མཛེས་སྡུག་གིས་འཚེར་བའི་མེས་པོ་ཚོའི་མཛད་རྗེས
དེ་རིང་ལོ་རྒྱུས་ཀྱི་རྡོ་རིང་ངོས་སུ་ཁྲག་མདོག་གིས་གྲུབ་དུས
ངའི་ཕྱི་ནང་ཡོད་ཚད་ཟུག་གཟེར་གྱིས་སྒུལ་གྱིན་འདུག

ལ་རྒྱ་དང་སྤོབས་སེམས་ཀྱིས་བརྟས་པའི་མེས་པོ་ཚོ་དྲན་དུས
ཁེར་རྐྱང་གི་ཕམ་ཁའི་ཀློང་ན་ཞེ་སྡང་གི་སོ་སྒྲ་འཆའ་བཞིན
གསོན་ངོགས་ན་ཡོད་པའི་གཉོམ་ཆུང་གི་ཚེ་སྲོག་འདི
བདེན་དོན་དང་ཤ་འཁོན་གྱི་ཆེད་དུ་སྦྱིན་སྲེག་བྱས་ན་སྙམ

ངོ་མཚར་གྱི་དག་ཞིང་དུ་འབོད་པའི་ཡུལ་གྲུ་རེ་ན
སྟོན་ཁའི་སྡོང་ལོ་བཞིན་འཐོར་བའི་སྤུན་ཟླ་ཚོ་དྲན་དུས
བཙན་འཛུལ་དང་གཉའ་གནོན་གྱི་མུན་ནག་ཀློང་ན
དཔའ་བོ་ཞིག་གི་རྣམ་ཐར་སྐྱོང་བཞིན
མུན་ནག་གི་ཁོར་ཡུག་འདི    མེ་ལ་བསྒྲོན་ན་འདོད

གཡོ་སྒྱུ་དང་ཧམ་སེམས་ཀྱི་རླུང་འཚུབ་ཁྲོད་ན
ངའི་ཚེ་སྲོག་གི་གསོན་ཤུགས་མ་ཉམས་བར
གསེར་མདོག་གིས་འཚེར་བའི་མེས་པོ་ཚོའི་མཛད་རྗེས
སེམས་ཀྱི་གཏིང་ན་ནམ་ཡང་ཡལ་མི་སྲིད
                 ༢༠༠༨    ༡༠  ༢༢ ཉིན།

རྩོམ་ཁུངས། ངེད་དྲ་བ།