སུ་ཡིས་གྲོགས་སུ་སྦྲན་པའི་རེ་བ་མེད།།
གང་ཞིག་ཐོབ་ན་འདོད་པའི་བློ་དེ་མེད།།
འགལ་འདུ་སྟོང་གི་གཡང་སར་བསྐྱོད་དགོས་ཀྱང་།།
རང་སེམས་རང་གིས་སྲུང་བའི་དམ་བཅའ་ཡོད།།
 
ཅི་ཞིག་བདེན་པའི་ཚུལ་དེ་ངས་མ་རྟོགས།།
སུ་ཞིག་བསླུ་མེད་ཡིན་པ་ངས་མ་ཤེས།།
གནམ་སའི་བར་སྟོང་འདེགས་པའི་ཀ་བ་དེ།།
རང་རྟོག་བསམ་བློ་ཡིན་པར་ཡིད་ཆེས་ཐལ།།
 
ཕོ་ཚོད་ཆེ་བ་འབྲོང་གི་དོ་ཟླ་མིན།།
ནུས་མེད་གནག་གསོག་དག་ལས་དམན་པ་མིན།།
མགོ་མཇུག་ལྡོག་པའི་སྐད་ཆ་ཅི་བཤད་ཀྱང་།།
རང་གཤིས་རང་གིས་སྲུང་བའི་སྤོབས་པ་དགོས།།
 
ཡང་དག་དད་པས་རང་རྟོག་བསམ་བློ་འགོག།
མི་དོན་ཕལ་བས་སྤྱི་ཚོགས་གཡང་སར་བསྐྱལ།།
ཤེས་མེད་ཅོལ་ཆུང་དག་གི་ཁ་སྒོ་ན།།
རྩམ་སྐྱ་རླུང་གིས་སྤུར་བའི་རྟགས་ཤིག་འདུག།
 
རི་རབ་སྟོབས་ཀྱིས་སྒུལ་བའི་མཐུ་མེད་ཀྱང་།།
གོམ་གང་མདུན་བསྐྱོད་མེད་པའི་ཞ་བོ་མིན།།
འོན་ཀྱང་གྲོག་མ་དག་གི་བགྲོད་ལམ་དུ།།
རྐང་རྗེས་གཅིག་ཀྱང་མེད་པ་ཡ་མཚན་ཉིད།།
 
མགོ་བོ་ལྷ་ཡིས་གནང་བར་ཡིད་ཆེས་མཁན།།
འུ་ཚོའི་མི་དག་སྨྱོན་པའི་ཁྱི་སྤྱང་འདྲ།།
མཐར་ཐུག་དམིགས་པའི་འཇུ་ས་མ་རྙེད་ཀྱང་།།
འ་འུར་སྒྲོག་པའི་སྐད་སྒྲ་རྒྱུན་མི་ཆད།།
 
ལམ་ཁ་མེད་སར་འདུར་བའི་བོང་རྒན་དེས།
ཇི་བཤད་ཆག་འཇོག་མཁན་ཞིག་ང་མིན་ཀྱང་།།
རྒྱུ་མཚན་མེད་པར་ཟུག་པའི་ཀུ་ཅོ་དེར།།
སུན་པའི་སྣང་བ་ཁྱོད་ལ་དཀོན་ཚོད་གདའ།།
 
རྐང་གཉིས་མི་ལ་དབང་བའི་འཇིག་རྟེན་འདི།།
མཐོ་དམའ་མེད་པར་འཇུག་པའི་ལམ་ཞིག་ཡིན།།
དེས་ཀྱང་ཤེས་རབ་གསར་བའི་ཁྱིམ་གཞིས་ཤིག།
འཚོལ་བར་འདོད་པའི་ལམ་ཞིག་བདག་ལ་བསྟན།།
 
མི་མཐོང་བློ་ཡི་རྒྱལ་ཁམས་ཉུལ་བ་པོ།།
ཁྱོད་ཀྱི་གྲོགས་སུ་གཏན་ནས་མི་འོས་ཀྱང་།།
ཡོད་ཚད་ཞྭ་བཞིན་བཀུར་བའི་ནད་རྙིང་དེ།།
སྔར་ནས་རྩ་སྐྱ་བཞིན་དུ་དོར་ནས་ཡོད།།
 
རྒྱུན་པར་དད་པའི་བ་སྤུ་གཡོ་མཁན་ཚོ།།
གནད་ལ་ཁེལ་དུས་ཅི་འདུག་གསལ་ནས་ཡོད།།
ཕྱི་ཤུན་བརྟོལ་ནས་ནང་དུ་བལྟས་པའི་ཚེ།།
དད་པའི་ས་བོན་རལ་བའི་རྟགས་ཤིག་མཐོང་།།
 
འདོད་དུང་འགོག་པའི་ཉམས་ལེན་ཅང་མེད་པས།།
དག་སྣང་མིག་ཤེལ་ཅན་གྱིས་དགྲ་རུ་བརྩི།།
འོན་ཀྱང་སེམས་ཀྱི་བརྒྱུད་སྒོ་རེ་རེ་ན།།
འཁྲུལ་སྤོང་ཐལ་བ་བཟློག་པའི་བློ་མིག་ཡོད།

རྩོམ་ཁུངས། ངེད་དྲ་བ།