མུ་གེའི་སྒང་ལ་ཟླ་ལྷག (4/14 ས་ཡོམ་གོད་ཆག་བྱུང་རྗེས།)

ཀློག་པ་པོ་རྣམ་པར་ཞུ་རྒྱུར། ཁམས་སྐྱེ་རྒུ་མདོ་ཡུལ་ཤུལ་མི་མང་འདས་གསོན་རྣམས་ལ་གདུང་སེམས་མཉམ་བསྐྱེད་དང་བསྔོ་སྔོན་གསོལ་འདེབས་ཀྱི་ཚུལ་དུ་རྩོམ་ཡིག་འདི་ཚར་གཅིག་བཀླག་རོགས་གནོངས། །

              སྤུན་ཟླ་ཚོ། འདི་ལྟར། གསུམ་གཅིག་བཞི། བཞི་གཅིག་བཞི། ང་ཚོའི་མི་རིགས་འདི་འགྱེལ་བའི་སྟེང་རྡོག་བརྫིས་དང་། མུ་གེའི་སྒང་ལ་ཟླ་ལྷག་ཅེས་པ་ལྟ་བུར་གྱུར་ན་ཡང་། ང་ཚོའི་ཤ་ཁྲག་རུས་གསུམ་ནམ་ཡང་གཅིག་ཡིན། ང་ཚོ་སྐྱིད་ཀྱི་རྟ་ཕོ་མཉམ་བཞོན་དང་། སྡུག་གི་ཁུར་པོ་མཉམ་འཁུར་ཡིན། སྤུན་ཟླ་ཚོ། ཐུགས་མ་སྐྱོ།

      ཡུལ་ཤུལ་མི་མང་ཚོ། ང་ཚོའི་ལུས་ངག་ཡིད་གསུམ་ཁྱེད་ཚོའི་ལུས་ངག་ཡིད་གསུམ་ལ་ཐིམ་ན་འདོད། སྤུན་ཟླ་ཚོ། ཁྱེད་ཚོའི་ནང་མི་སྤུན་ཉེ་ཡོད་ཚད་ང་ཚོའི་ནང་མི་སྤུན་ཉེ་ཡིན། ང་ཚོ་ཚང་མ་བོད་པ་ཡིན། ང་ཚོ་ཚང་མ་རྩེད་ཐང་གོང་བུ་རི་ནས་འཕག་པའི་སྤྲེལ་ཕྲུག་གི་རིགས་རྒྱུད་ཡིན། ང་ཚོ་ཚང་མ་བྱམས་དང་སྙིང་རྗེའི་བདག་ཉིད་ཡིན། ང་ཚོ་ཚང་མ་ཕྱག་ན་པདྨོས་རྗེས་སུ་བཟུང་བའི་གདུལ་བྱ་ཡིན། བློ་སྤོབས་སྐྱེད་དང་། མིག་ཟུང་མཆི་མས་གང་། གཟུགས་ཕུང་ན་ཟུག་གིས་གཙེས། ཡིད་སེམས་སྡུག་བསྔལ་གྱིས་མནར་ན་ཡང་། དཔའ་མ་ཞུམ། ང་ཚོ་ཚང་མ་ཁྱེད་ཚོའི་གམ་ན་ཡོད། ང་ཚོ་ཚང་མ་ཁྱེད་ཚོ་ལྷན་དུ་ཡོད། ང་ཚོ་ཚང་མ་སེམས་པ་དང་སེམས་པ་སྦྲེལ་ནས་ཡོད།

      ཡུལ་ཤུལ་མི་མང་ཚོ། འཛམ་གླིང་ས་ཕྱོགས་གང་སར་ཁ་བ་རི་པ་ཚོས་ངག་ནས་མ་ཎི་འདོན་གྱིན་འདུག་ལ། སྦྱིན་པའི་ཕྱག་ཟུང་ཡངས་པོར་རྐྱོང་གིན་འདུག  ཡ་གིའི་རྩ་གསུམ་གྱི་བླ་མ་ནས་མ་གིའི་བན་ཆུང་བར་ཁྱེད་འདས་པོ་རྣམས་ཀྱི་རྗེས་འཇུག་སྒྲུབ་ཀྱིན་འདུག གསོན་པོ་རྣམས་ལ་སྐྱབས་སྨོན་འདེབས་ཀྱིན་འདུག འདི་ཕྱི་བར་དོའི་འཇིགས་པ་ལས་བྲལ་ཕྱིར་བསྔོ་སྨོན་ཡང་འདོན་གྱིན་འདུག ད་དུང་ས་དང་གནམ་གྱི་བར་ནས་མང་པོ་མང་པོ་ཞིག་གིས་འདི་ལྟར་འབྱུང་ཁམས་ལ་འཁང་ར་དང་གཤེ་སྐུར་སོགས་ཀྱང་བྱེད་ཀྱིན་འདུག       

      ཡུལ་ཤུལ་མི་མང་ཚོ། འབྱུང་བཞི་ལ་སྙིང་རྗེ་མེད་པ་བདེན་ན་ཡང་། འགྲོ་བ་མི་འདི་ཚོར་སྙིང་རྗེ་མེད་པ་ཅི་ལ་སྲིད། རྒྱལ་ཁབ་འདྲ་མིན་དང་། ཚོགས་པ་འདྲ་མིན། མི་སྒེར་ལ་སོགས་པ་གྲངས་ལས་འདས་པ་ཞིག་གིས་ཀྱང་སྦྱིན་པའི་ཕྱག་ཟུང་ཁྱེད་རྣམས་ཀྱི་ཕྱོགས་སུ་རྐྱོང་གིན་འདུག  འོན་ཀྱང་ང་རང་ལག་སྟོང་ཞིག་ཡིན་སྟབས། འདི་ལྟར་སྙན་ངག་ཅིག་འབྲི་གིན། ངའི་མིག་ཟུང་མཆི་མས་རབ་རིབ་ཏུ་གྱུར་སོང་། ངའི་སེམས་ཁམས་གྱ་གྱུར་གྱུར་སོང་། ཨོྃ་མཎི་པ་དྨེ་ཧཱུཾ། ཨོྃ་མ་ཎི་པདྨེ་ཧཱུཾ། ཨོྃ་མ་ཎིཔདྨེ་ཧཱུཾ།

      ཡུལ་ཤུལ་མིང་མང་ཚོ། མདོ་དབུས་ཁམས་གསུམ་གྱི་སེམས་པ་ཁྲི་མ་འབུམ་གྱིས་ཁྱེད་ཚོའི་མཁའ་དབྱིངས་སུ་ལྡིང་གིན་འདུག་ལ། ས་མཐའི་ཡུལ་གྱར་བ་སྟོང་ཕྲག་མང་པོའི་མིག་ཟུང་གིས་ཁྱེད་ཚོའི་དཀའ་སྡུག་ལ་གཟིགས་ཀྱིན་འདུག རྣ་བ་ཐོགས་ཚད་ཀྱིས་ཁྱེད་ཚོའི་ངུ་འབོད་ལ་ཉན་གྱིན་འདུག མདོར་ན། ཡོད་ཚད་ཁྱེད་ཚོའི་ཕྱོགས་སུ་སེམས་ཁྲལ་བྱེད་ཀྱིན་འདུག་ལ། ཕ་ཡུལ་ན་གང་མང་ཞིག་གིས་ཁྱེད་ཚོའི་ཆེད་དུ་ཟས་བཅག་གཉིད་བྲལ་ངང་རྒྱུག་གིན་འདུག

        ཡུལ་ཤུལ་མི་མང་ཚོ། མ་བུ་ཁ་བྲལ་དང་།  མི་ཤི་ཁྱིམ་སྟོང། ཁྱིམ་གཞིས་རྩ་ཐོར་དུ་སོང་བ་མ་ཟད། ཡིད་འོང་གི་ཕ་ཡུལ་དེ་ཡང་གྱང་ཁོག་ཞིག་རལ་ཏུ་གྱུར་ཅིང་། གཤིན་པོའི་དུར་ས་དང་། ནད་གཅོང་གི་ངུ་འབོད་མང་བའི་མྱ་ངམ་ཐང་ཞིག་ཏུ་གྱུར་ན་ཡང་། སྐྱིད་སྡུག་ནི་འཇིག་རྟེན་གྱི་གོམ་སྟབས་ཤིག་ཡིན་སྟབས། སེམས་མ་ཕམ། ཡིད་མ་ཞུམ། འདི་ནི་འཇིག་རྟེན་ཁམས་ཀྱིས་ང་ཚོར་སྤྲད་པའི་བསླབ་བྱ་ཞིག་དང་འཛམ་གླིང་མི་མང་ལ་ཚོར་བརྒྱབས་པའི་ཉེན་བརྡ་ཞིག་ཀྱང་ཅིས་མ་ཡིན།

        ཡུལ་ཤུལ་མི་མང་ཚོ། ཁྱེད་རྣམས་གང་མགྱོགས་བདེ་སྐྱིད་ལྡན་པའི་ཁྱིམ་གཞིས་ཤིག་དང་། ལྗང་མདོག་ལྡན་པའི་འཚོ་བ་ཞིག་ལ་རོལ་ཐུབ་པར་རེ་སྨོན་དང་ཡིད་ཆེས་ཡོད་ལ། ཕྱི་ལུས་པོའི་ནད་རིགས་ཡོད་ཚད་བདེ་བླག་ཏུ་དྲག་བསྐྱེད་ཡོང་བ་དང་། ནང་སེམས་ཀྱི་རྨ་ཁ་ཡོད་ཚད་ཕྱག་ན་པདྨོའི་བྱིན་རླབས་ཀྱི་བདུད་རྩིས་ཉེ་བར་ཞི་སྟེ། དལ་བརྒྱད་འབྱོར་བཅུ་ཚང་བའི་དལ་འབྱོར་མི་ལུས་དེ་ཉིད་སྐུ་ཁམས་བདེ་ཐང་དང་། བསམ་དོན་ཆོས་བཞིན་འགྲུབ་པའི་སྨོན་ལམ་ཡང་རྒྱག་གིན་ཡོད། ད་དུང་གནོད་སྐྱོབ་ངལ་སེལ་གྱི་ལས་དོན་ཁག་གི་ནང་མ་སྐུལ་དང་བླང་ཐོག་གཞན་ཕན་སྒྲུབ་མཁན་གྱི་དགེ་འདུན་པ་དང་སློབ་གཉེར་བ། མི་མང་སོགས་ལ་ཡང་ཁོ་བོས་ཡུལ་ཤུལ་མི་མང་གི་ཚབ་ཞུས་ཏེ་སྙིང་དམར་པོ་བསྟན་ཏེ་བཀའ་དྲིན་བླ་མེད་དུ་ཆེ་ཞུ་ན་འདོད། ཐུགས་རྗེ་ཆེ། བཀའ་དྲིན་ཆེ། ཚེ་རིང་ལོ་བརྒྱ། ཁ་དྲོ་བཀྲ་ཤིས། ངའི་མིག་ཟུང་མཆི་མས་བརླན་གྱིན་ལག་ཟུང་འདར་འདར་དུ་སླར་ཡང་ཐུགས་རྗེ་ཆེ་ཞུ་འདོད་བྱུང་། ང་ནི་ས་མཐའ་བ་ཞིག་སྟེ། ཕ་ཡུལ་ལ་རྒྱང་ལྟ་བྱེད་ཀྱིན་དུས་འདའ་བའི་སེམས་པ་རྨས་པ་ཞིག་ཡིན། ཡུལ་ཤུལ་གྱི་སྤུན་ཟླ་ཚོ། གནམ་ས་གཉིས་ཁ་སྦྱར་དུ་སོང་ན་ཡང་ང་ཚོ་ནམ་ཡང་མགོ་བོ་སྒུར་མི་རུང་། ངུ་མཚམས་ཞོག་དང་། མིག་ཆུ་ཕྱིས་དང་། སེམས་པ་རྣལ་དུ་ཕོབ་དང་། ངའི་ཕ་ཡུལ་གྱི་སྤུན་ཟླ་ཚོ། ས་མཐའི་གྲུ་ཟུར་འདི་ནས་ངས་སེམས་ཁོང་དུ་བླ་མ་དཀོན་མཆོག་སྒོམ་བཞིན་སྨོན་ལམ་འདེབས། ནད་མུག་འཁྲུག་རྩོད་ཞི་བའི་སྨོན་ལམ་འདེབས། རང་སྐྱིད་མི་སྨོན་ཡོང་བའི་སྨོན་ལམ་འདེབས། འདི་ཕྱི་གཏན་བདེ་ཡོང་བའི་སྨོན་ལམ་འདེབས། 

        འཛམ་གླིང་གི་མི་མང་ཚོ། ང་ཚོ་ཐུན་མོང་ཐོག་རེ་འདུན་ཞུ། དམ་བཅའ་འཇོག འབྱུང་ཁམས་ཁོར་ཡུག་ལ་བདག་གཅེས་བྱེད་དགོས། འབྱོར་ལྡན་གྱི་རྒྱལ་ཁབ་དང་། ཧམ་སེམས་ཅན་གྱི་ཁེ་ལས་པ། ད་དུང་གཞུང་དང་སྒེར་གྱི་ཚོགས་པ་ཁག མདོར་ན། རང་འབྱུང་ཁམས་སུ་དོ་ཕོག་གཏོང་མཁན་གྱི་རྒྱལ་ཁབ་དང་ཚོགས་པ། མི་སྒེར་སོགས་གང་ན་སུ་ཞུགས་རྣམས་ཀྱིས། རང་འབྱུང་ཁམས་ནི་ང་ཚོ་ཐུན་མོང་གི་ཚེ་སྲོག་ཡིན་པ་དེ་མ་བརྗེད་རོགས། རང་འབྱུང་ཁམས་ཆེན་མོར་རང་རང་གི་ཚེ་སྲོག་ལས་རྩ་བ་ཆེ་བར་བརྩི་རོགས། ས་ཆུ་མེ་རླུང་གི་འཇིགས་པ་ལས་བྲལ་འདོད་ན། རང་འབྱུང་ཁམས་ལ་གཅེས་ཉར་མཛོད་དང་། རང་བྱུང་ཁམས་ལ་སྙིང་རྗེ་མེད་པ་མིན་ཏེ། འགྲོ་བ་མིའི་རིགས་མང་པོ་ཞིག་གི་ནང་སེམ་ཁམས་སུ་སྙིང་རྗེ་དང་གཞན་ཕན། བསམ་ཤེས། ཀུན་ཁྱབ་སེམས་ཁུར་གྱི་ལུས་ཟུངས་མི་འདུག་པས། ང་ཚོ་ཐུན་མོང་ཐོག་རེ་འདུན་ཞུ། རང་འབྱུང་ཁམས་ལ་བདག་གཅེས་བྱེད་རོགས། འདི་ནི་ངའི་ཚེ་སྲོག་ཡིན། འདི་ནི་ཁྱེད་ཀྱི་ཚེ་སྲོག་ཡིན། འདི་ནི་ང་ཚོ་ཚང་མའི་ཚེ་སྲོག་ཡིན།

        རང་འབྱུང་ཁམས། འགྲོ་བ་ས་ཡ་ཁྲི་འབུམ་མང་པོའི་ཚེ་སྲོག་གི་བདག་པོ་ཡིན། རང་འབྱུང་ཁམས། ང་ཚོའི་ཚེ་སྲོག་སྐྱོབ་རོགས། ང་ཚོར་སྙིང་རྗེ་སྒོམ་རོགས།

རང་བྱུང་ཁམས། ཁྱེད་ནི་ང་ཚོའི་བླ་སྲོག་གི་བདག་པོ་ཡིན།

འདི་ནི་གཤིན་པོ་རྣམས་ཀྱི་ཁ་ཆེམས་དང་། གསོན་པོ་རྣམས་ཀྱི་རེ་འདུན་ཡིན།

སྤྱི་ལོ་༢༠༡༠ཟླ་༤ཚེས་༡༤ཉིན་གྱི་སྔ་དྲོར་མཚོ་སྔོན་སྐྱེ་རྒུ་མདོའི་ས་ཡོམ་གོད་ཆག་བྱུང་རྗེས་ས་གནས་ཁག་གི་སྤུན་ཟླ་ཚོར་གདུང་སེམས་མཉམ་བསྐྱེད་ཆེད་དུ་ཚེས་༡༦ལ་བྲིས།

2010/4/16

ཉིན་གྱི་མཚན་མོའི་ཆུ་ཚོད་གཉིས་པར་བསྐུར།

རྩོམ་ཁུངས། ངེད་དྲ་བ།