ནམ་རྒྱུན།
ཟང་ཟིང་འཁྲིགས་པའི་གྲོང་ཁྱེར་འདིར།
ཆར་བ་རྟག་པར་འབབ་ཅིང་།
ཆར་བ་འབབ་ཐེངས་རེ་རེར།
ལྗོན་ཤིང་གི་ལོ་མ་རྣམས་དག་ཅིང་གཙང་བའི་སྙན་ངག་རེ་རེར་འགྱུར་འགྲོ།
མི་རྣམས་ཀྱི་སེམས་ཁམས་ཀྱང་ལྷོད་ཅིང་བདེ་བའི་ཚོར་བ་ཡིས་ཟིན་འགྲོ

དེ་དུས།
སྨུག་སྤྲིན་བན་བུན་གྱིས་མཚོ་དང་མཚེའུའི་འགྲམ་ངོགས་ཁེབས་ཤིང་། 
འདམ་རྩྭའི་ཁྲོད་དུ་ངང་ངུར་ཆགས་པས་གཟིར་བའི་འཁུན་སྒྲ་ཡང་ཐོས་ཐུབ།  

དེ་རིང་།
གནམ་གཤིས་གྲང་ཞིང་རླུང་བུ་ལྡང་།
སྤྲིན་པ་སྟུག་ཅིང་མི་སེམས་སྐྱོ།
ལས་ཀ་ཤོར་བའི་མི་ཚོགས།
འོད་མདངས་ཉམས་པའི་མིག་ཟུང་།
ལོ་འདབ་གཅིག་ཀྱང་མེད་པའི་ཤིང་སྡོང་གི་འཇིག་རྟེན།
རོལ་མོ་བ་དང་སྙན་ངག་པ་དག་ཀྱང་།
གཙང་འགྲམ་དེར་གཅེར་བུར་འདུས་ནས།
སེམས་ཁོང་གི་སྡུག་གཏམ་དག་གླུ་རུ་གྱེར་ཅིང་ཤོག་བུར་བསྟིམས།

རླུང་བུའི་ཁྲོད་དུ།
ཆར་བའི་ཀློང་དུ།
མི་སེམས་སྨྲེང་བའི་གཟུགས་མེད་ཀྱི་ཚོར་བའི་ན་བུན།
མི་སྲོག་གཅོད་པའི་སྐྱོ་གདུང་གི་དུག་ཚེར་རྣོན་པོ།
རེ་རེ་བཞིན། ག་ལེར།
ཆར་བའི་འགྲོས་དང་བསྡོངས་ནས།
རྒྱ་མཚོ་དང་རི་ཚོགས།
ནགས་ཀློང་དང་གྲོང་ཁྱེར་སོགས།
རབ་རིབ་ཡོད་ཚད་བརྒལ་ནས།
ཚེ་སྲོག་གི་མཐའ་མཇུག་བར་དུ།
ཡང་སྐྱར། ཡང་སྐྱར།
གཏིང་ཟབ་པའི་ནམ་མཁའ་ནས་འབབ་ཀྱིན་འདུག

རྩོམ་ཁུངས། ངེད་དྲ་བ།