_______________རྒན་མར་ཁུ་ལགས་ཀྱི་ཀུ་རེ་ཞིག་གི་འཕྲོར་ནས།
བརྩེ་དུང་གི་ཨུ་ཚུགས་དྲུད་དེ་རེ་སྨོན་གྱི་ནགས་ལ་ཆས་དུས
ས་སྲོད་ཀྱིས་བདས་བའི་ཆང་གི་གཙང་བོ་དང་རྔ་མ་མེད་པའི་ཁྱི་རྒན་ཧོན་ཐོར་དག
ལང་ཚོའི་གསོན་ཤུགས་དང་གཡབ་མོའི་འཛུམ་མདངས་ཁྲོད་དུ་འབུས་བའི་ཁྱོད་ཀྱི་རེ་སྨོན་འདྲ།

བྱིས་དུས་དང་རྫོབ་ཉམས་ཀྱིས་བྱུགས་པའི་གཏམ་རྒྱུད་ཡ་མ་བརླ།
ཁེར་རྐྱང་མེ་ཏོག་གི་ཡང་སྟེང་ནས་བཟི་འདུག་པའི་སྐྱོ་གར་རིང་མོ་དྲན་དུས།
མཛེས་བའི་བཟི་གཏམ་སྙན་མོས
རྒྱང་རིང་རྒྱང་རིང་ན་ལྷག་པའི་རྨི་ལམ་ངོ་མ་དེ་གཏོར་སོང་།

སེམས་པ་དང་སྙན་ངག་ནི་སྙན་ངག་པའི་ཉམ་ཆུང་གི་ཁོར་ཡུག་ཡིན་ལ།
ཨ་རག་དང་ཆུ་ནི་བརྩེ་བ་འཚོལ་བའི་བུ་ཆུང་གི་འཇིག་རྟེན་ཡིན།
ཆུ་ཡིས་གྲུབ་པའི་འཇིག་རྟེན།
ཆང་གིས་མྱོས་བའི་དུར་ཁྲོད།
ཡོད་ཚད་གཟིར་འདུག་པ་ང་ཁོ་ནས་རྟོགས་སོང་བ་འཕྱི་འདུག
ཁྱེད་ཀྱི་སེམས་ན་གནས་བའི་ཆུ       ཁྱེད་ཀྱི་སེམས་ལ་འཕྱུར་བའི་ཆང་གིས་མཚོན་ནུས་ན།
བློ་མིག་ཆགས་སྡང་གི་བསམ་བློ་ཡོད་ཚད      གཞན་གྱིས་འགོག་ཐབས་མེད་པ་ཅི་རེད།
ཐམས་ཅད་སྔོན་དུ་འཐེན་ནས་ཡོད་ཚད་རྗེས་སུ་བསྐྱུར།
ཁྱེད་ཀྱིས་ཆང་ལ་བཅངས་བའི་ནག་ཉེས
ཁྱེད་རང་སྨྱོས་བའི་རྗེས་ཀྱི་ཆུ་ཡིན་ནམ།

                             ལན་གྲུ་ཡི་ཆང་ཁང་ཞིག་ནས་ཕྱིར་ལོག་ཏེ་མལ་ཁང་ནས་སྦྱར།

རྩོམ་ཁུངས། ངེད་དྲ་བ།