---ཡང་ན་བཅུ་བའི་ཚེས་གཅིག་ལ

སྒེའུ་ཁུང་ཕྱི་ནང་སྨུག་པ་ཡིན
སྨུག་པའི་ཕྱི་ནང་རླངས་བ་ཡིན
རླངས་བའི་ཕྱི་ནང་དུད་པ་ཡིན
ཁྱོད་ཀྱིས་གཤོག་པ་བཏེགས་ནས་
ཇི་འདྲ་འཕུར་ཀྱང
འབུ་ཡོལ་འདིའམ
འབུ་ཡོལ་ལྟ་བུའི་སྨུག་པ་དང
རླངས་བ་དང  དུད་པ་ལས་བརྒལ་ཐབས་མེད

ནམ་མཁའ་སྔོན་པོ་མ་ཡིན་པར་མི་ལོ་མང་པོ་ཕྱིན་ཚར
ཐལ་སྐྱའི་ངོ་གདོང་དེ་ནི་མི་ཡུལ་གྱི་སྡུག་སྨྲེ་དག
ཐལ་བ་རུ་བཏབ་པ་ཡིན
ཁྱོད་ཀྱིས་དེ་ལ་ཁྲག་གི་ཚོས་ཀྱིས
དམར་ཐིག་གཅིག་ཕབ་ཅིང་
མིང་ལའང་“高原红”འདོགས་སྲིད་མོད
འཛུམ་མདངས་རེངས་བོ་ཞིག་ཐོབ་པར་ག་ལ་སྲིད

འཇིག་རྟེན་ན་ད་ནི་ཁ་དོག་རིགས་གཉིས་ལས་མེད་སྟེ
གཅིག་ནི་མགོ་བོའི་ཁ་མདོག་སྒྱུར་བྱེད་ཀྱི་ཁྲག་དམར་དང
གཅིག་ནི་ལག་པའི་ཕྱི་ནང་མཚོན་བྱེད་ཀྱི་ཐལ་སྐྱ་ཡིན

རྒྱང་རིང་རྒྱང་རིང་གི་ཐང་ཆེན་ཞིག་ན
མི་གྲངས་ཁྲི་ཕྲག་གིས་ཀླད་པ་ཐུན་མོང་ཞིག་ཐོབ་པར་
ནམ་མཁའ་ལ་བཀའ་དྲིན་ཞུ་ཆེད་
རྨིག་པ་ཁྲི་ཕྲག་གི་རྡོག་སྒྲ་གཅིག་ལ་ཉན་བཞིན་ཡོད 

ངས་ནི་བརྙན་འཕྲིན་ལས་ཅི་ཞིག་མཐོང་བར་དོགས་ནས
མལ་ཁྲི་གཡར་མ་འདི་ནས
མགོ་བོ་ཤེད་ཀྱིས་བཏུམ་ཡོད
སྲིང་བལ་གསེང་ནས་གླུ་དབྱངས་དམར་ནག་གྲགས་ཡོང
ཡང་ན་སྤྱང་ཀི་བཞིན་ངུ་ཟུག་བྱེད་པའི་གཞོན་ནུ་དེ་གྲགས་ཡོང་
ཁོས་ཀྱང་དམར་ནག་གི་ཁ་གདངས་ནས་ཀུན་ལ་ཧད་ཡོད་སྲིད

ཤི་རེ་ཁོ
ཆམ་པ་ཞིག་ཕོག་ཡོད་ན
བདག་གིས་དེ་ལ་ཁ་གཡར་ནས་སྣ་སྦྲིད་བྱས་ཆོག་ལ་
མཚམས་མེད་པར་གློ་ལུ་བརྒྱབས་མཐར
ཁ་སང་རླངས་འཁོར་ཀྱིས་སྦྱིན་པའི་དུད་དྲེག་
ལུད་པ་རུ་བསྐྱུར་ཆོག

ཤི་རེ་ཁོ
ཆམ་པ་ཞིག་ཕོག་ཡོད་ན་
བདག་གིས་སྣབས་དང་ཁ་ཆུ
མིག་ཆུ་བཅས་མཉམ་པོར་འདྲེས་བཞིན
ཁྱོད་ཀྱི་སྐྱེས་སྐར་ལ་དགའ་སྣང་མཚོན་ཆོག
                                    2005．10．5

རྩོམ་ཁུངས། ངེད་དྲ་བ།