འགྱོད་ཡོང༌།
དྲིན་ཅན་མ་ལོས་ངལ་བ་བརྒྱ་ཡིས།།
བསགས་བསགས་གྲུང་གྲུང་བྱས་པའི་འབྲས་བུ།།
རྣམ་གཡེང་ལེ་ལོས་འཁྱམས་པའི་འཚོ་བར།།
ཕངས་མེད་བརྗེས་ན་ཕྱིས་ནས་འགྱོད་ཡོང།།
ཕ་མ་སྤུན་མཆེད་རྒྱབ་ཏུ་བསྐྱུར་ནས།།
ངལ་བ་ཁྲི་ཕྲག་ཁུར་དུ་བླངས་ཀྱང༌།།
རྒྱུས་མེད་ཡུལ་དུ་ཁྱི་ལྟར་འཁྱམས་ན།།
ལང་འཚོའི་མེ་ཏོག་སད་ཀྱིས་ཁྱེར་ཡོང༌།།
ཨ་གསར་རྟ་ཕོའི་བང་འགྲོས་བྲེལ་ནས།།
ཕན་གནོད་ཡོད་མེད་རྟོག་ཞིབ་མེད་པར།།
ལག་ཏུ་ཐོགས་ཚད་ཁུག་མར་བཅུག་ན།།
དུག་ཅན་སྦྲུལ་གྱི་ཁ་རླངས་ཕོག་ཡོང༌།།
ཁ་ཕོ་ཆེན་པོས་འབྲུག་སྟོང་བསྒྲགས་ཀྱང༌།།
དངོས་ཐོག་བདེན་འཚོལ་ཆར་རྒྱུན་མེད་ན།།
ཁ་བཤད་དོན་སྟོང་མཚང་འབྱིན་ཆོ་ལོ།།
མི་འདོད་རིན་གྱིས་ཉོ་དུས་འགྱོད་ཡོང༌།།
ངན་པ་དགུ་སྒྲིལ་བསམ་བློ་སྐྱུར་མོས།།
རང་གཞན་ཕན་མེད་སྦྱོར་ངན་བསྟར་ན།།
གཤིན་རྗེའི་ཕོ་ཉས་ཞགས་ནག་འཕེན་དུས།།
བྲོས་པའི་གནས་མེད་འགྱོད་དུས་ཕྱིས་ཡོང།།
ལྕེ་རྩེ་དམར་པོ་ཕྱོགས་བཅུར་བརྐྱངས་ནས།།
ཞི་བའི་བསྟི་གནས་ཞོ་ལྟར་དཀྲུགས་ན།།
དྲང་བདེན་ཁྲིམས་ཀྱི་ལྕགས་ཀྱུ་རྣོ་མོས།།
ལྷེབ་ལྷེབ་འགུལ་བའི་མཆུ་འདབ་གཏུབ་ཡོང༌།།
རང་གི་རིག་གཞུང་རྒན་པོ་སུག་འཁྱོག།
གཞན་གྱི་རིག་གཞུང་ལྷམ་ཀྲད་མཐིལ་བརྡོལ།།
ཅི་ཡང་མེད་པའི་སྤྲང་པོ་ལག་སྟོང༌།།
འཚོ་བའི་གཡུལ་སར་ཆས་དུས་འགྱོད་ཡོང༌།།
སྦྲ་གུར་ལེབ་མོར་གཉིད་ལ་ཤོར་ཏེ།།
དུས་རབས་དམག་གི་རྡོག་སྒྲ་མ་ཐོས།།
ཚན་རིག་བུ་མོའི་འགྲམ་ལྕག་ཚ་པོ།།
ཡང་ཡང་བཟེད་དགོས་འབྱུང་ན་འགྱོད་ཡོང༌།།
གཞུང་དྲང་མདའ་མོ་འཁྱོག་ལ་བཅུས་ཏེ།།
ཁྲེལ་མེད་བུ་ཡི་བྲོ་གར་འཁྲབ་ན།།
ཨ་ཁུ་སྟོན་པའི་རིག་འཁྲུལ་རྣོ་མོས།།
ཕ་གཞིས་འཕྲོག་པའི་དུས་ན་འགྱོད་ཡོང༌།།
ཁྱི་ཕག་གཉིས་ཀྱི་འདུ་ཤེས་བསྐྱངས་ནས།།
ལྟོ་ཕྱེ་ཙམ་ལ་ཞེན་པ་མཐུག་ན།།
ཁོ་ལག་རྒྱས་པའི་ལང་ཚོའི་མེ་ཏོག།།
མི་མངོན་དབྱིངས་སུ་ཐིམ་དུས་འགྱོད་ཡོང༌།།
འཕྱོན་མོའི་གོས་རྒྱན་མནབས་པ་མེད་ཀྱང༌།།
ཉིན་མཚན་རེ་མོས་ཁྱོ་བོ་བསྟེན་ཏེ།།
ངེས་མེད་ཕ་ཡི་བུ་ཚ་བཙའ་དུས།།
མི་འདོད་འགྱོད་པའི་གླིང་ལ་འཁོར་ཡོང༌།།
རྩོམ་ཁུངས། ངེད་དྲ་བ།