__________ཆུང་མར་ཕུལ་བ།

ཁྱོད་མ་སད་པའི་སྔ་རོལ་དུ  མཚོ་མོ་རྒྱལ

ང་ཐག་རིང་ཐག་རིང་ཞིག་ལ་ཆས་འོས

ཐག་རིང་ན       གངས་རི་དང་གཙང་ཆུ་

རྩྭ་ཐང་དང་སྦྲ་གུར

མར་དང་རྩམ་པ      ལུག་ཁྱུ

ང་ཆེས་དགའ་བའི་འོ་ཇ་མངར་མོ་སོགས་མེད་རུང་

ཁྱོད་མ་སད་པའི་སྔ་རོལ་དུ

ངས་ཁྱོད་ཀྱི་མཆུ་སྒྲོས་དམར་བོར     མིག་ཟུང་ཟུམ་ནས

ཞིམ་ལ་སྐྱུར་བའི་མཐའ་མཇུག་གི་འོ་ཞིག་བསྐྱུར་རྗེས

ང་དངོས་གནས་ཐག་རིང་ཐག་རིང་ཞིག་ལ་ཆས་འོས

ཨ    ང་འདི་ལྟར་བྲེལ་མྱུར་གྱིས་གྱེས་མི་འོས

ངའི་རྒྱབ་ཕྱོགས་ན    འདར་སིག་སིག་གི་གངས་རི་ལུས་ཡོད

ངའི་རྒྱབ་ཕྱོགས་ན    དབེན་ཐིང་ཐིང་གི་གཙང་བོ་དང་

ངའི་གཉིད་དུ་ཡུར་བའི་ལྷ་མོ་ཁྱོད་ལུས་ཡོད

འདས་ཟིན་པའི་ལོ་ཟླའི་ནང་     ཁྱོད་ཚོས

རང་ཉིད་ཀྱི་རྔུལ་ཁྲག་བཙིར་ནས

ང་ལ་དྲོད་འཇམ་གྱི་དུས་ཡུན་རིང་བོ་ཞིག

ཕངས་མེད་དུ་བྱིན་མྱོང་ནའང་        ཁྲེལ་མེད་ངས

ཁྱོད་ཚོའི་རེ་བཞག་གི་མཁའ་དབྱིངས་ནས        ད་ལྟའི་བར་དུ

ལྡེམ་མྱུར་གྱི་གཤོག་འགྱུར་ཐེངས་ཤིག་ཀྱང་བརྒྱབ་མྱོང་མེད

ཁྱོད་མ་སད་པའི་སྔ་རོལ་དུ     མཚོ་མོ་རྒྱལ

ང་ཐག་རིང་ཐག་རིང་ཞིག་ལ་ཆས་འོས

ཐག་རིང་ན    ལབ་ཙེ་དང་མཆོད་རྟེན

དར་ལྕོག་དང་རྡེའུ་འབུམ

འབྲོང་དང་བྱ་རྒོད      འབྲི་གཡག

ང་ཆེས་དགའ་བའི་རི་གླུ་སྙན་མོ་སོགས་མེད་རུང

ཁྱོད་མ་སད་པའི་སྔ་རོལ་དུ  

ངས་མིག་ཟུང་མཆི་མས་བརླན་བཞིན

གནས་འདི་ཡི་ཡོད་ཚད་ལ་ཕྱི་མིག་ཐེངས་ཤིག་འཕངས་རྗེས

ང་དངོས་གནས་ཐག་རིང་ཐག་རིང་ཞིག་ལ་ཆས་འོས

ཡང་ན་     འདི་ནི་ནོར་འཁྲུལ་གྱི་བདམས་གསེས་ཐེངས་ཤིག་ཡིན་ཀྱང་སྲིད

ཡང་ན་     འདི་ནི་འུ་ཐུག་གི་བྲོས་བྱོལ་ཐེངས་ཤིག་ཡིན་ཀྱང་སྲིད

རེ་སྒུག་ཁྲི་ཕྲག་གི་ཡང་རྩེ་ནས     ཁྱོད་ཚོས

རེ་ཞིག་ང་ལ་སྒུག་རོགས་མཛོད་དང་    ངས

ང་ཚོའི་བྲང་གཞུང་གི་སྡེར་ཤུལ་རེ་རེ་སྙིང་ལ་བཅངས་ནས

ངས་ང་ཚོའི་ཕམ་ཉེས་ཀྱི་ལྷག་མ་རེ་རེ་རྒྱབ་ལ་འཁུར་ནས

ཐག་རིང་ལ་འགྲོ་དགོས་རུང་

ལྷན་འཛོམས་ཐེངས་ཤིག་སླད་དུ

ཁྱོད་ཚོས    རེ་སྒུག་ཁྲི་ཕྲག་གི་ཡང་རྩེ་ནས

རེ་ཞིག་ང་ལ་སྒུག་རོགས་མཛོད་དང

ང་ཟླ་བ་བཞིན་ནུབ་རྗེས

ང་ཉི་མ་བཞིན་ཅིས་ཀྱང་འཆར་འོང་སྲིད

རྩོམ་ཁུངས། ངེད་དྲ་བ།