གློ་རྡེག་ལ་འཕྱུར་བའི་རྒྱ་མཚོའི་རྦ་རླབས་ཀྱི་རྩེ་ན

ཉི་འོད་འཛར་བའི་ཤེས་རབ་ཀྱི་ཆུ་ཟིལ་དེ

འཇིག་རྟེན་དང་འབྲེལ་བའི་ཐ་གུ་དམར་པོ་ཞིག

ལག་པ་ཅི་ཞིག་གིས་འཐེན་ཡང་དུས་ཚོད་ཀྱི་ཁོང་དུ་ཟགས་འགྲོ

ཁོད་ཡངས་པའི་བརྩེ་བ་དེས་བསམས་ན

རྟག་པར་བྲང་ངོས་སུ་འབྱར་བའི་བ་སྤུ་ཇི་བཞིན

ཕར་ཡོམ་ཚུར་ཡོམ་གྱི་ངང་དུ་གསོན་གྱིན་ཡོད

རྟག་པར་བདེན་ཡང་ཆོག་ལ་རྫུན་ཡང་ཆོག་པའི་རྣ་བ་འདི

ཁྱོད་ཀྱི་ཆེད་དུ་ཀེར་གྱིས་ལངས་པའི་དུས་ཚིགས་སུ

གློག་དམར་བཞིན་འཁྱུག་པའི་མི་རྟག་པ་དེས

ང་ལ་ཞེད་སྣང་དྲག་པོ་བསྩལ་ཀྱང

རི་བོ་འདིའི་ཕ་རོལ་གྱི་རི་བོ་དག་གིས

མཚོ་མོ་འདིའི་ཕ་རོལ་གྱི་མཚོ་མོ་དག་གིས

ང་ལ་རྔུལ་ཁྲག་ལྟ་བུའི་ཤེས་རབ་བྱིན་ཅིང

ཉི་མ་ལྟ་བུའི་མིག་ཟུང་བྱིན་ཡོད

རས་ཡོལ་སྟུག་པོ་དེ་ཕར་བསལ་བའི་དུས་སུ

མེ་ལོང་གི་དབུས་ན་ང་ཡི་བརྩེ་བ་འགུལ་ཅིང

གསེར་གྱི་སྒྲུབ་ཕུག་བཞིན་མཛེས་པའི་སྙིང་གི་དཀྱིལ་ན

སྒྱུ་མ་ལྟར་འཆར་ཞིང་སྒྱུ་མ་བཞིན་ཡལ་བའི་མི་ཚེ་ནི

སྲོག་གི་ཉག་ཐག་ཕྲ་མོ་དེ་དང་སྦྲེལ་ནས་ཡོད

ཤུགས་དང་ཅར་གྱིས་མནན་པའི་ཉིན་མཚན་དག་ལ

ངའི་ཕོར་ཁ་ན་ལུད་པའི་སྐར་མ་རེ་རེ་ནི

ཁྱོད་ཀྱི་ནམ་མཁའ་དེའི་འོད་ཟེར་ཡིན་ཞིང

ཡང་ན ཆར་བ་བབས་ཤུལ་གྱི་འཇའ་ཚོན་ཡིན

རི་རྩེ་ན་འཁྲིལ་བའི་སྨུག་པ་བན་བུན་དགུང་དུ་ཡལ་རྗེས

ང་ནི་ཐག་རིང་ལ་ཆས་པའི་སྤྲིན་པ་དེ་ཡིན་ནམ

ཁུ་སིམ་མེར་མེ་ཏོག་གི་གྲིབ་བསིལ་དུ་བསྐུངས་པའི་བུང་བ་ཡིན

སེན་བཏོགས་ཙམ་གྱིས་དཀྲོགས་འགྲོ་བའི་ཉི་མ་འདི་དག་ལ

རྭ་ཅོ་གཡུག་གཡུག་བྱེད་པའི་འབྲོང་རྒོད་ཚོའི་གཤར་ལམ་ན

རས་ཡོལ་ཁྲ་ཁྲ་ཞིག་དང་འཁྲུལ་འགྲོ་བའི་དུས་ཚོད་ཀྱིས

ཡོངས་སུ་བཏུལ་ཅིང་སྨིན་པའི་གཡུང་མོ་བ་ག་ཙམ་བསླུས་འདུག

འཇིགས་སྣང་གི་གློག་བརྙན་སེར་པོ་དེ་དང་འདྲ་བར

ཤ་པགས་ཀྱི་གསེབ་ན་འཕག་འཚག་བྱེད་གྱིན

གཏན་ཚིགས་ཀྱིས་གཅུན་པའི་དབུགས་རྒོད་འདི

ག་དུས་ཤིག་ལ་གཙང་བོ་ཞིག་ཏུ་གྱུར་ནས

ཤང་ཤང་འབབ་པའི་གླུ་སྒྲ་དེ་སྙན་ངག་ཅིག་ཏུ་གྱུར་ན

ཁྱོད་ཀྱི་མིག་གི་སྐོམ་པ་མཐའ་དག་སེལ་ངེས

ཉི་འོད་མེད་སའི་མུན་པ་དེ་ནི་ཁྱོད་ཀྱི་སྐད་ཆ་ཡིན་ཞིང

དུག་སྦྲང་གི་གཤོག་པ་ལྷུང་སའི་བར་སྣང་ནི་ངའི་རྣ་བ་ཡིན

རིམ་གྱིས་རིམ་གྱིས  ཡུན་གྱིས་ཡུན་གྱིས

ཁྱོད་ཀྱི་ཁ་གཏད་དུ་འགྲེངས་ནས་བལྟས་ན

ཤམ་གོས་ནག་པོ་གྱོན་པ་ལྟ་བུའི་འུ་གཉིས་ཀྱི་བར་ཐག་ན

རྒྱ་ཆད་ཅིང་ཕྱོགས་སུ་ལྷུང་བའི་རྡོ་བ་ལེབ་མོ་ཞིག

བསྒུལ་ཀྱང་སྒུལ་མི་ཐུབ་པའི་གཏིང་སར་བྱིངས་ཚར་བས

ང་ལ་སྒོ་མོ་ཟེར་བ་ཞིག་གཏན་ནས་མེད་འགྲོ

ཉིན་འགའི་སྔོན་ལ  ཁྱོད་ཀྱི

ཤ་ཚིལ་དང་སྙིང་ཚིལ་ཁུར་བའི་བརྡ་འཕྲིན་དེ་ཡིས

འཇིག་རྟེན་གཅེར་བུར་ཕུད་ཅིང

དམར་ཧྲེང་ཧྲེང་གི་སྐྱེས་དངོས་ཡོད་ཚད་ཀྱི་མཛེས་པ་ནི

ངའི་སེམས་སུ་བླུགས་ནས་རི་མོ་མང་པོ་འབྲི་དུས

ང་ཡི་རྟོག་ངོར་དུག་སྦྲུལ་ཞིག་གིས་མཇུག་མ་གཡོབ་གིན་འོང

སྔས་འབོལ་གྱི་སྟེང་ན་མངོན་པའི་མྱ་ངམ་ཐང་དེ

འགྲམ་པའི་དཀྱིལ་ལ་ལྷན་པ་བཞིན་འབྱར་ནས

མི་རབས་མང་པོའི་སེམས་ཆུ་ཁོང་དུ་བྱེར་ཅིང

ལོགས་སུ་སྐྱེས་པའི་ལྗོན་པ་དང་དེའི་ལྗང་མདོག་ལ་བལྟས་ཏེ

དབང་པོ་ལྔས་གཙུབ་བརྡར་གྱི་རིམ་པ་ཐ་གུ་ལྟར་བསྒྲིལ

ས་སྲོད་དང་ཞོགས་པ་དག་ནི་ཐག་ཁུག་གཅིག་ཏུ་སྣང་ཞིང

ཐག་སྣེ་རབ་རིབ་དང་ལྗན་ལྗིན་གྱིས་ཁེབས་པའི་རྨི་ལམ་འདི་ན

ང་ལ་མེས་པོ་ཡོད  ང་ལ་དཀོན་མཆོག་ཡོད

ད་དུང  དུས་ཚོད་ཁ་ཤོས་དང་དེ་ཡི་ནང་དུ

ཀུན་རྫོབ་ཀྱི་ཐ་སྙད་དག་ཁྲག་ལ་བསྒྲེས་པའི་སྟོང་པ་ཉིད་དེ་ཡོད་པས

ང་ནི་གཞི་ནས་ཧྲུལ་བོར་གྱུར་ཞིང

ཁ་ནང་དུ་ཕྱོགས་པའི་རིག་པ་ཀུན་ངུ་བྲོ་བའི་དབྱིངས་སུ་འཐིམས་

རྩོམ་ཁུངས། ངེད་དྲ་བ།