ཨ་མ་ལགས།  ཁ་སང་ང་རང་ཚོ་ཁྱེད་དང་ལྷན་དུ་ཨ་ཕའི་འཛུམ་མདངས་ན་འཚོ་དུས།འུ་ཅག་གི་ཤ་ཉེ་ཚོའི་གླུ་སྐད་སྙན་མོ་རི་ལུང་ལ་ཁྱབ་ཅིང་།དུང་སེམས་དང་གཅིག་ཏུ་བསྲེས་པའི་འདུན་པ་རྩྭ་ཐང་གི་སྦྲ་ནག་དང་མཉམ་དུ་བཅོལ་ཡོད།དེ་དུས་ངའི་ཁ་ནི་ཟས་སྦྲང་དཀར་རྩམ་པ་ཡིན་ལ།རྩེད་རོགས་ནི་ལུ་གུ་ཆུང་ཆུང་དང་བེའུ་རོག་རོག་ཡིན།གཡུ་ལོ་ཐང་ལ་བཀྲམ་པའི་མེ་ཏོག་གི་ན་གཞུང་དེ་ན།ང་ཚོ་སྤྲོ་སེང་ངེ།དབེན་འཇགས་སེ།ཡོད་ཚད་ནས་ཡོད་ཚད་མཚོན་པའི་ཕ་གཞིས་ན་རོལ་བ་ནི་བདེ་སྐྱིད་ཀྱི་འཚོ་བ་དེ་ཡིན།ཨ་མ་ལགས།ང་འདི་ལྟར་འཚོ་དགོས་པ་སུ་ཞིག་གིས་བཀོད་སྒྲིག་ཡིན།

   ཨ་མ་ལགས།དེ་རིང་ང་རང་ཚོའི་ཕ་གཞིས་དྲོད་མོ་འདི་ས་ཆེན་པོའི་འཇིག་སྐུལ་འོགཁྱོད་ནི་ཁྱོད་ཀྱི་གནས་ན།ང་ནི་ང་ཡི་ས་ན།སྐབས་འགར་ངུ་ངག་གི་རླུང་རྟ་བསྐྱོད་ནས།ལན་རེར་གྲང་རླུང་གི་ངར་ཤུགས་འོག་ཁྱེད་དང་ང་ཡི་སེམས་པར་འགྲམ་ལྕག་གིས་གཞུས་ཤིང་།འབྱུང་བཞིའི་གནོད་སེམས་དང་དྲན་གདུང་སྐྱུར་མོའི་འབོད་པ་དེ།འུར་ཟང་ཟིང་།འཚང་ཤིག་ཤིག   ཡོད་ཚད་ནས་ཡོད་ཚད་མཚོན་པ་དེ་ཁེར་རྐྱང་དང་ཁྱེད་རང་ཚོར་འབོད་པ་གཏོང་བའི་སྨེང་གླུ་དེ་ཡིན།ཨ་མ་ལགས།ང་རང་འདི་ལྟར་འདུག་དགོས་པ་སུ་ཞིག་གིས་བཀོད་སྒྲིག་ཡིན།་
     
       ཨ་མ་ལགས།སང་ཉིན་ཁྱེད་རང་མེད་ས་ན་ཆུང་དུས་ཀྱི་གླུ་སྐད་སྙན་མོ་སྔ་ས་ནས་འགག་ལ།བྱིས་པའི་གནའ་གཏམ་དང་ཀ་ཁའི་ཀློག་གདངས་ན་མེ་ཏོག་གི་རྩེད་རོགས་ཚོ་ཡང་དེ་བཞིན་སྙོམ་པས།ང་རང་ཧ་ཅང་སུན་སྣང་གིས་གཙེས།སུན་ཐེངས་རེར་ངས་ཁ་སང་གི་རྩྭ་ཐང་དྲན་ལ།ཁྱེད་རང་ནི་དེ་ལས་ཀྱང་སྨོས་མ་དགོས།སྐྱོ་བ་དང་དུང་སེམས་གཅིག་ཏུ་འདྲེས་པའི་དུས་དེ་ལ་
ཁྱེད་ཀྱིས་བཤད་པའི་བྱིས་སྒྲུང་དང་ལུ་གུའི་འབའ་སྒྲ བེའུ་ངུར་སྒྲ་ནི་ངའི་མི་ཚེའི་བདེ་སྡུག་གི་ལག་རྟེན་ཡིན།ཨ་མ་ལགས།ང་རང་འདི་ལྟར་བསྐྱོད་དགོས་པ་སུ་ཞིག་གིས་བཀོད་སྒྲིག་ཡིན། ཨ་མ་ལགས།

རྩོམ་ཁུངས། ངེད་དྲ་བ།