ཀེང་རུས་ལྟ་བུའི་སྨྱུག་གུ་དེས་བཟོད་སྒོམ་ལ་སྐྱབས་བཅོལ་བ་ནས་བཟུང་

ཤམ་ཤམ་འཇོ་བའི་མིག་ཆུས་ས་ཆེན་གྱི་རུས་པ་དཀར་པོ་ནག་པོར་བཟོས་སོང

མིག་ཆུ་དེ་ནི་སུའི་ཆེད་དུ་བཞུར་བའང་མིན་ཏེ

མིག་ཆུ་དེ་ནི་དོན་ཀྱིས་མིག་ཆུ་ཁོ་ནའི་ཆེད་དུ་བཞུར་བའོ

དུས་ཚོད་ཀྱི་བྲང་གཞུང་ལ་གྲི་གཟུག་མི་འདོད་ཀྱང

དྭངས་གཙང་གི་མེ་ལོང་ལ་གཡའ་བསྒོ་མི་འདོད་ཀྱང

དུས་ཚོད་ཀྱི་མདའ་རྩེ་ལྟ་བུའི་མཛུབ་གུ་དེས

ཨང་གི་རེ་རེའི་སྟེང་ལ་གདུག་རྩུབ་ཀྱིས་བཙུགས་ནས་ཐོན་དུས

དྲང་བདེན་གྱི་ཨང་གི་སུ་ཞིག་གིས་རང་ཚུགས་འཛིན་ནུས

ཡིག་འབྲུ་ཁོག་སྟོང་མང་པོ་འབུ་སྲིན་བཞིན་རུབ་འོངས་སྟེ

དྭངས་གཙང་གི་སེམས་པ་ལྟ་བུའི་ཤོག་དཀར་མང་པོ་ཧམ་ཟ་བྱེད་དུས

ལ་རྒྱ་དང་འཇོན་ནུས་འཕྱར་མཁན་ཚོའི་སྨྲ་ལྕེ་ལ་མདུད་པ་རྒྱག་སྲིད་དམ

གད་སྙིགས་ལ་བདེན་ཁ་སྟེར་བའི་མཛུབ་གུ་རིང་ཐུང་མང་པོས

གད་སྙིགས་ཀྱི་སྟེང་ལ་གད་སྙིགས་བརྩེགས་ཀྱིན་པས

གནམ་འོག་འདིར  གད་སྙིགས་འདིའི་རྔམ་ཁ་ཆེས་མཐོ་ལ་རིན་ཐང་འདིར་ཆེས་བྲིན་པའོ

གངས་རིའི་ཚོགས་ཀྱི་རྣམ་ཤེས་ཡ  འུ་ཅག་གི་ཉེ་འཁོར་ན

རི་རབ་ལྟ་བུའི་གད་སྙིགས་འདི་དག་གཙང་ཕྱག་བྱེད་ཕོད་མཁན་གྱི་དཔའ་བོ་སུ་ཞིག་ཡོད་ཨང

བསམ་གཟས་ནས་དུས་ཚོད་དང་སྐར་ཆ་རེ་རེ་ཧྲིག་ཧྲིག་འཆའ་བའི་ཡིག་འབྲུ་འདི་དག

བརྟན་བརླིང་གི་རི་བོ་མང་པོའི་ཟུངས་ཁྲག་གིས་བསྐྲུན་ནའང

ཡིག་འབྲུ་དེ་དག  དཔུང་ཤུགས་དྲག་པོས་པོ་ཏ་ལའི་མིག་ཀོང་དང་ཡ་ཆུང་ལ་ཨུ་ཚུགས་ཀྱིས་འཚང་འོང་སྟེ

ཞིམ་མངར་གྱི་རུས་རྐང་མཐའ་དག་རྨང་ནས་གཞིབ་རྩིས་ཡིན་ཨང

སྨྱུ་གུ་དེ་དག

གད་སྙིགས་བཟོ་སྤྱད་ཀྱི་འཕྲུལ་འཁོར་ཞིག་དང་འདྲ་བར

ཕོ་བྲང་ལྟ་བུའི་ཁང་མིག་དང་ཡ་ཆུང་ལྟ་བུའི་ཞིང་ས་མང་པོ་ཁྱུར་མིད་གཏོང་དུས

ངའི་ཆེས་མཐའ་མཇུག་གི་བསྟི་གནས་ལའང་དྲོད་ཁོལ་མེད་པ་ཚོར་ཡོང

2010.3.4

རྩོམ་ཁུངས། ངེད་དྲ་བ།