ཀ་ཁ་སུམ་ཅུས་བསྐྲུན་པའི་རིག་གནས་འདི།།
ཁ་བ་ཅན་གྱི་བླ་རི་སྨུག་པོ་ཡིན།།
ག་ནས་བལྟས་ཀྱང་རིན་ཐང་མི་དམན་པས།།
ང་ཚོས་བླ་རི་བདག་བཟུང་བྱས་ན་འོས།།
ཅ་དག་སྐད་དང་ཡི་གེ་མི་སློབ་པར །།
ཆ་ལུགས་ཕྱི་གོས་ཙམ་གྱིས་བོད་ཟེར་ན།།
ཇ་ཆང་མཉམ་བསྲེས་བྱས་པའི་བཏུང་བ་ལྟར།།
ཉ་ཉོག་འདྲེས་པའི་ཚོར་བ་ཅིས་མི་སྟེར།།
ཏ་ལའི་ཀློང་དུ་ཆུ་སྣ་འདུས་པ་ལྟར།།
ཐ་དད་སྐད་རིགས་ཤེས་ན་བཟང་མོད་ཀྱང་།།
ད་ལྟ་རང་སྐད་རང་གིས་མ་བསླབས་ན།།
ན་གཞོན་ང་ཚོ་མེས་པའི་ཞབས་འདྲེན་ཡིན།།
པ་པ་ཨ་མ་བསྲེས་ན་སྙན་རྒྱུ་མེད།།
ཕ་མེས་ཤུལ་འཛིན་མ་ཉན་བུ་རབ་མིན།།
བ་འབྲི་སྡེབ་པའི་རིགས་རྒྱུད་ཕུང་གསུམ་ཞིག།
མ་འགྱངས་གངས་རིའི་སུལ་དུ་འབྱུང་ཉེན་ཆེ།།
ཙ་རིའི་ཡུལ་ལྗོངས་མ་འགྱུར་སྔོན་ལྟར་བཀྲ།
ཚ་གྲང་ནམ་ཟླའི་ཆོས་ཉིད་མ་ལོག་ཀྱང་།།
ཛ་ཡའི་གསུང་རབ་དར་བའི་ཡུལ་ཁམས་འདིར།།
ཝ་མ་ཝོལ་ལ་གཞན་རྗེས་སྨོན་པ་མང་།།
ཞྭ་མོ་གོས་རྒྱན་ཙམ་གྱིས་བོད་རིགས་མིན།།
ཟ་འཐུང་སུན་གྱི་སྤྱི་མཐུན་རིག་གནས་འདིས།།
འ་ཅག་གངས་ཅན་པ་ཡི་ཆོས་མཚོན་པས།།
ཡ་ཐོད་གཙུག་ནས་འདང་རེ་བརྒྱག་རན་རེད།།
ར་ལུག་འཚོ་སྐྱོང་ལས་ལ་བསྐོས་པ་མིན།།
ལ་རྒྱ་བསམས་ན་རིག་པའི་གནས་ལ་སྦྱོངས།།
ཤ་ཚ་ཆེ་ན་བུ་ལ་ཡོན་ཏན་སློབས།།
ས་སྟེང་མིའི་རིགས་གྲལ་དུ་ཚུད་ན་ལེགས།།
ཧ་ཅང་རིན་ཐང་ཆེ་བའི་རིག་གནས་འདི།།
ཧ་ལམ་སྟོང་ལ་ཉེ་བ་འདི་མཐོང་ཚེ། །
ཨ་ཙི་སྙིང་ཁོང་རུས་པས་མ་བཟོད་པས།།
ཨ་རོགས་སྤུན་ཟླའི་སྙན་དུ་གསལ་ཞིག་བཏབ།།
                            ༢༠༠༨. ༧.༧ ཉིན་སྦྱར།

རྩོམ་ཁུངས། ངེད་དྲ་བ།