ཤག་ཤག་ཏུ་ལྷུང་བའི་སྡོང་ལོ་རེ་རེ།
ངའི་སྙིང་ཆུང་དམར་པོ་རེ་ཡིན་གྱུར་ན།
ས་མཐིལ་ལ་འཐོར་ཟིན་པ་ག་ཚོད་འདུག།
ད་དུང་སྡོང་མགོར་འཕོན་ཇི་ཙམ་མཆིས།
ཡོད་ཚད་ལ་འདང་རེ་རྒྱབ་ན།
དབྱར་ལོ་འདིས་རྨི་ལམ་ཅི་ཙམ་སྦྲུམ་ཡོད་པ།
ངས་ད་སོ་མ་གཞི་ནས་རྟོགས་བྱུང།   གཞི་ནས་རྟོགས་བྱུང།
སེར་ཐིག་ཕོག་པའི་སྡོང་ལོ་རེ་རེ།
ངའི་ན་ཟུག་རེ་རེ་ཡིན་གྱུར་ན།
འཛད་ཏུ་མེད་པའི་ཁྲག་ཐིག་ག་ཚོད་འདུག།
འབོད་ཏུ་མེད་པའི་སྨྲེ་སྔགས་སུ་ཡིས་ཚོར།
མདང་ནུབ།    སྒེའུ་ཁུང་ཕྱི་རོལ་དུ།
མཚན་གང་པོར་གཡུག་པའི་རླུང་བུས།
རྨི་ལམ་ག་ཚོད་ལ་ཆག་ཀྲུམ་བཏང་ཡོད་དམ།
ལྷན་འཛོམས་ག་ཚོད་འཐོར་ཞིག་སོང་ཡོད་དམ།
དོ་དགོང།   སྡོང་པོའི་མགོ་སྐྱེས་ས་མཐིལ་ལ་དྲུལ་ཟིན་པས།
སུས་ཀྱང་རྡོག་རོལ་བཏང་ཆོག་ཆོག་རེད།
དོ་དགོང།  སྡོང་པོའི་ན་གཟའ་ཐེད་རལ་ཏུ་གྱུར་ཟིན་པས།
བ་མོ་དང་གྲང་ལྷགས་ཀྱི་བརྙས་བཅོས་བཟོད་པར་དཀའ།
སྟོང་སང་སང་གི་ཡལ་ག།
ཁུ་སིམ་པའི་ས་སྲོད།
ཕམ་ཉེས་ཞིག་གི་ཕ་རོལ་ན།   ཨུ་ཚུགས་ཀྱིས་འགྲེངས་པའི་སྡོང་པོ།
བརྟན་གཡོའི་གར་སྟེགས་ཆེན་པོ་འདིའི་སྟེང།
སླད་མར་རྣམ་ཐར་ཅི་ཞིག་སྐྱོངས་འདོད།
ཆགས་འཇིགས་ཀྱི་སྒྱུ་མའི་ཀློངས་ལས།
ད་དུང་རྨི་ལམ་ག་ཚོད་སྦྲུམ་ཡོད།

རྩོམ་ཁུངས། ངེད་དྲ་བ།