ལུས་ཀྱིས་ཐེགས་པའི་ཁུར་བོ་སེམས་ཀྱིས་མི་ཐེགས །།

སེམས་པ་ཤོང་བའི་གནས་ལ་ལུས་པོ་མི་ཤོང་ །།

རང་ལ་འཚམ་པའི་གནས་ཤིག་འཚོལ་བར་བྲེལ་དུས །།

འཇིག་རྟེན་ཁམས་ནས་བདེ་མོའི་ལམ་ཞིག་རྙེད་ཐལ །།

ཁ་རྒྱབ་ལྟོ་ལ་སྲེད་པའི་གོམས་སྲོལ་འདི་ལ །།

རྒྱབ་ཀྱིས་ཕྱོགས་ནས་ཏིང་འཛིན་སྒོམ་ལ་མི་ཞུགས །།

 རོ་དྲུག་ཉམས་སུ་མྱོང་བའི་བདེ་སྣང་ཞིག་གིས །།

འཁོར་བའི་གནས་ལ་ལྷག་ཏུ་དུང་བ་སྐྱེས་སོང་ །།

ཚེ་གཅིག་འགྲོགས་རོགས་ཁྱིམ་གྱི་ཆུང་མ་ཞིག་ལ །།

ལུས་པོ་བརླན་ནས་ཡུན་རིང་སྡོད་དགོས་བྱུང་ཡང་ །།

སེམས་ཀྱིས་དམིགས་པ་བཟུང་བའི་རྒྱལ་ཁམས་གྲུ་བཞིར །།

གོམ་བགྲོད་ཐེངས་ཤིག་བྱེད་པའི་འདུན་པ་བཅངས་ཡོད  །།

སྣང་བ་སྐྱིད་པོའི་འཚོ་བར་ཁ་དོག་མི་འདུག །

གོམ་པས་གཞལ་བར་བྱེད་པའི་ལམ་ཁ་ཞིག་ལ །།

སེམས་ཀྱིས་སྟ་གོན་བྱེད་པའི་ཆོ་ག་བསྒྲིགས་ན །།

བཙན་པོས་བཀའ་རྒྱ་གཏོང་བར་དོགས་པ་སྐྱེས་འོང་ །།

མི་ཚོགས་འཚང་ཁ་བྱེད་པའི་གྲོང་ཁྱེར་ཞིག་ནས །།

གཅིག་པུར་ལུས་པའི་ངལ་བ་བཟོད་པར་ནུས་ཀྱང་ །།

བཙན་པོས་འགྲམ་ལྕགགས་གཞུས་པའི་ཚ་ཁོལ་ན་ཁོལ །།

གསང་བར་སྦེད་དགོས་བྱུང་བ་ཇི་ལྟར་བཟོད་ཐུབ  །།

ཁ་ཡག་ངོ་བསྟོད་བྱེད་པའི་གྲོགས་པོ་དག་ལ །།

ཡུན་རིང་འགྲོགས་པའི་བརྩེ་བའི་འདུན་པ་མི་འདུག །

ཁྱོད་བཟང་ང་བཟང་འགྲོ་བའི་གོམས་སྲོལ་འདི་ཡིས །།

སེམས་ཀྱི་གཏིང་ལ་མི་བཟོད་ན་ཟུག་བྱིན་སོང་  །།

ཕ་ཡུལ་ལུང་གཤོང་དམར་བོའི་ཁུག་སོ་ཞིག་ནས །།

ཀི་ཞིག་བཏབ་པ་གཞན་གྱི་སེམས་ལ་གནོད་ཐལ  །།

ཨ་ཕོས་རྡོག་པས་གནོན་པའི་ལ་དང་ལུང་བ །།

ཁུ་སིམ་སིམ་གྱིས་རྨི་ལམ་གཏོང་ས་མ་རེད   །།

གཞན་གྱི་རྗེས་ཤུལ་འདེད་པའི་རྒད་པོ་དག་ལ །།

མིག་དཔེ་བལྟས་ཏེ་འགྲོ་འདོད་བདག་ལ་མི་འདུག །

རང་གིས་རྙེད་པའི་སེམས་ཀྱི་རྒྱལ་ཁམས་ཤིག་ནས །།

གོམ་བགྲོད་བྱེད་པའི་སྟ་གོན་སྔར་ནས་བསྒྲིགས་ཡོད །།

མི་བཟོད་ལུས་ཀྱིས་བཏེགས་པའི་ངལ་བ་འདི་ལ །།

འོ་དོད་འཐེན་ནས་དག་སེལ་བྱེད་ཐབས་མི་འདུག །

རྩོལ་བས་སྒྲུབ་པའི་ལམ་གྱི་མཛེས་སྡུག་བསམ་ན །།

གྲག་མེད་འགུལ་མེད་འཆི་བར་དགའ་བོ་མི་འདུག །

ཁྱོད་ཀྱིས་བཞེངས་པའི་ཕོ་བྲང་མཛེས་པོ་དེ་ལ །།

སེམས་ལ་མཁོ་བའི་ལོངས་སྤྱོད་ཏིལ་ཙམ་མི་འདུག །

བདག་གིས་བརྩིགས་པའི་སྤྱིལ་བུ་ལེབ་མོའི་ནང་ན །།

ཉིད་ཀྱིས་བདེ་དགའ་མྱོང་བའི་དགའ་མ་ཞིག་ཡོད །།

རྩོམ་ཁུངས། ངེད་དྲ་བ།