ཀྱ་ཙེ་གོམ་ཙེའི་འདར་ཡོམ་རྒྱག་གིན།
ཚིག་འབྲུ་མི་གསལ་བའི་གཉིད་གླུ་ཉན་གིན།
ཁང་ཀླད་ཀྱི་ཉི་གྲིབ་འོག་ཏུ།
སྣ་ལྔའི་ཁ་དོག་གིས་བསླེས་པའི་ངའི་སེམས་ཁམས།
ཨ་མ་གཅིག་པུའི་བར་སྣང་དུ་ཁ་བ་བཞིན་རྩེན།

རྨི་ལམ་གྱི་ཞིང་དུ།
ཁྱོད་ཉིད་ཁོ་ན། ངའི་མཛེས་སྡུག་གི་ཡུལ་ལྗོངས་ཡིན་ཞིང༌།
ཉིན་རྒྱུན་གྱི་ཁོར་ཡུག་ནང༌།
ཁྱོད་ཉིད་ཁོ་ན། ངའི་བསམ་གཞིག་གི་ཨ་ལོང་ཡིན་པས།
ངས་ཁྱོད་ཀྱི་སྐྱེད་ཚལ་ལས་བཏུས་པའི་མེ་ཏོག་གི་མགུལ་རྒྱན་དེ།
ཕོ་ལོ་སུམ་ཅུའི་རི་མགོར་ཡང་གསུང་མདུད་བཞིན་བཏགས་ཡོད།

ན་ཟླའི་ཁྲོད་ནས། གླུ་ངག་ཅིག་ཁྲོལ་གྱིན།
བྱ་བརྒྱའི་དབུས་སུ། འདབ་གཤོག་ཅིག་རྐྱོང་སྐབས།
ཕ་ཡུལ་གྱི་སྤྲིན་དཀར་འདབས་ན།
ཨ་མའི་རེ་སྨོན་གྱི་རླུང་རྟ་ལྷེབ་ལྷེབ་ཏུ་འཕུར་ཞིང༌།
རི་གྲོང་གི་རྫ་ཆུའི་འགྲམ་དུ།
ཨ་མའི་དུང་སེམས་ཀྱི་གཡུ་ལོ་ལྷག་ལྷག་ངང་བཞད།

ལང་ཚོ་དར་བས། སྒེག་འགྲོས་ཤིག་ངོམ་ན་འདོད།
ཧ་གཉིད་སད་དུས། བསྒྲགས་གཏམ་ཞིག་སྤེལ་དགོས་བྱུང༌།
སྤོབས་སེམས་དང་ལ་རྒྱའི་སྡེར་ཁ་བསྒྲིགས་ནས།
མི་རབས་གསུམ་པའི་རྒྱང་སྐོར་ཞིག་བྱེད་ན་སེམས།

རྩོམ་ཁུངས། ངེད་དྲ་བ།