གནམ་ས་འཕྲལ་པའི་དུས་འགྱུར་གྱི་གོད་ཆག་ནི
འོད་གསལ་ལྷ་ཡི་གདུང་རྒྱུད་དེས་གཡུང་དྲུང་རྨུ་ཐག་ལ་ལག་འཇུ་དང་པོ་བྱས་ཤིང་
སྤྲེའི་སྲིན་གྱི་ཤ་ཁྲག་མ་རྨོས་ལོ་ཏོག་གི་ཞིང་སར་ཐོག་མར་བཅགས་ལ་
སྣོད་བཅུད་ཀྱི་བཀོད་པར་ཤེས་རིག་གི་མགུལ་རྒྱན་བཏེགས་པའི་དུས་རབས་འགོ་མ་དེ་རེད

ཉི་མ་ལྟེ་ཐག་ཏུ་བཟུང་ཞིང་གོ་ལ་རིལ་མོར་མ་ངེས་པའི་ལོ་ཟླ་
གངས་རི་ལྕགས་རིར་བཏབས་ཅིང་རྩ་ཐང་སྨྲིག་སྒྲས་བཅགས་པའི་ཉིན་མཚན་དག་ཏུ་
རིགས་རུས་ཆོ་འབྲང་གི་རྒྱལ་མཚན་མཐོན་པོར་བསྒྲེངས་ཤིང་
རྗེ་འབངས་ཆོས་སྲིད་ཀྱི་བ་དན་བླ་རུ་བཏེགས་པའི་མི་རབས་ནི་
དགྲ་འདུལ་གཉེན་སྐྱོང་གི་དམར་འཛིང་ལ་མཁས་ཤིང་དུངས་པའི་དཔའ་རྒོད་དེ་
ཕྱིན་དྲུག་ཐར་བའི་འཇའ་ལུས་ལ་ག་ལེར་གཟིམ་པའི་གྲུབ་ཐོབ་དེ་
ཡང་ན  གཞན་གཅེས་ཀྱི་བསམ་སྦྱོར་སྙིང་ཁར་སྦྱར་བའི་སྐྱབས་མགོན་དེ་ལགས

སྨུག་ནག་པའི་མཐོ་སྒང་འདིར་
སུས་ཀྱང་ཤེས་ལ་གང་གིས་ཀྱང་མ་རྟོགས་པའི་རྣམ་ཤེས་ཚོགས་ཤིག་
སུས་ཀྱང་བསྲུང་ལ་གང་གིས་ཀྱང་གཏོར་ངེས་པའི་ཀེང་རུས་ས་ཕུང་ཞིག་
ཁ་ཆར་དང་བུ་ཡུག་གི་འབབ་ཚུགས་ན་ཡང་ཡང་སུ་ཞིག་ལ་སྒུག་ནས་ཡོད་
དོ་ནུབ་
ངས་ཁེར་རྐྱང་གི་ས་ཕུང་དག་རུམ་ནས་
ཁྱོད་ཀྱི་སྨུག་མདོག་གི་གཏམ་རྒྱུད་དེའི་མགོ་རྔ་བསྒྲིགས་བཞིན་
ཁྱོད་ཀྱི་ཨ་ལན་མེད་པའི་བསམ་གཞིགས་ཁྲོད་
མེ་རི་ལྟར་འཕྱུར་བའི་དཔའ་བོའི་སྙིང་སྟོབས་དྲན་ཞིང་
ཆུ་གཏེར་བཞིན་ཐིམ་པའི་བྱ་བཏང་ཚོའི་མཉམ་བཞག་དེ་དྲན་པས་
དེ་ནི་མཐོ་སྒང་འདིའི་ཉི་ཟླ་བཞིན་
དེ་ནི་མི་རབས་འདིའི་རྐང་ལག་བཞིན་

དོ་ནུབ་
ལྷ་ཀླུ་གཉན་གསུམ་གྱི་མིང་བརྡས་བསྐྱོད་པའི་ཁྱོད་ཀྱི་མཁའ་དབྱིངས་ནས་
ཚེ་སྲོག་གི་གང་བུ་སྦྲུམ་པའི་རི་ཆུ་ནགས་གསུམ་དུ་
ངས་བཙན་པོས་གཏོར་བའི་མེ་ཏོག་རྐང་གཅིག་བཏུས་ཏེ་
དུ་བ་བཞིན་འཕྱུར་བའི་བཙན་པོའི་རྣམ་ཤེས་དེ་འཚོལ་བར་ཕྱིན་

དོ་ནུབ་
ཕ་མ་གཉེན་ཉེ་བོར་བའི་ལོ་རྒྱུས་ཡིག་ཚང་དེ་
གྲགས་འགུལ་ཅི་ཡང་མེད་པའི་གླེགས་བར་ན་
ཁུ་སུམ་མེར་སུ་ཞིག་གི་ཏིང་འཛིན་ལ་བཞུགས་ནས་འདུག
                      2010.5.10 མཚན་མོར་རང་ཤག་ཏུ།

རྩོམ་ཁུངས། ངེད་དྲ་བ།