བུ་མོ ཁྱོད་གང་དུ་འགྲོ
བརྩེ་བའི་འཛུམ་དཀར་སྤྲོ་བཞིན
དུངས་པའི་ལག་བརྡ་གཏོང་བཞིན
ད་དུང རེ་བའི་ཟུར་མིག་འཕེན་བཞིན
བུ་མོ ཁྱོད་གང་དུ་འགྲོ
ས་ཆེན་གྱི་ཤ་དྲོད་ཡོད་ཚད་སད་ཀྱིས་ཁྱེར་བས
བདེན་དོན་དང་རང་དབང་གི་གོམ་ཁ་འཁྱོར་བཞིན
ཕ་ཡུལ་གྱི་རི་གླུ་སྙན་མོ་སེམས་ལ་ཉར་བཞིན
བུ་མོ་ ཁྱོད་གང་དུ་འགྲོ
དུས་ཚིགས་ཀྱི་ཕྲག་པ་ནས་ཉི་འོད་ལ་སེར་ཁ་གས་པ་བཞིན
མ་ཡུམ་གྱི་དབྱངས་རྟ་དྲོན་མོ་རླུང་གིས་བདས་རྗེས
ཁྱོད་འདི་ལྟར འཁྲེང་སེམས་དང་མིག་ཆུ་ཤམ་མེར
གནས་ཡུལ་གང་ཞིག་ལ་གཅེར་རྗེན་དུ་བཏང
བུ་མོ ཁྱོད་དོན་ངོ་མར་གང་དུ་འགྲོ
ངའི་མ་ཡུམ་ལྟ་བུའི མར་ལོ་ལྟ་བུའི
ཁོག་པའི་སྙིང་ཆུང་ལྟ་བུའི་བུ་མོ་ཁྱོད
ས་སྟེང་གི་བརྩེ་དུང་ཡོད་ཚད་ཧར་གྱིས་བསྐྱུར་ནས
མི་ཡུལ་གྱི་སྙན་ངག་ཡོད་ཚད་ཤུལ་ཏུ་བཞག་ནས
བུ་མོ ཁྱོད་ངོ་མ་གང་དུ་འགྲོ
རྩོམ་ཁུངས། ངེད་དྲ་བ།