མཚན་ལྗོངས་འདིའི་ཕྱི་ནང་ཀུན་ཏུ
གནས་ཚང་དྲོན་མོ་ཞིག་ལ་ཡང་ཡང་སྒོམ་དུས
གྲྭ་རྐྱང་ངས     རང་ཉིད་ཀྱི་མེ་ལོང་ལ་སླར་ཡང་བལྟ་དགོས་བྱུང
ཅི་ཡང་མེད་པའི་སྔ་གཞུག་ལ་ཞིབ་འདང་རེ་བརྒྱབ་ན
རུས་གསེང་ནས་ན་ཟུག་ཞིག་ལངས་ལ
རྩེད་ར་ཆུང་ཆུང་ཞིག་གི་ངོ་གདོང་དམར་པོའང་དྲན་འོང
དོ་ནུབ     ཅི་ཞིག་ལ་ངང་སྒུག་བྱེད་པ་ནང་བཞིན
སུན་སྣང་གི་གོམ་ཁ་ཡུན་གྱིས་ལྷོད་དུས
བདག་གི་རྣ་ལམ་དུ་མཆེད་པའི་རྡོག་སྒྲ་ལྕི་མོ་དེ
གློ་བུར་དུ      ཁེར་རྐྱང་གིས་གྲགས་འོང་བ་ཚོར
 
ཟླ་འོད་ཀྱི་མཛེས་སྡུག་གྱོན་པའི་རྡོ་གཅལ་སྟེང
མི་ལོ་བཅོ་ལྔའི་ལང་ཚོ་ཚོར་མེད་དུ་ཡལ་བ་རྟོགས་རྗེས
ངས    ཡང་བསྐྱར་གཟན་སྣེ་འཐེན་ཙམ་བྱས་ཏེ
རྣམ་ཤེས་གྲངས་མེད་རུམ་པའི་རྡོ་གཅལ་ལ་ཡང་ཡང་ཅེར
 
གསལ་ལ་མི་གསལ་བའི་ཕུག་རོན་གྱི་ངུ་སྐད་ཁྲོད
ལྷ་ཚོགས་སྔས་མགོར་རེ་སྨོན་བསྟར་ནའང
ལྷོ་བཞུད་ཀྱི་བྱ་ཁྱུའི་ལས་དབང་ནག་པོ
གྲྭ་རྐྱང་ངའི     སྙིང་དབུས་སུ་བཞུར་བའི་མིག་ཆུ་བཞིན་ཧ་ཅང་འཁྱག
ཨ་ཨ    དཀོན་མཆོག་མཁྱེན
འཚོ་སྟངས་འདིས་བསླུས་པ་མིན་ན
ཁེར་རྐྱང་གི་སྐྱོ་ངལ་བརྩེགས་མི་འདོད་ཨང
                                                      ༢༠༠༨ལོའི་ཟླ༦ཚེས༡༢ལ།

རྩོམ་ཁུངས། ངེད་དྲ་བ།