1

ང་ནི་དེ་རིང་དང་འདྲ།

དེ་རིང་ནི་དགུན་ཁ་ཞིག་དང་འདྲ།

དགུན་ཁ་འདི་ལ་ཆེན་པོ་ཞིག་དང་འདྲ།

ལ་ཆེན་འདི་མི་ལོ་བརྒྱད་ཅུར་སོན་པའི་རྒན་པོ་ཞིག་དང་འདྲ།

རྒན་པོ་འདི་སང་ཉིན་འཆི་བར་ཕྱོགས་པའི་སྤྲེལ་རྒན་ཟད་པོ་ཞིག་དང་འདྲ།

སྤྲེལ་རྒན་འདི།    སྤྲེལ་རྒན་ཟད་པོ་འདི་དེ་རིང་གི་ང་ཡིན་ནམ།

དེ་རིང་གི་ང་།    ཕྱོགས་ཀུན་ནས་ཕམས་ཉེས་ཐེབས་པའི་ཁྲི་དཔོན་ཞིག་དང་འདྲ།

སེམས་པ་ཡོད་ཀྱང་ཚོར་བ་མེད་པའི་ང་།              དེ་རིང་གི་ང་།

ལན་ལག་དང་ཉིང་ལག་སོ་སོར་དཔྲལ་ཡང་ན་ཟུག་ཅིག་ཡོད་དམ།

ཡང་ན།           ན་ཟིག་ཅི་ཡང་ཚོར་གྱི་མེད་དམ།

2

ང་ནི་དེ་རིང་དང་འདྲ་ཞིང་།

དེ་རིང་ནི་ཚོར་བའི་རི་རབ་འབྲི་པའི་སྙན་ངག་ཆེན་མོ་ཞིག་དང་འདྲ།

སྙན་ངག་ཆེན་མོ་དེ་ནི་ངའི་གཞལ་དཀའ་ཞིང་བརྗོད་ནུས་བྲལ་བའི་སེམས་པ་འདི་དང་འདྲ།

སེམས་པ་འདི་རི་རབ་ཀྱིས་ཤུགས་ཀྱིས་མནན་པའི་གྲོག་མ་ཞིག་དང་འདྲ།

གྲོག་མ་འདིས་རི་རབ་ཐེག་གམ།

རི་རབ་འདིས་གྲོག་གཅིར་ནུས་སམ།        

ཡང་སྙིང་གྲོག་མ་འདི་རི་རབ་ཀྱི་འོག་ནས་ཐར་འདོད་དམ།

3

ང་ནི་དེ་རིང་དང་འདྲ།

དེ་རིང་ནི་དབྱར་གཞུང་གི་དྲག་ཆར་ཞིག་དང་འདྲ།

རླུང་གི་གཅུས་ཕྱོགས་ཀྱིས་མཚམས་ཆད་ཅིང་།        ཡང་རླུང་གིས་འཁུར་ཕྱོགས་ཀྱིས་ཟོ་ལས་བྱོ་བ་དང་འདྲ།

ཆར་རླུང་རབ་ཏུ་དཀྲུགས་པའི་ཤ་འོད་ཁྲོད།

ཨ་མའི་སྐུ་ཕུང་སྡུག་བསྔལ་གྱིས་སྐྱེལ་དུས།   ཕ་རྒན་ཆུ་ཡིས་ཁྱེར་བའི་སྣོན་པ་ཞིག

ཨ་ཧོ།    དེ་རིང་གི་ང་།    ཡོངས་སུ་ས་ལ་འགྱེལ་བའི་ང་།

སྡུག་བཞི་བརྩེགས་ཁུར་ཏེ་ཡར་ལངས་ཐུབ་བམ།                ཡང་ན་ཡར་ལངས་འདོད་དམ།

4

ང་ནི་དེ་རིང་དང་འདྲ།

དེ་རིང་ནི་དགུན་ཁ་ཞིག་དང་འདྲ།

དགུན་ཁའི་སྣོད་བཅུད་ནི་ནུས་སྟོབས་ཞན་པའི་བྲན་གཡོག་ཅིག་དང་འདྲ།

སྡོང་ལོ་ས་ལ་ཐོར་ཞིང་ཡལ་གའང་སྐུམ་ནས་འདུག

གཙང་ཆུ་དར་ལ་འབྱར་ཞིང་ཆུ་སྒྲའང་དབེན།

སྤྲ་དང་སྤྲེའུ་བསྲེས་ཏེ་གྲོང་གི་སྒོ་ཁྱིམ་འགྲིམས།

སྒོ་དང་སྒེའུ་ཁུང་ལས་སྐེ་བསྲིངས་ཏེ་མྱ་ངམ་པའི་སྐད་ཕྲན་འབྱིན་འོང་དུས།

ཁང་པའི་ནང་གི་ང་ནི།              ཁྱོད་ལས་ཀྱང་མྱ་ངམ་ཞིང་།

སེམས་པ་ནི་སྔ་ས་ནས་ཁྱོད་ཀྱི་རྐང་ལག་ཇི་བཞིན་གྲང་ཞིང་འཁྱགས།

ཨ་ཧོ།              དགུན་ཁ་འདི་དེ་རིང་ཁོ་ནའི་འཇིག་རྟེན་ཡིན་ནམ།

ཡང་ན།           འཇིག་རྟེན་འདི་དེ་རིང་གི་དགུན་ཁ་དང་འདྲའམ།

དྲ་བའི་དོ་དམ་པ་ལགས། སྙན་ངག་སྔོན་མ་དེར་ངའི་མིང་འབྲི་རྒྱུ་བརྗེད་འདུག་པས་མིང་འདི་དང་གཅིག་པ་དགོད་རོགས།

རྩོམ་ཁུངས། ངེད་དྲ་བ།