གཅིག
སུས་ཀྱང་མི་ཚོར་བའི་འབྱུང་བཞིའི་བསླུ་བྲིད་ཅིག་གིས།
ལོ་ཟླ་གྲངས་མེད་ཀྱི་འཚོ་བ་ཉི་ཟླའི་འཆར་ནུབ་ལ་བསྐུར།
ལུག་ཁྱུ་དང་རྫི་གླུར་བསྲེས་པའི་བྱིས་པའི་གཏམ་རྒྱུད་ལས།
རྨི་ལམ་གྱི་ལྷག་འཕྲོ་སྔ་ས་ནས་དུང་སད་མེད་པར།
མ་བསམ་ས་ནས་ས་ཡོམས་ཀྱི་འཇིགས་པ་ཚོར་ལ།
རླབས་སྒྲ་སྐྱོམས་པའི་ངུ་ངག་གི་རླུང་རྟ་བསྐྱོད་པར་བྱས།
འདང་དགོང་ཟླ་འོད་དང་འཇམ་ཞིང་བདེ་ལ།
དེ་རིང་འུར་ཆེན་གྱིས་གནམ་ས་གཅིག་ཏུ་གཡོས།
ལེ་བདའ་མ་སོན་པའི་བྱིས་པའི་རྩེད་ར་དེ།
ཉི་ཟེར་མ་ཕོགས་པའི་ཞོགས་ཁའི་ལྡིང་ཁང་ལས་ཅི།
                    གཉིས།
ཉིན་བྱེད་ཆུ་ལྷར་བཞུད་ཅིང།
རྣམ་ཤེས་ཤམ་བྷ་ལར་བསྐྱོད་དུས།
ཚོ་བ་འདིའི་སྐྱོ་གདུང་གི་མིག་ཆུ་རྒྱ་མཚོར་འཐིམས་ལ།
སྡུག་ཡུས་ཀྱི་སྐྱོ་སྣང་ས་ཡོམས་ཀྱིས་བཅོམ་པས།
བྱིས་པ་ཚོ་ཚེར་ས་སྲུང་བའི་གནས་གཞི་སྟོང་བ་ཞིག
དེ་ལྟར་བཞུད་སོང་བའི་ཡབ་ཡུམ་གྱི་སེམས་འདུན།
ལན་ཆགས་མ་ཟད་པའི་སྒོ་ཁ་དེ་ན།
ཕྱིར་དྲིན་གྱི་ཀློང་རིམ་ན་ན་ཟུག་གིས་བཟི།
                       གསུམ།
སྐྱོ་སྣང་སྟོང་ཕྲག་གི་མིག་ཟུང་ལག་པས་འགེབ་དུས།
ཁྱོད་ཚོ་རྒྱང་ཐག་རིང་བའི་ཕ་རོལ་ན།
ཞེ་ཆགས་སྣང་བའི་སེམས་པ་སྐྱུར་མོ།
འབྲུག་སྒྲ་རྒོད་པའི་ཆར་སྤྲིན་བཞིན་འཕུར་ཞིང་ལྡིང་ལ།
ལྷག་ལུས་སུ་གྱུར་བའི་སྙིང་གཏམ་དང་དྲོད་ཁོལ།
ལས་དབང་གནམ་ལ་བཅོལ་བའི་དམ་ཚིག་ཅིག
ལན་རེར་ཕྱིར་བལྟའི་བསམ་གཞིགས་འོ་དོད་ལས་རྙེད་པས།
ཤ་ཉེས་ལག་ཟུང་ལ་སྦྱར་བའི་མཆོད་ཀོང་དེ།
བརྗེད་རྙིང་མེད་པར་ཁྱོད་ཚོར་གཏད་ནས།
འབྱུང་འཇིག་གིས་བཞེངས་པའི་སྐྱེ་རྒུའི་གྲོང་ཁྱེར།
ནམ་ཡང་མཆོད་འབུལ་ལས་བོར་མ་སོང་།
                          བཞི།
ཞེ་འཁྲེང་བའི་ཞལ་རས་དེ་དོ་དགོང་གི་ཟླ་བ་བཞིན།
ལེ་བདའ་དང་སྐྱོ་སྣང་གིས་གངས་སིལ་བརྒྱུད་དུས།
བྱིས་པ་ཚོ་ལྷག་རླུང་གི་སྡེར་བར་ན།
འདར་སིག་དང་སྐྲག་གིས་བསྐྱེད་ནས།
ལྷིང་འཇགས་དབེན་པའི་མཚན་སྨག་གི་བཟི་ཁས་དེད།
མ་བུར་གྱུར་བའི་སྐར་ཚོགས་ཁྲི་མ་འབུམ།
བདེ་བར་སྤྲོ་བའི་མེག་ཏོག་གི་མཚོ་ཆུང་སྣ་ཚོགས།
ངུ་ངག་བོར་བའི་དྭ་ཕྲུག་ཚོའི་དགོད་སྒྲའི་དབྱངས་རྟ།
ཡང་བསྐྱར་ཁ་སང་ལས་ལྷག་པའི་དུས་ཤིག་ལ།
འདས་གཏམ་ལ་སྐྱོ་བ་ཟབ་པའི་ལས་དབང་དེ་དག
མཚམས་འཇོག་མེད་པར་ཁྱོད་དང་སུ་ལའང་བརྗོད་ངེས།

རྩོམ་ཁུངས། ངེད་དྲ་བ།