རི་རྩེའི་དར་ལྕོག
ང་ནི་རི་རྩེའི་དར་ལྕོག་དེ་ཡིན།
ཁ་ཆར་དང་བུ་ཡུག་གི་གདུག་རྩུབ་ཁྲོད།
དུས་ནམ་ཡང་། ཁྱེད་ཀྱི་ཕྱོགས་སུ་འགྲེངས་ཡོད།
མཐའ་ཡས་པའི་མཚན་མོ་རེ་རེར།
རི་སྤྱང་གི་ངུ་ཟུག་རྒོད་ཀྱང་།
ངས། ཨུ་ཚུགས་ཀྱི་རླུང་བུ་བགམ་ནས།
ཁྱེད་ལ་སོ་ལྟ་བྱེད་བཞིན་ཡོད།
དེ་རིང་། ངའི་བསང་ཁྲིའི་སྒང་ལ།
ཁྱེད་ཀྱི་དུད་སྤྲིན་འཕྱུར། དེ་ལས།
ངས། ཁྱེད་ཀྱི་ཁོར་ཡུག་གང་རུང་མཐོང་།
དེ་ན། ལྐོག་གྱུར་མང་པོའི་མངའ་ཐང་ལུས་ཡོད་སྐད།
ངས་ཡང་ནས་ཡང་དུ།
ཁྱེད་ཀྱི་རྫི་གླུར་ཉན་ཐེངས་རེར།
རྒྱུ་རྐྱེན་གང་མང་ཞིག་གི་ཕ་རོལ་མཐོང་།
མཐར་དེད་ན། རྒྱུ་རྐྱེན་དེ་ཡང་།
ལས་དབང་གི་ཁོར་ཡུག་ལས་བརྒལ་ག་ལ་ཐུབ།
བསིལ་རླུང་ཡང་མོ་དེས།
ང་རང་དལ་བུར་གཡོ།
ཁྱེད་ཀྱིས་ག་ལེར་བདག་ལ་གཟིགས་དང་།
ངའི་ཚེ་སྲོག་རླུང་གི་ཟད་ལ་ཉེ།
ང་ནི་རི་རྩེའི་དར་ལྕོག་དེ་ཡིན།
ཁ་ཆར་དང་བུ་ཡུག་གི་གདུག་རྩུབ་ཁྲོད།
དུས་ནམ་ཡང་། ཁྱེད་ཀྱི་ཕྱོགས་སུ་འགྲེངས་ཡོད།
རྩོམ་ཁུངས། ངེད་དྲ་བ།