ངའི་མེས་པོ་ཚོས་

སྦྲ་ནག་གི་རྒྱུ་སྤུན་གྱིས

ཁ་བ་དང་གྲང་ངར་བསེད་ལ

ཕྱི་རོལ་གྱི་སྐད་དང་ནང་གི་གཏམ་བཀག

དེ་ནས་ལོ་དང་ཟླ་བ་དག་ཁ་ཚབ་གྱི་ཉིན་སྲིབ་ནས་བསྐྱལ

ངའི་མེས་པོ་ཚོས

ནོར་ནག་གི་ཤ་དྲོད་དག

སྤྱི་གཙུག་ལ་ཐུར་དུ་སྦུབས་ནས

སྐར་ཚོགས་དག་ལྷུང་ལ་ཉེ་བའི་འཇིག་པ་བཀག

དེ་ནས་བུ་རབས་ཚ་རྒྱུད་ཀྱིས་ང་རྒྱལ་དག་ལག་པའི་རི་མོར་བྲིས

ངའི་མེས་པོ་ཚོ

འདི་ལྟར་དེ་རིང་བར་ཡོང་བས

བདག་གིས་མི་ཚེ་གཅིག་གི་སྐྱིད་སྡུག་ཡོད་ཚད

ཁང་གོག་གཅིག་ལ་བཀལ་ནས་དེ་ཉིད་གསོ་མི་འདོད་

དེ་བས་ང་ལ་ཁང་བ་མི་དགོས་ལ་ཟྭ་དང་ལྡེ་མིག་ཀྱང་མི་དགོས

ང་ལ་རླུང་དང་ཁ་བ་མགྲོན་པོར་ཡོང་ཐུབ་པའི་མགོ་སྦྲ་སྨུག་ཆུང་གཅིག་གིས་འཐུས

                                    2010-4-8

རྩོམ་ཁུངས། ངེད་དྲ་བ།