ངའི་མ་འོངས་བའི་ཆུང་མ་
བརྩེ་བ་རྐྱང་རྐྱང་སྒྱེ་གང་འཁུར་ནས་
ཅི་ཞིག་ཐོབ་འདོད་ཀྱི་རེ་བ་དང་ལྷན་དུ་
ཅི་ཞིག་སྤྱོད་འདོད་ཀྱི་མོས་པ་དང་མཉམ་དུ་
གོམ་པ་རེ་རེ་ཤུགས་ཀྱིས་སྤོ་བཞིན་ཡོད་དམ་
ངས་ཀྱང་དུངས་པ་ཁྲི་ཚོ་ཁྲི་ཚོ་རྩི་ནས་འོང་བཞིན་ཡོད་
 
ངའི་མ་འོངས་བའི་ཆུང་མ་
འུ་གཉིས་ཀྱི་ཁྱིམ་གཞི་དེའི་ཆེད་དུ་
སྐྱུར་དགོས་པ་ཐམས་ཅད་སྐྱུར་ནས་
ཁུར་འོས་པ་ཡོད་ཚད་ཁུར་ཏེ་
སྣེ་གང་ཞིག་ནས་ལམ་ལ་ཆས་ཏེ་
ཡུལ་གང་ཞིག་ནས་མངོན་རྩིས་ཡོད་
ངས་ཀྱང་མེ་ཏོག་རྐང་གཅིག་གྲ་སྒྲིག་བྱས་ནས་ཡོད
 
ངའི་མ་འོངས་བའི་ཆུང་མ་
བསྙལ་ནས་ལོ་མང་འགོར་བའི་རྒུན་ཆང་ཕོར་བ་གང་བོ་
འཇམ་མཉེན་གྱི་ལག་ཟུང་ལ་བཏེགས་ཏེ་ཁྱེར་ཤོག་
ངས་ཆང་འཐུང་འདོད་དུས་
ང་ལ་ཐུངས་སུ་ཆུགས་
ངས་སྙན་ངག་གི་ནོར་བུ་བསྐྱུག་ཀྱང་སྲིད་
 
ངའི་མ་འོངས་བའི་ཆུང་མ་
ངོ་གདོང་རྫུན་མ་དེ་ཕར་ལ་གཡུགས་
བརྩེ་བ་ངོ་མ་དེ་རུམ་དུ་ཆུགས་
ངའི་ལྷོག་ལྷོག་ལྡིང་བའི་སྙིང་ཆུང་དམར་བོ་
ལག་ཟུང་གི་སྙིམ་པར་བཅུས་ཏེ་
ཁྱེད་ཀྱི་རུམ་དུ་བླུག་ངེས་
 
ངའི་མ་འོངས་བའི་ཆུང་མ་
ངས་ཀྱང་མི་རྐྱང་གི་ཁང་ཆུང་ལ་ག་དར་བརྒྱབ་ནས་
ཡུན་རིང་ཉར་བའི་སྲ་མཁྲེགས་ཀྱི་སྒམ་ཆུང་ལས་
བརྩེ་དུངས་ཀྱི་མེ་དྲོད་ཀྱིས་བཞེངས་པའི་མཛུབ་དཀྲིས་དེ་ཡང་
ཕྱི་ལ་བཏོན་ནས་གཙང་མར་འབྱིད་བཞིན་
རེ་སྒུག་གི་ལོ་ཟླ་གང་མང་དང་མཉམ་དུ་འཚང་བཞིན་ཡོད
                                           ༢༠༠༩ ༡༠ ༡༧ལ་སློབ་གླིང་དུ།

རྩོམ་ཁུངས། ངེད་དྲ་བ།