རྒྱ་མཚོ་གཡོ་བའི་རླབས་ཀྱི་འཕྲེང་།།
ཉི་ཟེར་བྲང་ལ་རྡེག་པ་ནི།།
ངང་དཀར་མྱོས་པའི་རྣམ་འགྱུར་ལ།།
བརྩེ་བའི་སྙན་ངག་འབྲི་བ་བཞིན།།
 
ཤང་ཤང་འབབ་པའི་ཆུ་བོ་མ།།
གནམ་གྱི་སྐས་ལ་འབབ་པ་བཞིན།།
ཟླ་གཟུགས་ཁུར་བའི་ཉམས་དང་བཅས།།
རང་གི་དགའ་མ་འཚོལ་བཞིན་རྒྱུག།
 
དུངས་པའི་རི་མོ་མ་རྙིང་ཞིང་།།
འཕྲད་པའི་ལོ་ཟླ་མ་ཟད་པའི།།
ཏིང་འཛིན་དམིགས་པའི་དཀྱིལ་འཁོར་ན།།
སྤེན་མའི་དབུ་ལ་མེ་ཏོག་ཆགས།།
 
ཞོགས་པའི་སྡོང་རྩེར་ལྷུང་བ་ཡི།།
ཟིལ་ཐིགས་ཡོམ་པའི་མཛེས་སྣང་གིས།།
ཡིད་ཀྱི་སྨུག་སྤྲིན་བསང་བའི་ཚེ།།
ནང་གི་དོ་ཧ་མགུར་དུ་གྱེར།།
 
སེམས་ཀྱི་རི་དྭགས་འཛིན་པ་ལ།།
ཁྱེད་ཀྱི་མགུལ་དུ་གསེར་ཞགས་འཆིང་།།
མིག་ནི་རྒྱ་མཚོར་ལྷུང་བའི་དུས།།
ལག་པའི་ཕྱག་རྒྱ་ཡང་ཡང་བྱས།།
 
འགྱུ་འགག་གནས་སྟོང་བྲལ་བའི་སེམས།།
འོད་ཟེར་རླུང་གི་རྟ་ལ་བཅིབས།།
ཤེས་རབ་ཟངས་ཀྱི་མེ་ལོང་ལས།།
ཁྱེད་ལ་འཚོ་བའི་སྙན་ངག་བྲིས།།
 
ཡིད་ཀྱི་རེ་འབྲས་སྟོང་གི་ཁུར།།
དངུལ་གདུབ་སིལ་སྒྲའི་རོལ་མོར་དཀྲོལ།།
གྱ་གྱུའི་གློག་གི་འཁྱུག་གེར་ལ།།
རིང་ནས་ཞེད་ཅིང་གྱེས་པར་བརྩོན།།
 
རྩེ་བའི་རྒྱུན་གྱི་མུ་ཏི་ཀ།
སོར་མོ་རྩེ་ན་ཡུལ་དུ་ལོག།
ཞེན་པའི་དར་མདུད་འཕར་བའི་གླུ།།
འཆི་བདག་ནག་པོའི་དྲུང་ནས་བླངས།།
 

རྩོམ་ཁུངས། ལྷམ་ཀོག་གི་ཟིན་བྲིས།