མིག་ཆུ་དང་སྙན་ངག་གི་མཆོད་པ།
_____ཡུལ་ཤུལ་ས་འགུལ་ཁྲོད་རྐྱེན་ལམ་དུ་ཤོར་བའི་སྤུན་ཟླ་ཡོངས་ལ་མྱ་ངན་དུ།
སྙིང་རྗེ་བྲལ་བའི་རང་བྱུང་གི་གནོད་སྐྱོན་ཚབས་ཆེན་དེས།
ཡིད་ཆེས་དང་རེ་བས་གཏམས་པའི་ཚེ་སྲོག་གྲངས་མེད་ཀྱི་དབུགས་རྒྱུན་བཅད་སོང་། རྨི་ལམ་འཕྲོག་སོང་།
ལྗང་མྱུག་ལྟ་བུའི་གཞོན་སྐྱེས་གང་མང་ཞིག་གིས་ཕ་གཞིས་བརླག་སོང་། ཕ་མ་བགྲོང་སོང་།
སྐྱེ་འཆིའི་ལས་དབང་ལ་བཟློག་ཐབས་མེད་པ་ཆོས་ཉིད་དུ་ངེས་ཀྱང་།
སྤུན་ཟླའི་བརྩེ་སེམས་ལ་ནམ་ཡང་འགྱུར་བ་ཡོད་མི་སྲིད།
ང་ཚོས་སེམས་ཀྱིས་བྲིས་པའི་སྙན་ངག་དང་སྨོན་པ་ལྷ་ལ་བསྐུར་ནས།
འདས་པོར་བར་དོའི་འཕྲང་ལམ་ན་འཇིགས་སྐྲག་མེད་པའི་སྐྱབས་འཇུག་ཞུ།
ང་ཚོས་རེ་བས་འཛུམ་པའི་བྱམས་སེམས་ལག་རྡང་གཅིག་ཏུ་སྤྲེལ་ནས།
གསོན་པོར་བདེ་སྐྱིད་ཁྱིམ་གཞི་ཞིག་འཛུགས་པར་མཉམ་དུ་ཧུར་བརྩོན་བྱེད།
ཡིད་མ་ཕམ། བུ་དཔའ་པོའི་གཡུལ་ཤུལ་དུ་གྲགས་པའི་གདོང་དམར་བའི་བུ་རྒྱུད།
མི་སེམས་མཐུན་ན་འབྱུང་འགྱུར་ལ་མདུན་ལམ་ཡོད། མཐུན་སྒྲིལ་འཛོམས་ན་ལས་དོན་ལ་སྟོབས་ཤུགས་ཡོད།
༢༠༡༠ལོའི་ཟླ་བཞི་བར་ཀན་ལྷོ་ནས།
རྩོམ་ཁུངས། ངེད་དྲ་བ།