མཐའ་མཇུག་གི་གནང་ཞུའི་ཡི་གེ
ཀུན་གྱིས་བླ་ནས་བླ་རུ་བཀུར་བཞིན་པའི
བདག་གི་མགོ་ཁྲིད་ལགས
ཁྱེད་ཀྱིས་ནམ་རྒྱུན་མ་རྩ་རིང་ལུགས་ཀྱི་སྤྱི་ཚོགས་ནང་གི
མ་རྩ་བ་བཞིན
གདོང་ལ་ཁྲོ་གཉེར་མངོན་བཞིན
ང་ལ་“ང་ཚོ་དུས་ཚོད་དང་མཉམ་དུ་རྒྱུགས་རེས་འཐེན་དགོས”ཟེར
ཁྱེད་ཀྱིས་ནམ་རྒྱུན་ཞིང་བྲན་ལམ་ལུགས་ནང་གི
ཞིང་བདག་བཞིན
ངའི་སེར་ཐག་ཆོད་པའི་གདོང་ལ་མཛུབ་མོས་བཙུགས་ནས
ང་ལ་“ང་ཚོས་ཅིས་ཀྱང་བོང་བུ་དང་བྱ་ཕོ་ལ་སློབ་སྦྱོང་བྱེད་དགོས་” ཟེར
བདག་གི་མགོ་ཁྲིད་ལགས
ང་ལ་མི་འདོད་པའི་ནད་གང་གིས་ཀྱང་གཙེས་མེད་ནའང
ང་ངལ་ཞིག་གསོ་དགོས
མགོ་བརྩམས་པ་ནས་བཟུང ངས་རང་ཉིད་ཀྱི་ཡོད་ཚད
མི་དམངས་དང་རྒྱལ་ཁབ་ཀྱི་ཆེད་དུ་ཕུལ་ཟིན་ཅིང
ལས་ལ་བརྩོན་པའི་སྦྲང་མ་བཞིན
ངས་ རང་ཉིད་ཀྱི་ཡོད་ཚད
ཁྱོད་ཀྱི་སླད་དུ་ཕུལ་ཟིན་པས
ད་ནི ང་ངལ་ཞིག་གསོ་དགོས
ང་དངོས་གནས་ངལ་ཞིག་གསོ་དགོས
ཀུན་གྱིས་བླ་ནས་བླ་རུ་བཀུར་བཞིན་པའི
བདག་གི་མགོ་ཁྲིད་ལགས
ཤ་ཟད་ནས་རུས་ལྷང་ལ་བུད་འདུག་པའི་དུས་སྐབས་འདི་འདྲ་ཞིག་ལ
ཁྱེད་ཀྱིས་ང་ལ་གནང་བ་ཞིག་ཅིས་ཀྱང་སྟེར་རོགས་མཛོད
སྟེར་རོགས་མཛོད
ཞེས་སྤྱི་ཚོགས་རིང་ལུགས་ཀྱི་སྤྱི་འབངས་དཀྱུས་མ་ཞིག་ནས
༢༠༡༠ཟླ༤པའི་ཚེས་༢༨ཉིན་མིག་ཟུང་མཆི་མས་བརླན་བཞིན་ཕུལ
རྩོམ་ཁུངས། ངེད་དྲ་བ།