སྒེའུ་ཁུང་གི་ཉེ་སར་བཙུགས་པའི་ཁམ་སྡོང་དེ

ཁེར་ཧྲེང་ཞིག་ཡིན་ཀྱང

བརྟན་བརླིང་གིས་འགྲེངས་ཡོད་པ་མཐོང་ཐེངས་རེར

དད་སེམས་ཤིག་རླུང་བུ་བཞིན་ལྡང་ཡོང

དགུན་ཁར

སྐྱེ་དངོས་ཡོད་ཚད་བུ་ཡུག་གི་ཚེར་མས་བྲབས་དུས

ཁམ་བུའི་སྡོང་པོ་ཁོ་ན་འཁྱག་ཤི་མ་ཐེབས

དབྱར་ཁར

ཚད་ཐན་གྱི་ལག་པས་གཅིར་དུས་ཀྱང

ཁམ་སྡོང་གཅིག་པུར་སེར་ཁ་མ་གས

ད་ལྟ

ཁམ་སྡོང་གི་ཡལ་ག་རེ་རེ་ན

མིག་གིས་མི་ཟིན་པའི་མེ་ཏོག་དཀར་པོ་དང་མེ་ཏོག་དམར་པོ

མཛེས་སྡུག་གིས་བཀད་ཅིང

བསུང་ཞིམ་མངར་མོ་ཞིག་ཀྱང་ལྷོད་ཀྱིས་ཐུལ་བས

ཁམ་བུའི་སྡོང་པོ་འདི

ལང་ཚོས་དུད་པའི་སྨན་ཤར་བཞིན

ཡིད་དུ་འོང་བ་ཞིག་རེད

ངས་ཁམ་སྡོང་གི་བསིལ་གྲིབ་ལ་ཁེན་ནས

སྙན་ངག་གི་རོལ་དབྱངས་དཀྲོལ་དུས

ཁམ་བུའི་སྡོང་པོ་འདིས

ངའི་སོར་གང་སྐྱེས་པའི་སྐྲ་ལོའི་སྟེང་དུ

བརྩེ་བྱམས་ཀྱི་ཕྱག་གིས་བྱིལ་བྱིལ་གནང་བའི་ཚོར་སྣང་ཞིག་སྦྱིན་བྱུང

ཡུལ་གྱར་བའི་མགྲོན་པོ་ངས

ཁམ་བུའི་སྡོང་པོ་ཡི་རྩིབས་ནས་ཉིན་ཞག་མང་ཙམ་སྐྱེལ་ཡང

སུན་སྣང་གི་ཤོག་ལྷེ་བརྩེགས་མ་མྱོང

དེ་ནི་ཁམ་སྡོང་གི་བྱིན་རླབས་ཤིག་ཡིན་ཡང་སྲིད

༢༠༡༠  ༤  ༡༢

རྩོམ་ཁུངས། ངེད་དྲ་བ།