_____ཧི་གཟུགས་ཟིན་བྲིས་ནང་གི་དྲ་གྲོགས་གཅན་མེ་སྟག མྱི་ཆེན།གཤེད་མ། ཐོགས་མདའ།སེང་རྡོར།སྒོ་ཡོན།ལྷམ་ཀོག ཁྱུང་བཟང་།ས་དཀྱིལ་ཚེ་བཀྲ་བཅས་ཕ་ཡུལ་གྱི་གྲོགས་པོ་ཡོངས་ལ་འཚམས་འདྲིའི་ཕྱིར་ཏུ་ཡིད་ལ་གང་ཤར་ཐད་ཀར་ཡིག་ཐོག་ཏུ་བྲིས་ནས་བསྐུར་བའི་སེམས་གཏམ་དམར་རྗེན་མ།
 
ས་མཐའི་སུན་སྣང་ལྕི་མོས་གཉའ་ནས་མནན།།
མི་ཚེའི་མདུན་ལམ་མ་རྙེད་མོག་མོག་ཅིག།
བདེན་རྫུན་དབྱེ་འབྱེད་དཀའ་བའི་མི་ཡུལ་ནས།།
བློས་ཐུབ་གྲོགས་ཀྱིས་བསླུས་པ་གྲངས་མ་མཆིས།།
 
གཞོན་དུས་བེའུ་རྫི་ལུག་རྫི་བྱེད་པ་ལས།།
སློབ་གྲྭའི་ཤེས་རིག་ཐེམ་སྐས་འཛེག་མྱོང་མེད།།
སྔོན་བསགས་ལས་དབང་བཙན་པོས་བསྐོས་ཐང་གིས།
ངུར་སྨྲིག་ངང་བ་སེར་བོའི་གྲལ་དུ་ཚུད།།
 
རིན་མེད་གོར་ཟས་གོར་ཆུ་ལེན་པ་འདི།།
རྒྱུ་འབྲས་རྒྱ་མའི་ཁ་ནས་གསུབ་ཐབས་བྲལ།།
དོན་མེད་སྲང་བར་འཁྱམས་ཏེ་མི་ཚེ་ཟད།།
གཟན་ཤམ་དམར་པོའི་འོག་ན་གཡོ་སྒྱུས་བཟི།།
 
ཕ་མ་གཉེན་ཉེའི་སེམས་དང་བསམ་པའི་ངོར།།
སྡོམ་ཁྲིམས་ཚུལ་བཞིན་སྲུང་བའི་དགེ་སློང་ཞིག།།
ངེས་དོན་རྩ་བཞིའི་སྲོག་རྩ་བརྟན་པ་ལས།།
གང་ཤེས་ཉམས་ལེན་མེད་པའི་འགལ་ཟླ་ཞིག།
 
བགྲང་བྱ་བཅུ་ཡི་རིང་ལ་ས་མཐའ་འདིར།།
ནང་བསྟན་གཞུང་ལུགས་ཟབ་མོ་འབད་ན་ཡང་།།
སྦྱངས་འབྲས་མིང་སྟོང་ལག་ཁྱེར་ཙམ་ཞིག་ལས།།
ནང་རྟོགས་ཡོན་ཏན་ཕྱོགས་ནས་ཁབ་ལས་ཕྲ།།
 
རྣམ་དཔྱོད་ཤེས་རབ་བདག་ལ་མི་དམན་ཡང་།།
རྣམ་གཡེང་ལེ་ལོའི་བུ་མོར་དགའ་དྲགས་པས།།
ཤེས་རིག་པདྨོ་འཐུ་བའི་ལྡུམ་ར་ནས།།
བླུན་རྒན་ཐང་ལ་བརྒྱབས་པ་གྲངས་མ་མཆིས།།
 
སྐྱོ་དུས་སྙན་ངག་བྲིས་ནས་རང་སེམས་གསོས།།
སྐྱིད་དུས་གྲོགས་ཀྱི་ཚོགས་ལ་ཁྱི་ལབ་འཐེན།།
མཚམས་མཚམས་དྲ་ཐོག་ཉུལ་ནས་ཟིན་བྲིས་སྤེལ།།
འདི་འདྲ་བྱས་ནས་འདུག་ཐབས་བྱེད་ཀྱིན་ཡོད།།
 
ལན་རེ་སྙན་པའི་གྲགས་པ་ཀུན་ལ་ཁྱབ།།
མཚམས་རེ་རྒུད་པའི་སྡོང་ལོ་ས་ལ་ཟགས།།
མི་རྟག་འཇའ་ཚོན་ལྟ་བུའི་མི་ཚེ་འདིས།།
ཕྲན་ལ་བརྙས་བཅོས་བྱས་པ་ཚོད་ཅིག་མེད།།
 
            ༼ཞར་བྱུང་དུ་བདག་གི་ཁོར་ཡུག་གི་གནས་སྟངས་ཅུང་ཙམ་གླེང་ན།༽
 
ཕ་རྒན་སེམས་དཔའི་བྱིན་བརླབས་བྱམས་བརྩེ་ལས།།
ངེད་ཅག་སྤུན་ཟླ་གསུམ་ལ་དཀའ་ངལ་མེད།།
བརྩེ་ཆེན་ཕ་ལོ་དགོངས་གྲངས་མཐོ་པོར་སླེབས།།
ཁ་ལན་སློག་མཁན་ལོ་རེར་ཇེ་མང་རེད།།
 
དགོན་པའི་ལས་སྣེ་ཀུན་གྱི་བསམ་བློ་དེ།།
ཅུང་ཙམ་ཡར་རྒྱས་ཕྱིན་པའི་དགའ་མོད་ཀྱང་།།
གཞོན་སྐྱེས་འགའ་རེ་རང་ལུགས་མ་མཆིས་པས།།
སྟོན་པའི་ལྟ་བ་རྩེད་མོའི་སྲོལ་དུ་བཞག།
 
གྲྭ་བཙུན་ཕལ་ཆེར་སྐྱ་མིན་སེར་མིན་རེད།།
སྐྱབས་འགྲོ་དད་པ་ཟེར་ན་ཁ་གཡང་ཙམ།།
བླ་སྤྲུལ་མང་ཤོས་ཕྱི་གླིང་ཡུལ་དུ་སོང་།།
མགོ་སེར་རྒན་མོའི་སྔུན་ན་ཁྱི་བཞིན་འདུར།།
 
ཕྱི་རྒྱལ་སྐད་ཡིག་ཟེར་དུས་འགྲམ་ཆུ་ཤོར།།
བོད་སྐད་བོད་ཡིག་བོར་ནས་ལོ་མང་ཕྱིན།།
སློབ་གྲྭ་ཕལ་ཆེའི་སྐད་ཡིག་བསྲེས་མ་རེད།།
བོད་སྐད་དག་མ་བཤད་མཁན་དཀོན་ཚོད་རེད།།
 
གྲྭ་བས་གྲུབ་མཐའ་སྦྱང་སྟངས་དགོད་སྐྱིད་རེད།།
རིག་འཕྲུལ་རྐྱང་བས་རང་སེམས་འཁྲུལ་བར་བྱས།།
གནམ་ལྡིང་ས་ལྡིང་བྱས་ཏེ་ཉེས་བ་བསགས།།
གཞུང་དོན་ཨ་མའི་འོ་མ་འཐུང་མཁན་ཉུང་།།
 
རབ་འབྱམས་ལག་ཁྱེར་ཐོབ་མཁན་མང་ན་ཡང་།།
བསམ་བློའི་ཤེས་ཚད་ཐད་ནས་རབ་རིབ་ཅིག།།
ལྷ་རབས་དགེ་བཤེས་ཐོབ་འདོད་ཧམ་སེམས་དེས།།
འགའ་རེས་རང་ཉིད་སྨྱོན་པའི་གྲལ་དུ་བརྫངས།།
 
གདན་ས་ལ་སོགས་རིས་མེད་དགོན་སྡེའི་ནང་།།
སྒོར་མོའི་གོ་གནས་གོང་མ་ལས་ཀྱང་མཐོ།།
སྒོར་མོ་མཐོང་ན་གུས་གུས་ཞུམ་ཞུམ་བྱེད།།
ཅང་མེད་རིག་ན་སྡང་མིག་ཐེངས་འགར་སྤྲད།།
 
ལེགས་པའི་ཕྱོགས་ནས་གླེང་ན་རྫོགས་མཐའ་མེད།།
སྐྱོན་གྱི་སྐོར་ནས་ཅུང་ཙམ་ཞུས་ཡོད་སྙམ།།
བློས་ཐུབ་གྲོགས་པོའི་བློ་ལ་འཆར་བདེའི་ཕྱིར།།
མངོན་བརྗོད་བརྡ་རྙིང་བདག་གིས་དོར་ཐབས་བྱས།།
                                                  ཕྱི་ལོ་2010/06/23་ཉིན་ཨ་རིག་དགེ་མཐོང་འབོད་པས་བྲིས་པའོ།།

རྩོམ་ཁུངས། ངེད་དྲ་བ།