འགྱིག་གི་མུ་ཏིག་མང་།།
ཤིང་གི་མཛུབ་དཀྲིས་མང་།།
ཝུ་བའི་སྐེ་བརྒྱན་མང་།།
ཕྱི་སའི་དུས་ཚོད་མང་།།

དགོས་མེད་ཚོགས་འདུ་མང་།།
དུས་ཚོད་བརླག་པ་མང་།།
ཁ་པར་ཅོང་སྒྲ་མང་།།
ལབ་རྒྱུ་མེད་པ་མང་།།

ཕྱི་བལྟས་བསྡམས་པ་མང་།།
ནང་བལྟས་གྲོལ་བ་མང་།།
ཁ་ལ་ལྕགས་ཟྭ་མང་།།
སྟུ་ལ་འཁྲབ་རྒྱུ་མང་།།

བུད་མེད་ཁྱི་ཁྲིད་མང་།།
བྱིས་པ་ལྕགས་དྲུད་མང་།།
བླ་མ་རླིག་དྲུད་མང་།།
ཚོང་བ་འདྲེ་ཁྲིད་མང་།།

གྲྭ་སར་ཁོལ་ལི་མང་།།
སློབ་རར་སྦི་ཆང་མང་།།
འཐུང་རྗེས་རྩོད་པ་མང་།།
བརྩད་རྗེས་འཛིང་བ་མང་།།

མཐོ་སར་ས་ཡོམ་མང་།།
དམའ་སར་ཆུ་ལོག་མང་།།
གཤོང་སར་ཐན་པ་མང་།།
གང་སར་འཇིགས་པ་མང་།།

ཁ་ཆུ་ལྡག་མཁན་མང་།།
དུག་ཆུ་འཐུང་མཁན་མང་།།
དོང་ཆུ་རྐོ་མཁན་མང་།།
བདུད་རྩི་རྙོག་མཁན་མང་།།

བཅོས་མའི་སྙན་ངག་མང་།།
བརྫུས་མའི་མགུར་གླུ་མང་།།
བསླད་མའི་ལྟ་བ་མང་།།
བརྐུས་མའི་རིག་པ་མང་།།

རྩོམ་ཁུངས། ངེད་དྲ་བ།