ཁྱོད་རང་གང་ནས་མགོ་འཁོར་བ་བཞིན་ཅིའི་ཕྱིར་འདི་རུ་སླེབས་ཤིང་།

འདི་ནས་ཀྱང་རྒྱུ་མཚན་དང་དམིགས་ཡུལ་མེད་པར་འདི་ལྟར་གཞན་དུ་བཞུད་དགོས་འང་། དོན་དམ་དུ་ཁྱོད་ཀྱིས་ཁ་ནས་ཅི་ཞིག་གླེང་སྟེ་ལག་ཏུ་གང་ཞིག་སྒྲུབ་ཀྱིན་ཡོད། ཁྱོད་ཀྱི་ཐོབ་བྱ་ནི་མཐར་ཐུག་གི་ཕུན་ཚོགས་ཤིག་དང་བདེ་སྐྱིད་དེ་ལགས་ན། འཁོར་བའི་ཆང་ཁང་དུ་ཁྱོད་རང་ཕག་ཉལ་གྱིས་གར་ལ་རོལ་བ་འམ་ཡང་ན་རང་གི་དམིགས་དབེན་དེའི་ལྡོག་ཕྱོགས་ནས་འགྲེང་ཡོད་པ་ལའང་འདྲི་རྟོག་ཐེངས་གཅིག་བགྱིས་མྱོང་ངམ།

མ་གཞི་ནས་ཁྱོད་རང་གིས་བདམས་ཟིན་པའི་ལམ་ག་འདི་ལ་སོམ་ཉི་དང་ལོག་རྟོག་གི་གོང་བུ་ཞིག་ཡིན་ན། ངུར་སྨྲིག་གི་རྒྱན་གོས་དེ་ནི་རང་ཉིད་སྡོམ་བྱེད་ཀྱི་འཆིང་ཐག་ཙམ། ལུས་པོ་དེ་ལྷ་ཁང་དུ་བརྗིད་ཀྱང་རུང་། ཕུགས་འདུན་གྱི་ནོར་བུ་གྲོང་ཡུལ་དུ་སྟོར་བ་ནི་རང་དབང་གིས་དབེན་པའི་ཚེ་གང་གི་བཙོན་མ་ཞིག

ཁྱོད་ནི་ཁ་དན་ཚིག་ལ་གནས་ཐུབ་པའི་དམ་པ་ཞིག་མ་ཡིན་ཏེ། སྡར་མ་ཁས་འཆེ་ལ་དཔའ་བ་ཙམ་དེས། ལུས་ཀྱི་གཡོ་སྟངས་སམ་སེམས་ཀྱི་འགྱུ་ཕྱོགས་ཐེངས་གཅིག་གིས་ཀྱང་སྡིག་པའི་རྣམ་སྨིན་ཆར་བཞིན་འབབ་སྲིད། ཁྱོད་ལ་ཐོབ་པའི་ཟས་ཁམ་གང་གི་ལན་ཆགས་ཀྱི་བུ་ལོན་དེ་ཡང་ས་ཆེན་པོ་འདི་བཞིན་ཧ་ཅང་ཐེག་དཀའ་བར་བཤད། མདུན་རྒྱབ་ཀྱི་གཡང་གཟར་ལས་སྲུང་བའི་དཔྱོད་ཤེས་ཀྱི་མིག་ཅིག་ཁྱོད་ལའང་ཡོད་ཆོག་པས། རང་ཉིད་བསླུ་བྲིད་ཀྱི་དོང་ཞབས་སུ་རྫོང་དོན་ག་ལ་ཡོད། ཁྱོད་ཀྱིས་མ་རྒན་སེམས་ཅན་གྱི་སྡུག་བསྔལ་ཁུར་དུ་འདེགས་བཟོད་ན་ཉམ་ཆུང་ཚོའི་ཤ་ཁྲག་ལ་འདི་ལྟར་རྔམ་དོན་ཅི་ཡིན། ལོངས་སྤྱོད་ལ་ཞེན་ཐག་ཆོད་པ་དེས་ས་ལམ་ཉམས་རྟོགས་ཀྱི་གཞི་རྩ་རུ་གོ་ཡོད་ན་འཁོར་བ་ལ་འདི་ལྟར་ཨ་འཐས་སུ་ཞེན་དོན་གང་ཡིན། ཁྱོད་རང་གི་སྟོན་པ་ལ་ཡིད་ཆེས་ཀྱི་ཚད་མས་ཕྱུག་པ་ཞིག་ཡིན་ན་ལས་འབྲས་ལ་འདི་ལྟར་རྡོག་རོལ་གཏོང་དོན་ཅི་ཡིན། ཚ་གྲང་དང་བཀྲེས་སྐོམ་གྱིས་གཟིར་བའི་ས་འོག་གི་རྣམ་ཤེས་གྲངས་མེད་ཀྱིས་རེ་བའི་ལག་ཟུང་ཁྱེད་ལ་བཟེད་ཡོད་ཟེར། ས་སྟེང་དུའང་ངུ་ངག་དང་གསོལ་འདེབས་ཀྱི་དབྱངས་རྟ་སྣ་ཚོགས་ཀྱིས་མི་འདོད་པའི་བར་ཆད་མཐའ་དག་སེལ་བའི་སྐྱབས་འཇུག་ཁྱོད་ལ་ཞུས་ཡོད།

ཁྱོད་ནི་སྲིད་པ་ན་གནས་ཀྱང་སྲིད་པའི་སྐྱོན་གྱིས་མི་གོས་པའི་རྒྱལ་སྲས་སེམས་དཔའ་ཞིག་ཡིན་ན་ཅི་མ་རུང་། ཁྱོད་ནི་རྩ་རླུང་ཤེས་གསུམ་ལ་རང་དབང་ཐོབ་པའི་རྟོགས་ལྡན་གྱི་འདྲེན་པ་བ་ཞིག་ཡིན་ན་ཅི་མ་རུང་། ཁྱོད་ནི་ལྕགས་གོང་དམར་འབར་བ་ལོངས་སུ་སྤྱོད་ནུས་པའི་རྣམ་དག་ཁྲིམས་ལྡན་གྱི་དགེ་སློང་ཞིག་ཡིན་ན་ཅི་མ་རུང་། ཡིན་ཡང་ཁྱོད་ལ་ལྷུན་པོ་ཁུར་དུ་འདེགས་ཐུབ་པའི་ཁྱབ་འཇུག་གི་སྙིང་སྟོབས་ཤིག་ག་ལ་མཆིས། བཙན་དུག་སྨན་དུ་སྒྱུར་ནུས་པའི་མ་ཡུ་རའི་འཕྲུལ་ཐབས་དེ་འདྲའང་ཁྱོད་ཀྱིས་གང་ལ་ཤེས། སྲིད་གསུམ་གྱི་རྒྱ་ཁྱོན་སྟོབས་ཀྱིས་འཇལ་བའི་མིའི་ཐུང་གི་མཆོངས་རྩལ་ཞིག་ཁྱོད་ལ་ཡོད་མི་སྲིད། དེ་བས་ཁྱོད་ནི་འཁོར་བའི་ནག་ཉེས་གསོག་པའི་གཞི་རྟེན་ཏེ། ཉོན་མོངས་བདག་འཛིན་གྱི་ཁ་ཟས་ཙམ་དུ་གྱུར་ཀྱང་། ཡིད་རྟོན་དང་གོ་རིམ་མེད་པའི་ཕུང་སུམ་པའི་སྐྱོ་གར་དེའི་རྗེས་སུ། རང་འཐག་བཞིན་འཁོར་བའི་ཡན་ལག་བཅུ་གཉིས་ཀྱིས་ཁྱོད་ཀྱི་ལུས་སྲོག་ལན་བརྒྱར་ཕྱེ་མར་འཐག་དགོས་ཨང་། མེ་ལྟར་ཚ་བའི་ཆགས་སྡང་། གློག་བཞིན་འགྱུ་བའི་གཡོ་ཟོལ། ཤིང་ལྟར་རེངས་པའི་ཞེ་རྒྱུད། དུག་ཚེར་བཞིན་གཟེངས་པའི་རྩུབ་སྤྱོད། འདི་དག་ནི་ངལ་བ་སྟོང་ཕྲག་གིས་གཞུང་ལུགས་ཀྱི་རྒྱ་མཚོ་བསྲུབས་པའི་ཉིང་ཁུ་དེ་ཡིན་ནམ། འདི་དག་ནི་མི་ཚེ་གང་བོར་སྙིང་རྗེ་དང་བདག་མེད་པར་གོམས་པའི་མཇུག་འབྲས་དེ་སྨིན་པ་ཡིན་ནམ། རླུང་བུ་བཞིན་གང་སར་སྣང་བའི་གར་གྱི་སྣང་བརྙན་དང་། འབག་གི་གྲངས་ཀ   སྔོན་གྱི་ཕྱག་ལེན་ཙམ་གྱིས་ཆོས་ཀྱི་སྙིང་བོ་ཞིག་གང་ནས་མཚོན་ཐུབ།

དེའི་ཕྱིར་ཁྱོད་དང་ཁྱོད་ལྟ་བུའི་བཅོས་མ་དེ་ཚོའང་། སྡེ་སྣོད་ཀྱི་རྒྱ་མཚོ་ལྗགས་རྩེ་ན་འཁྱིལ་ཞིང་འཕྱོ་ལ། ཐབས་ཤེས་ཀྱི་ཉི་ཟླ་སྙིང་ཁོང་ན་གསལ་ཞིང་བཀྲ་བའི་སྐྱེས་ཆེན་དེ་ཚོ་དང་འདྲ་ན་ཅིའི་ཕྱིར་མ་ཆོག

ཆོས་དབྱིངས་ཀྱི་སྒོ་མོ་དེ་ནི་རང་དབང་གི་མཁའ་ལམ་ཞིག་དང་འདྲ་ལ། མཁའ་ལམ་དེ་རུ་ཁྱོད་རང་བདེ་སྐྱིད་ཀྱི་གླིང་ཀ་གཞན་ཞིག་ཏུ་འཕུར་སྐྱོད་ཐུབ་པའི་གདེངས་ཚོད་ཀྱི་སྤོབས་པ་ཅི་བས་ཀྱང་དབེན་ན། འཁོར་འདས་ཀྱི་རི་མོ་གསལ་བའི་སྡེ་སྣོད་ཀྱི་དེབ་ཐེར་དེ་ཤ་ཐང་ཐང་གིས་ལྕེ་མ་རལ་ཙམ་དུ་བཀླགས་པའི་ཡང་དགོས་ཀྱི་མེ་ཏོག་ཅིག་གང་དུ་སྨིན་ཐུབ། སྲིད་པ་དང་ཞི་བའི་ཉེ་ཞོས་མ་རེག་པའི་དག་གཙང་ལྷད་མེད་པའི་ལྐོག་གྱུར་གྱི་མེ་ཏོག་དེའི་མཛེས་སྡུག  འོ་ན་སུ་ཡིས་དུས་གཏན་དུ་མྱོང་སྲིད།

གང་ལྟར་ཡང་། དྲང་སྲོང་ཐུབ་པ་ཚོས་སེམས་རྟེན་དུ་ཉར་བའི་གསེར་གྱི་འཁར་གསིལ་དེ་གཞན་མགོ་འཇོམས་བྱེད་ཀྱི་ཐོ་བ་མི་བྱེད་རོགས། ཡབ་མེས་དམ་པ་ཚོའི་ལུང་རིགས་ཀྱི་གདན་ས་དེ་རང་གི་ཁེ་གྲགས་དང་འཚོ་རྟེན་ཙམ་གཉེར་སའི་འཁོར་བའི་ཁྱིམ་གཞིས་ཤིག་ཏུ་མི་བསམ་རོགས། ཞི་བ་དང་བདེ་བའི་གསོས་སྨན་དུ་འབབ་པའི་དྭངས་གཙང་གི་སྨན་ཆབ་དེར་རང་གི་ནག་ཉེས་ཀྱི་དུག་ཆུ་མི་བསྲེ་རོགས། ངོ་མཚར་གྱི་བདེ་དྲོད་ཅིག་འཚོལ་སྙེག་བྱེད་འདོད་པའི་ཁྱོད་རང་། ད་དུང་རང་ཉིད་བགྲོད་ས་དེའི་ཆེས་མ་མཐའི་སྒོ་ཐེམ་གཅིག་ལས་ཀྱང་བརྒལ་ཐུབ་མེད་པ་གཞི་ནས་རྟོགས་པར་གྱིས། མཁྱེན་པར་གསོལ།

                                                                                                                                       ༢༠༡༠ ༥ ༢༤

རྩོམ་ཁུངས། ངེད་དྲ་བ།