འཇགས་སྐྱ་ལྟར་གཟེངས་བའི་དབུ་ལོ་དེའི་འོག་ན།
ཤིང་ལོ་སྐམ་པོ་ཞིག་གི་མཐུག་སྲབ་ལས་མེད་པའི་ཁྱེད་ཀྱི་སྐུ་ལུས།
ལྟོ་བ་དང་སྒལ་ཚིགས་ཀྱི་རི་མོ་མཉམ་དུ་གསལ་བའི་ཁྱེད་ཀྱི་ཟོ་དབྱིབས།
སྐུ་ལུས་ལ་ཕྱི་ནང་མེད་ཅིང་སྐུ་གཟུགས་ལ་རྒྱབ་མདུན་མེད་པའི་ཁྱེད་རང།
རང་བྱུང་ཁམས་ཆེན་པོ་སྒུལ་བའི་གླུ་སྐད་དེའི་བདག་པོར་ཇི་ལྟར་བཞེངས་པ་ཡིན།
བར་སྣང་གཤགས་པའི་གླུ་སྐད་མཐོན་པོ་དེ།
ས་ཆེན་གཡོ་བའི་གདངས་དབྱངས་རྔམ་བརྗིད་དེ།
ཁྱེད་ཀྱི་རུས་གསེང་དང་རྩ་ལམ་གང་ཞིག་ནས་མཆེད་ཡོང་བ་ཡིན་ནམ།
མ་རེད་་་་་་་ཁྱེད་ཀྱིས་རང་ལུས་བསྲབ་མོ་ཤོག་བུར་བསྒྱུར་ཞིང་།
ཡན་ལག་ཕྲ་མོ་སྨྱུ་གུར་བཅོས་ནས།
འཇིག་རྟེན་པ་རྣམས་ཀྱིས་མཐོང་མ་མྱོང་བའི་སྙན་ངག་ཅིག་བརྩམས་པ་རེད།
མ་རེད་་་་་ཁྱེད་ཀྱིས་རང་ལུས་སྐམ་པོ་པི་ཝང་གི་དབྱིབས་སུ་བསྒྱུར་ཞིང།
སྐྲ་ལོ་རིང་པོ་རྒྱུད་དྲུག་གི་ཟོལ་གྱིས་འཕྱངས་ཏེ།
སུས་ཀྱང་ཐོས་མ་མྱོང་བའི་རོལ་དབྱངས་ཤིག་རྒྱང་འཐེན་གནང་པ་རེད།
རེད་་་་ངོ་མ་རེད་་་་་་་ཁྱེད་ནི་འབྲི་མི་དགོས་པའི་སྙན་ངག་གི་གླེགས་བམ་དེ་ཡིན་འདུག
ཁྱེད་ནི་དཀྲོལ་མི་དགོས་པའི་རྒྱུད་དྲུག་གི་རོལ་ཆ་དེ་རེད་འདུག

རྩོམ་ཁུངས། ངེད་དྲ་བ།