ངས་འདི་ལྟར་ཞུའང་སྲིད།
རྒྱུ་སྐར་གྱི་རྒྱལ་བོ་ཁོང་དགོད་ཤོར་ཏེ་
སྐར་ཚོམས་མང་བོས་རམ་འདེགས་ཀྱི་ཧབ་ཆ་བརྒྱབ་ཀྱང་
ངོ་ཚ་ཡིས་མགོ་བོ་བྲང་གཞུང་ལ་སྨད་དེ་
གོམ་པ་རེ་རེ་དྲོད་ཀྱིས་བརྟས་པའི་ཁྱིམ་གཞི་ཞིག་གི་ཆེད་དུ་སྤོས་པས་
ང་ལ་སྒོ་འབྱེད་རོགས
ཚ་ལམ་ལམ་གྱི་རུམ་ཁོང་ལ་རྔམ་དྲགས་པས་
མི་ཁ་རྣོན་པོ་སྟོབས་ཀྱིས་བཅག་སྟེ་
མ་འོངས་བའི་བུ་ཆུང་སྙིང་རྗེ་བོ་དེའི་ཆེད་དུའམ་
ཡོད་ཚད་ཀྱི་ཚབ་ཏུ་རེ་བ་ལན་གཅིག་ཞུས་པས་
ང་ལ་རུམ་ཕྱེ་རོགས
ཁྱེད་ཀྱི་བརྩོན་པ་ང་ཡིས་བརླགས་ཤིང་
ང་ཡི་སེམས་པ་ཁྱེད་ཀྱིས་ཁྱེར་བས་
ཆེས་ཐོག་མའི་བརྩེ་བ་སྣུམ་པོ་ཡིན་ཆོག་ལ་
ཆེས་མཐའ་མའི་གྱེས་བྲལ་སྐྱུར་བོ་ཡིན་ཡང་
ང་ལ་འོ་ཞིག་བྱོས
ད་དུང་ངས་འདི་ལྟར་ཞུའང་སྲིད．．．．．．
༢༠༠༩ ༥ ༧ལ་སློབ་གླིང་དུ།
རྩོམ་ཁུངས། ངེད་དྲ་བ།