱའི་གྲོང་དེ་ན།།
དགའ་སྡུག་འདྲེས་མའི་ཚོར་བ་སྟེར་པའི་དུད་ཁྱིམ་གསུམ་ལྷག་སུམ་ཅུ་ཡོད།།
ཁྱོད་ཉིད་དལ་བུ་ཉེ་བར་གཅར་ཏེ་གློག་འོད་མིག་གིས་གཟིགས་མོར་མཛོད།།
 
སྐྱིད་ལ་སྡུག་པའི་གྲོང་གསེབ་དེ་ན་ས་མཐར་འཁྱམས་པའི་བུ་རུལ་ངའི།།
ཤ་ཁྲག་ཕུང་པོའི་ལུས་འདི་སྦྱིན་མཁན་དྲིན་ཅན་ཨ་མ་རྒན་མོ་ཡོད།།
བུ་ངའི་ལག་གི་འདྲ་པར་འདི་ཉིད་དྲན་པའི་གློག་གིས་བཅིངས་མཛོད་དེ།།
ཡིད་འོངས་སྤྲིན་དཀར་འདབ་མའི་ཕུང་པོ་དལ་བུར་གྲོང་དེའི་ཀླད་དུ་ལྡིངས།།
 
དལ་བུར་ལྡིར་བའི་སྤྲིན་གྱི་སྒྲ་དང་ཆར་རྒྱུན་ཟིལ་མའི་ལེགས་སྐྱེས་བཅས།།
འཇའ་ཚོན་སྣ་ལྔའི་གུར་ཁྱིམ་དབུས་ན་རྨ་བྱ་དགའ་བའི་གར་ལ་རྩེན།།
མིག་དང་རྣ་བའི་བདུད་རྩིའི་དཔྱིད་གྱུར་སྒྱུ་མའི་དགའ་སྟོན་ལ་བརྟེན་ནས།།
དྲིན་ཅན་ཨ་མའི་སེམས་པ་གསོ་གིན་བུ་ངའི་འཕྲིན་འདི་ཀླག་པར་མཛོད།།
 
འདི་ནས་དཔག་ཚོད་དུ་མས་ཆོད་པའི་བྱང་ཕྱོཊ་ཁ་བའི་མཛེས་ལྗོངས་ཀྱི།།
རང་གི་ལྟེ་ཁྲག་ས་ལ་འཕོས་པའི་གཙང་པོའི་འགྲམ་གྱི་གྲོང་ཚོ་དེར།།
མིག་ཆུ་ཕྲེང་བ་རིང་མོའི་ནང་དུ་ཐུགས་ཁྲལ་སྨྲེ་ངག་བགྲང་མཛད་པའི།།
ཡུན་རིང་བྱམས་པའི་དྲིན་གྱིས་སྐྱོང་བའི་དྲིན་ཅན་ཨ་མ་རྒན་མོ་ལགས།།
 
སྐྱིད་སྡུག་སྣ་ཚོགས་ལུས་ལ་མྱོང་བའི་དྲིན་ཅན་ཨ་མའི་ཞལ་རས་དེ།།
རྒྱང་རིང་ལྷོ་མཐའི་ཚ་བའི་ཡུལ་ནས་མཇལ་བའི་སྐལ་བ་མི་ཐོབ་པས།།
དེ་སླད་བུ་ངའི་སྙིང་གི་ཁོང་གསུབ་ཡུན་རིང་ཉར་བའི་གསང་འཕྲིན་འདི།།
ནམ་མཁའི་དབྱིངས་ནས་དལ་བུར་རྒྱུ་བའི་སྤྲིན་དཀར་འདབ་མ་ཞིག་ལ་སྐུར།།
 
མངལ་གྱི་ཁང་བཟང་ཟླ་དགུ་ངོ་བཅུར་ཁུར་བའི་ལེན་དུ་ན་ཟུག་སྦྱིན།།
ལུས་ཀྱི་སྙིང་བཅུད་འོ་མས་གསོས་པར་སོར་བཅུར་བཙོག་པའི་སྐྱེས་ལེན་སྟེར།།
བྱམས་བརྩེ་འབུམ་གྱི་འོ་ཡི་ལན་དུ་མི་གཙང་སྣ་ལུད་གདོང་ལ་བསྐུ།།
འོས་མེད་ལས་ལ་འཁོན་འཛིན་མེད་པའི་དྲིན་ཅན་ཨ་མའི་ཞལ་རས་དྲན།།
 
སྙན་པོའི་མིང་གིས་ཡང་ཡང་བོས་ཤིང་སོར་བཅུ་འདབ་མའི་རྩེ་ལ་སྐྱོན།།
འགྲོ་ཚེ་རྒྱབ་ཀྱི་ཁུར་དུ་ཁྱེར་ཅིང་སྡོད་དུས་པང་གི་རྒྱན་དུ་འཆང༌།།
ཞིམ་མངར་ཟས་ཀྱིས་ནང་ནས་གསོས་ཤིང་དྲོ་འཇམ་གིས་ཀྱིས་ཕྱི་ནས་བསྐྱངས།།
ལྷོད་མེད་བརྩེ་བའི་འདུད་བརྒྱ་འཆིང་པའི་དྲིན་ཅན་ཨ་མའི་བཀའ་དྲིན་དྲན།།
 
དཔྱིད་གསུམ་ལྟོགས་སྐམ་མེ་ཡི་ཀློང་དུ་སོ་ནམ་གློག་གི་གར་ལྟར་འཁྱུགས།།
དབྱར་གསུམ་ཆུ་དང་ཆར་པའི་ཁྲོད་དུ་གསེར་མིག་ཉ་བཞིན་རློན་པས་མནར།།
སྟོན་གསུམ་ས་ཞིང་སྨིན་པའི་གསེབ་ན་སོར་བཅུའི་འདབ་མ་སེར་གས་རྒྱན།།
དགུན་གསུམ་རླུང་དང་ལྷགས་པའི་ཁྲོད་དུ་གོན་ཆས་སྲབ་པའི་ཨ་མ་དྲན།།
 
ལང་ཚོའི་མེ་ཏོག་བཞད་པའི་མོད་ལ་ཁྱིམ་གྱི་དཀའ་ཁག་མགོ་ལ་ལྷུང༌།།
དུས་བཞིའི་གློག་གི་འགྱུར་འགྲོས་ཁྲོད་དུ་ལང་ཚོའི་འཕེན་པ་འཇའ་ལ་ཐིམ།།
སྐྱིད་སྡུག་ངེས་མེད་ཆུ་ཡི་གཉེར་མ་མི་སྡུག་བཞིན་རས་ངོས་སུ་བབས།།
བུ་ཡི་དོན་དུ་རྙོག་འཛོང་འདམ་ཁྲོད་མི་ཚེ་རྫོགས་པའི་ཨ་མ་དྲན།།
 
དབང་ཆེན་དཔོན་པོས་བསྡུ་རུག་བྱེད་པའི་འབྲུ་དང་དངུལ་གྱི་དཔྱ་ཁྲལ་དང༌།།
ཉིན་མཚན་ངེས་མེད་འུ་ལག་རྒྱུག་པའི་ཁྲག་དང་རྔུལ་ཆུའི་ནམ་ཟླའི་ཁྲོད།།
གཞན་དབང་ལྕགས་ཀྱི་དྲ་རྒྱའི་བསྲུབ་ནས་བུ་ལ་བརྩེ་བའི་འཛུམ་དཀར་གྲོལ།།
སྐྱིད་སྡུག་ཁུར་པོ་ལུས་ལ་ལྕི་བའི་བུ་ངའི་དྲིན་ཅན་ཨ་མ་དྲན།།
 
ང་རང་དར་མདོའི་མཐོ་སློབ་འགྲོ་དུས་དངུལ་སྐྱེད་བུ་ལེན་འཕྲང་ནས་བརྫངས།།
བཤད་སྒྲུབ་ནོར་བུའི་གླིང་དུ་རྩེན་སྐབས་ཤ་མར་འཐུད་ཀྱི་གནང་སྦྱིན་བཏེགས།།
བསླན་པའི་གོས་དང་སྐྱ་བོའི་ཟས་ཀྱིས་ཁྱག་ཁྱོག་ལོ་ཟླ་རིང་མོའི་ནང༌།།
འཚོ་ཐབས་མཛད་པའི་དྲིན་ཅན་མ་ལོ་བུ་ངའི་སེམས་ཀྱི་གཏིང་ནས་དྲན།།
 
མདང་གི་ནུབ་མོ་གཉིད་ལ་ཡུར་བས་ཐུན་གསུམ་རྨི་ལམ་ཞིང་དུ་སླེབས། །
ཞིང་ཁམས་དེ་ནས་བྱམས་བརྩེའི་ཐེག་ལེ་དྲིན་ཅན་ཨ་མའི་ཞལ་རས་མཇལ།།
དགའ་སྡུག་འདྲེས་མའི་མཇལ་འཕྲད་གཏམ་གྱིས་མིག་ཆུ་ཕྲེང་བ་ཡང་ཡང་བགྲངས།།
ཞོཊ་པའི་སྐྱ་རེངས་མཁའ་མཐར་འཛུམ་དུས་སྒྱུ་མའི་མུལ་མདུད་འཇའ་བཞིན་ཞིག།
 
ད་ནང་འདས་དོན་ཕྱིར་དྲན་བྱས་པས་སེམས་ཀྱི་བུ་ཆུང་དྲག་ཏུ་ལྡིང༌།།
འཚོང་འདུས་མགྲོན་པོའི་ཁྲོམ་གྱི་གསེབ་ཏུ་འཁྱར་མ་འཁྱོར་གྱི་གོམ་སྟབས་བསྒྱུར།།
གངས་རིའི་ལང་ཚོ་དབུ་ལ་སྨིན་པའི་སྐྲ་དཀར་རྒན་མོའི་སྣང་བརྙན་མཐོང༌།།
ལོ་རྒན་དྲུག་ཅུས་གཉའ་ནས་གནོན་པའི་དྲིན་ཅན་ཨ་མ་སླར་ཡང་དྲན།།
 
ང་རང་མ་དང་གྱེས་མཇལ་ཞུ་དུས་ཨ་མའི་སྐྲ་ལོ་དཀར་མ་ནག།
ཁ་སང་བསྐུར་བའི་འདྲ་པར་མཐོང་དུས་དབུ་ལོ་དུང་གི་ཁ་དོག་འཛིན།།
མི་རྟག་སྒྱུ་མའི་ཡོལ་བའི་ཕག་ནས་ལང་ཚོའི་ཟློས་གར་རྩེན་པའི་གོས།།
དབྱར་དགུན་དུས་གཅིག་བརྗེས་པ་མཐོང་རྗེས་བུ་ངའི་ཡ་ཆུང་སྡུག་གིས་གང༌།།
 
ལྷོ་མཐའི་གྲོང་ཁྱེར་གྷོ་ཝའི་ཉེ་འགྲམ་སྔོ་མེར་འཁྱིལ་བའི་རྒྱ་མཚོ་ཆེ།།
རླབས་དཀར་གྱེན་དུ་ཕྱུར་བའི་འཇིངས་ལ་ཡིད་འོང་ངང་མོའི་ཕྲེང་བ་དག།
སྙན་སྒྲོག་མགྲིན་པའི་གླིང་བུ་འཁྲོལ་བཞིན་ལྷན་ཅིག་མ་བུ་རྩེན་མཐོང་བས།།
དུང་སེམས་རྒྱ་མཚོ་ཁོག་ནས་འཁྲུག་པའི་རྦ་རླབས་མིག་ཆུའི་ཟོལ་དུ་འཐོར།།
 
བཻཌཱུར་ཞུན་མ་ལན་བརྒྱར་བྱུཊ་པའི་སྔོ་བསངས་ཀུན་གསལ་སྒེག་མོའི་དབྱིངས།།
རྒྱུ་སྐར་ནོར་བུའི་ཕྲེང་བ་འཕྱང་བ་ཉ་གང་ཟླ་བའི་དཀྱིལ་འཁོར་གསལ།།
ཞི་བསིལ་བདུད་རྩིའི་ག་བུར་ཟེགས་མ་དབྱིག་འཛིན་ཁྱོན་ཀུན་བརྡལ་བ་ན།།
བྱམས་བརྩེ་འཛད་མེད་གཏེར་གྱིས་ཕྱུག་པའི་དྲིན་ཅན་ཨ་མའི་སྣང་བརྙན་དྲན།།
 
མ་རྒད་ལོ་མའི་གོས་བཟང་གྱོན་པའི་སཱ་ལ་ལྗོན་པའི་ནགས་ཀླུང་ན།།
དབྱངས་སྙན་རྣ་བའི་བདུད་རྩི་སྦྱིན་མཁས་ཁུ་བྱུག་བུ་མོའི་མགྲིན་པ་ནས།།
དྲི་ཟའི་འཇིག་རྟེན་རྫོགས་པའི་རྒྱང་གླུ་ཐོས་འཛིན་བུ་གར་སོན་པའི་མོད།།
ལྷག་བསམ་མེ་ཏོག་ཁོག་ན་རྒོད་པའི་དྲིན་ཅན་ཨ་མའི་བསླབ་བྱ་དྲན།།
 
ཨིནྡྲ་ཞུན་མའི་རྒྱུན་བཟང་འཁྱིལ་བའི་ཡིད་འོང་དྭངས་གཙང་བརྒྱད་ལྡན་གཏེར།།
གཤོག་དྲུག་འཁྱུག་འགྲོས་གར་དུ་རྩེན་པའི་མངོན་པར་དགའ་བའི་རྫིང་བུ་ན།།
མང་རྩིའི་སོ་ཕྲེང་མངོན་པར་རྒོད་པའི་འདམ་སྐྱེས་སྣ་ཚོགས་མཐོང་བ་ན།།
ཟོ་བཟང་བརྩེ་དུང་ཁོག་ན་རྒོད་པའི་དྲིན་ཅན་མ་ལོའི་བྱམས་བརྩེ་དྲན།།
 
དྲིན་ཅན་ཨ་མ་རྒྱབ་ཏུ་བཞག་སྟེ་ངེས་མེད་ས་མཐར་འཁྱམས་པའི་བུ།།
ང་རང་ད་ལྟར་དབུས་འགྱུར་ལྷོ་མཐའ་ཆོས་སྡེ་ཆེན་པོ་འབྲས་སྤུངས་ན།།
ཟབ་རྒྱས་གཞུང་ཆེན་བཀའ་པོད་ལྔ་ལ་ཐོས་བསམ་སློབ་གཉེར་བྱེད་ཁུལ་མོད།།
འོན་ཀྱང་ཐོས་དོན་སྒྲུབ་པས་དབེན་པར་མ་ཡིས་བཀའ་ཀྱོན་མ་གནང་རོགས།།
 
ཡུན་རིང་བྱམས་དང་བརྩེ་བས་བསྐྱངས་མཐར་བུ་ཡིས་དྲིན་ལན་བསབ་པའི་ཚབ།།
རྒྱང་རིང་གྱེས་པའི་སེམས་གྱི་རྨ་ཁ་ཁྲག་དང་མིག་ཆུ་གཞུར་སོང་ཞེས།།
དྲིན་ཅན་མ་ལོས་འཁངས་ར་མ་གནང་ལས་ཀྱིས་བྱིན་པའི་བགོ་སྐལ་དེ།།
དབང་ཆེན་ཚངས་པས་བཟློག་ཐབས་མེད་ན་ཉམ་ཆུང་མ་བུས་ཇི་ལྟར་ཟློག།
 
ཤར་ལྷོ་ངེས་མེད་འཕུར་སྐྱོད་བྱེད་པའི་འདབ་ལྡན་མཇུག་ནག་མགྲིན་རིང་ཁྱུ།།
དབྱར་དགུན་ནམ་ཟླའི་འགྱུར་འགྲོས་དང་འགྲོཊ་མཁའ་མཐར་ཉུལ་བའི་ཁུ་བྱུག་བྱ།།
སྐྱིད་སྡུག་འཕྲང་ལམ་དོག་པོའི་རྒྱུད་ནས་ས་མཐར་འཁྱམས་པའི་སྤྲང་ཕྲུག་གསུམ།།
ཟློག་མེད་ལས་སྐལ་མགོ་ལ་ལྷུང་ཕྱིར་ཨ་མས་ཐུགས་ཁྲལ་གནང་དོན་མེད།།
 
ཕྱི་ན་མཛེས་པའི་ལང་ཚོ་མི་ལྡན་སྒོ་ཁྱི་བརྒྱ་ཡིས་སྡང་ཟུག་བྱེད།།
ནང་ན་ཤེས་བྱའི་ཡོན་ཏན་མེད་པས་སྐྱེ་བོ་སྟོང་གིས་མཐོང་ཆུང་བྱེད།།
ལག་ཏུ་ཀུན་དགའ་དོན་འགྲུབ་མེད་ཕྱིར་འབྱོར་ལྡན་འབུམ་གྱིས་རྐང་འོག་རྫིས།།
མགོ་ན་འདྲེན་པའི་སྐྲ་ལོ་མེད་ཕྱིར་རིམ་པ་དགུ་ཡི་དུང་དུ་ལྷུང༌།།
 
མཐོ་རིམ་མི་སྣའི་གནར་གཅོད་རེ་རེས་སྙིང་གི་རྐང་མ་འབྱིན་ལ་ཁད།།
བླ་སྤྲུལ་བཙན་པོའི་བཀའ་ལུང་རེ་རེས་ཕྱི་མའི་མདུན་ལམ་འཕྲོག་ལ་ཁད།།
སྐད་རིགས་མི་གཅིག་ཕྱི་མི་རེ་རེས་ལུང་པ་འདི་ནས་བསྐྲད་ལ་ཁད།།
དེ་སླད་ཡུལ་ཁམས་འདི་ན་སྡོད་པའི་རེ་བའི་འདུན་པ་རིང་དུ་གྱུར།།
 
དེ་ལྟ་ན་ཡང་གངས་ཅན་མགོན་པོའི་ཞལ་གྱི་པད་མོའི་འཛུམ་མདངས་ལས།།
འཚེ་མེད་ཞི་བསིལ་བདེན་པའི་མང་རྩིས་འཛམ་གླིང་ཆེ་རྒུའི་བྷ་མ་ར།།
ཀུན་ཀྱང་ཡིད་ག་དབང་མེད་འཕྲོག་སྟེ་རྒྱབ་རྟེན་ཚ་ཟེར་སྤྲོས་པས་ན།།
བདག་ཀྱང་དེ་ཉིད་ཅི་དགར་སྤྱོད་ཕྱིར་ཕྱོགས་འདིར་རེ་ཞིག་སྡོད་པ་ལགས།།
 
ནམ་ཞིག་རང་དབང་ཉིན་བྱེད་ཐིག་ལེ་རྫོགས་ལྡན་གསར་པའི་འོད་སྣང་འཛུམ།།
གངས་ཅན་སཱ་ལའི་དབྱིག་འཛིན་ཕང་བར་གསལ་ལེར་འཆད་བའི་ཉིན་མོ་དེར།།
འཚེ་མེད་རང་དབང་བདེན་པའི་ལམ་ནས་ལུཊ་ཟུང་རྐང་པའི་འདེཊ་འཇོག་གིས།།
དབྱིག་འཛིན་ལྟོ་བ་དྲག་ཏུ་བསྣུན་ཏེ་ཕ་སའི་ཕྱོགས་སུ་གོམ་སྟབས་བསྒྱུར།།
 
བུ་ཡུག་འཚུབ་མའི་འོ་དོད་ཁྲོད་དུ་སྔོ་ལྗང་ལོ་འདབ་རླུང་གིས་ཁྱེར།།
བརྩེ་མེད་དུས་ཀྱི་ཀྱོ་བས་བཀུག་པའི་དགུན་ཤིང་འཁྱོག་པའི་མང་ཚོ་ཅན།།
དྲིན་ལྡན་སྐྱེད་མའི་ཞལ་རས་འཛུམ་མདངས་འདྲེན་བྱེད་དཔྱིད་དུ་སྨིན་པ་དང༌།།
སྐྱིད་སྡུག་འདྲེས་མའི་མཇལ་འཕྲོད་གཏམ་གྱི་སྐལ་བཟང་དགའ་སྟོན་ཐོབ་པར་ངེས།།
 
འདུས་ནས་བྲལ་བ་ཀུན་ལ་ཡོད་དེ་སྟོན་མཇུག་ལོ་མའི་ཟློས་གར་བཞིན།།
བྲལ་ནས་འདུས་པ་ཀུན་ལ་ཡོད་པ་ཚོང་འདུས་མགྲོན་པོའི་ཚུལ་ལ་གཟིགས།།
དེ་སླད་མ་ལོ་ཐུགས་ཁྲལ་མ་གནང་སྐུ་ཚེ་ཞབས་པད་བརྟན་པར་བཞུགས།།
རྟེན་འབྲེལ་སྒྱུ་མའི་གཤིས་སུ་གྲུབ་ཀྱང་ཚེ་ཡི་ལྷ་ལ་སླུ་བ་མེད།།
 
སྐྱིད་སྡུག་སྒྱུ་མའི་ཟློས་གར་འཁྲབ་སའི་མི་ཚེ་ཁུག་ཀྱོག་དོག་པོའི་ནང༌།།
ཁྲག་དང་མིག་ཆུའི་དྲག་ཆར་བརྡོལ་བའི་ཡུན་རིང་བྲལ་གདུང་རི་མོའི་འཕྲིན།།
དྲིན་ཅན་སྐྱེད་མ་ཁྱོད་ཀྱི་ཞལ་ནས་སྤྲིན་པ་འདི་ལ་སྐུར་བར་མཛོད།།
ནམ་ཞིག་རྟེན་འབྲེལ་དུས་ཀྱི་འཁོར་ལོས་འབྲུག་སྒྲའི་ཟོལ་གྱིས་འདི་ན་ལྡིང༌།།
 
མིད་པའི་འཕྲང་ལམ་འཆིལ་མས་གནང་བཞིན་བྲལ་གདུང་མིག་ཆུ་དང་འགྲོཊ་པའི།།
དྲིན་ཅན་མ་ལོས་གནང་བའི་ཆ་འཕྲིན་སྤྲིན་པའི་རུམ་དུ་སྡུད་མཛད་ནས།།
དབང་ཕྱོཊ་དབྱིངས་སུ་དལ་བུར་ལྡིང་དང་རྒྱལ་ནག་དམར་པོའི་གྲོང་ཁྱེར་མཐོང༌།།
དེ་ན་གཤིན་རྗེའི་ལས་མཁན་ལ་འགྲན་བཙན་འཛུལ་དམར་པོའི་རུ་ཚོན་ཡོད།།
 
སྤྲེལ་སྲིན་འདུས་པའི་གདོང་དམར་བོད་ཡུལ་དམྱལ་ཁམས་དངོས་ལ་སྒྱུར་བྱེད་པའི།།
བརྩེ་མེད་སྲིན་པོའི་མེ་ལྕེ་དམར་པོས་གངས་རིའི་མཛེས་སྡུག་རྨང་ནས་བཤིགས།།
སྤྲིན་གྱི་མཆེད་ཟླ་གངས་རིའི་ལྷ་མོའི་མཚར་སྡུག་ལང་ཚོ་འཇའ་ལ་ཐིམ།།
ནམ་ཡང་སང་མེད་ལོ་རྒྱུས་རྨ་ཁ་ལྷན་སྐྱེས་སྙིང་གི་ངོས་ལ་གཏད།།
 
དེ་སླད་གངས་ལྷའི་སུབ་མེད་ལ་རྒྱ་སྤྲིན་གྱི་སྙིང་ལ་ཉར་བྱས་ཏེ།།
ངམ་ནག་སྤྲིན་གྱི་གཞིན་རས་བསྡུས་ནས་སྡང་མིག་གློག་གི་ཞགས་པ་དང༌།།
ལྷན་ཅིག་སྒྲ་བརྒྱས་གནམ་ས་སྒུལ་ཞིང་ལྕེ་འབབ་གནམ་ལྕགས་ཐོག་སེར་གྱིས།།
མཐའ་དག་ཙི་ནའི་ཤོག་བུའི་གྲོང་ཁྱེར་མེ་ལྷའི་ཞལ་དུ་བསྟབ་པར་མཛོད།།
 
ནམ་ཞིག་འགོག་མེད་མཁའ་མཐའི་དབྱིངས་ནས་མཁའ་འགྲོའི་དབང་ཕྱུག་ལྡིང་བ་བཞིན།།
རང་དབང་གཤོག་པའི་འདེཊ་འཇོག་ཟོལ་གྱིས་ལྷོ་མཐའི་ཕྱོཊ་འདིར་སླེབས་པ་ན།།
དྲིན་ཅན་མ་ལོའི་སྐྱིད་སྡུག་ཕྲེང་བ་ངུ་ངག་ལམ་ནས་བགྲང་བའི་འཕྲིན།།
ཆད་མེད་གདོང་བཞིའི་གཎྜིའི་སྒྲ་བཞིན་བདག་གི་རྣ་བར་ལྡིར་བར་མཛོད།།
 
གལ་ཏེ་བདག་ཀྱང་མཁའ་མཐར་སྐྱོད་པའི་སྤྲིན་དཀར་འདབ་མ་ཞིག་ཡིན་ན།།
རང་དབང་ཡན་པོའི་རླུང་ལ་ཞོན་ནས་བསིལ་ལྡན་ལྷ་ཡི་ཞིང་ཁམས་ན།།
དལ་བབས་ལེགས་སྐྱེས་སྤྲིན་གྱི་མེ་ཏོག་དལ་བུར་དལ་བུར་འཇོ་དང་ལྷན།།
སྒྲ་ལྡན་དབྱར་གྱི་རྔ་ཆེན་ལྡིར་བཞིན་གངས་དཀར་ལྷ་མོའི་མགུལ་ནས་འཁྱུད།།
 
དྲིན་ཅན་ཨ་མའི་ཞལ་རས་མཇལ་ནས་སྐྱིད་སྡུག་གཏམ་གྱི་སྒོ་འཕར་འབྱེད།།
ལྟ་ན་སྡུག་པའི་རང་གི་ཡུལ་ལྗོངས་ཚངས་པའི་འཇིག་རྟེན་ལ་བསྒྱུར་ཏེ།།
དབང་ཕྱོཊ་དགྲ་སྡེ་དམར་པོའི་མེ་རླབས་དམིཊ་མེད་ཆིལ་ཆིལ་བསད་དང་ལྷན།།
རྫོགས་ལྡན་གསར་པའི་ཞི་བའི་བླ་རེ་ཀུན་གསལ་དབྱིངས་སུ་ཅེས་མི་བྲེན།།
 
དྲིན་ཅན་ཨ་མ་དྲན་པའི་གདུང་དབྱངས་སྤྲིན་པའི་འགུལ་ལ་བཏགས་པ་འདི།།
རྒྱ་གར་ལྷོ་ཕྱོགས་རྒྱ་མཚོའི་ཉེ་འགྲམ་གྲོང་ཁྱེར་ཆེན་པོ་གྷོ་ཝ་ནས།།
ངེས་མེད་རྒྱལ་ཁམས་ཁྱི་བཞིན་ཉུལ་པའི་ཉམས་ཆུང་གྲྭ་རྐྱང་སྨྱུག་ཐོཊ་པ།།
འཇིགས་མེད་མིང་པས་དལ་བུར་བྲིས་ཏེ་རང་གི་ཕ་སའི་ཕྱོགས་སུ་བཏང༌།། 
 
           ཞེས་པ་འདི་ནི་རྒྱ་གར་ལྷོ་ཕྱོགས་རྒྱ་མཚོའི་ཉེ་འགྲམ་གྲོང་ཁྱེར་གྷོ་ཝ་ལ་སྤྲོ་འཁྱམས་འགྲོ་སྐབས། དགའ་སྡུག་འདྲེས་མའི་ཚོར་སྣང་མང་པོ་ཞིག་གིས་གནོན་ཐབས་མེད་པའི་ཨ་མ་དྲན་གདུང་གི་འཕྲིན་འདི།  ངེས་མེད་ས་མཐར་ཁྱི་བཞིན་ཉུལ་པའི་ཉམ་ཆུང་སྤྲང་འཁྱམས་སྨྱུག་ཐོགས་པ་འཇིགས་མེད་ཀྱིས།སྤྱི་ལོ་༡༩༩༦།༤།༥



 

རྩོམ་ཁུངས། ངེད་དྲ་བ།