ངས་འདི་ལྟར་བསམ།
ང་རང་བྱམས་ལྡན་གྱི་ཕ་མ་ཞིག་ཡིན་ན།
ང་རང་གི་གཅེས་ཕྲུག་ཆུང་ཆུང་དེར།
བུམ་པ་གང་བྱོའི་ཚུལ་གྱིས།
ཤིན་ཏུ་ཕྱུག་པའི་ཕ་སྐད་ཀྱི་དྭངས་མ་དེ།
ནུ་མ་བཞིན་སྦྱིན་ན་སྙམ།
ང་རང་རིགས་ཞེན་གྱི་ཕྱུག་པའི་ཕ་མ་ཞིག་ཡིན་ན།
ང་རང་གི་གཅེས་ཕྲུག་ཡ་ང་པོ་དེར།
ཀྱག་ཀྱོག་མང་བའི་གངས་ཅན་པའི་ལོ་རྒྱུས་དེ།
ཕྱོགས་རིས་ཀྱི་དྲི་མས་མ་བརླན་པར།
གོ་རིམ་ངང་འཆད་ན་འདོད།
ང་རང་ཤེས་ལྡན་གྱི་ཕ་མ་ཞིག་ཡིན་ན།
རང་གི་གཅེས་ཕྲུག་གི་གམ་དུ།
དབྱངས་སོ་བཞིའི་མཛེས་སྡུག་གི་གླུ་དབྱངས་སྙན་མོ་དེ།
སྒྲ་སྦྱོར་གྱི་གོ་རིམ་མ་བཅོལ་བར།
གདངས་དབྱངས་དང་ལྷན་དུ་ཡང་ཡང་གྱེར་ན་སྙམ།
ང་རང་ཡ་རབས་ལ་དགའ་བའི་ཕ་མ་ཞིག་ཡིན་ན།
ང་རང་གི་བུ་ཕྲུག་གི་རྒྱུད་ལ།
ཡ་མེས་ནས་བརྒྱུད་ཡོང་བའི་གངས་ཅན་པའི་སྤྱོད་བཟང་དེ་དག
རིན་བྲལ་གྱི་ནོར་བུ་བཞིན་དུ།
ཆགས་གྲུམ་མེད་པར་ལག་ཏུ་སྦྱིན་ན་སྙམ།
ང་རང་འབྱོར་ལྡན་གྱི་ཕ་མ་ཞིག་ན།
ང་རང་གི་གཅེས་པའི་བུ་ཕྲུག་དེར།
གནའ་དེང་གི་མཁས་དབང་དེ་དག་གི།
མན་ངག་གི་བདུད་རྩི་སྐྱུག་པའི་དཔེ་དེབ་དེ་དག
ཅི་ནས་ཀྱང་། རྔན་པར་སྦྱིན་ན་འདོད།
ང་རང་ཚུལ་ལྡན་གྱི་ཕ་མ་ཞིག་ཡིན་ན།
རང་ཉིད་ཀྱི་བུ་ཕྲུག་ཚོར།
སྤྱོད་བཟང་གི་ཕྱུག་པའི་མི་བུ་ཞིག་གི
སྲེ་ལྷད་མེད་པའི་གོམས་གཤིས་ཡོད་དགུ།
བུ་ཕྲུག་གི་སེམས་ཀྱི་ཟབ་ས་དེར་བཅུག་ན་འདོད།
ཕྱི་ལོ་༢༠༡༠ལོའི་༡༢པའི་ཚེས་༨ཉིན་རང་ཤག་ཏུ་བྲིས།
རྩོམ་ཁུངས། ངེད་དྲ་བ།