ཕ་ཡུལ་ནས་ལྷ་ས་དྲན་པ།
རླུང་གིས་མ་ཁུར་བའི་རྩིག་ལྡེབས་ཀྱི་ཐང་ཀ་རལ་བོ
ཆར་གྱིས་མ་བརླན་པའི་གཅོང་རོང་གི་རྡོ་བརྐོས་གསལ་བོ
སྒྱུ་འཕྲུལ་དང་རོལ་དབྱངས་ཀྱི་འཇིག་རྟེན་འདིའི་ཡང་རྩེ་རུ
མེས་པོ་ཚོས་བློ་གྲོས་དང་བླ་སྲོག་གིས་བརྩམས་གྲུབ་གནངས་བ
ང་དང་འདྲ་བའི་མི་རབས་འདིའི་ཆང་དང་སྙན་ངག་ཁྲོད་ ཀྱི་ལྷ་ས་རེད་ཨང
ལྷ་ས་ནི་ནམ་ཡང་འཇགས་མ་མྱོང་བའི་ས་སྲོད་ཀྱི་གླུ་སྐད་དེ་ཡིན
རྒས་འཁོགས་ཀྱི་ཡུལ་མི་ཚོའི་སེམས་གཏིང་གི་ མཛེས་བ་དེ་ཡིན
ཨ་མྱེས་ཀྱིས་ཕ་ཡུལ་གྱི་རྐང་ལམ་རིང་མོ་དེའི་ཕར་སྣེ་ན་ལྷ་ས་ཡོད་ཟེར
ལྷ་ས་ནི་ཨར་འདམ་དང་རྣོ་ལྕགས་ཀྱིས་གྲུབ་པའི་འཇིག་རྟེན་ཞིག་ཡིན་ཟེར
ལོ་ཟླའི་ཁྲག་རྒྱུན་གྱིས་དེད་པའི་དུས་རབས་ཀྱི་འགྲུལ་བཞུད་ཀྱིས
ང་ཡི་ལྷ་སའི་ལྷིང་འཇགས་དང་རྨི་ལམ་གྱི་བདེ་བ་དཀྲོགས་སོང
ལུས་པོ་ཕ་ཡུལ་ན་ཡོད་ཀྱང་སེམས་པ་ལྷ་ས་རུ་ཤོར་བའི་བདག་གིས
ལྷ་ས་གྲོང་ཁྱེར་གྱི་ཟླ ་འོད་དང་མཚན་མོ་ཁོ་ན་སེམས་ལ་སྒོམ་གྱིན
ད་དུང་པོ་ཏ་ལའི་རྒྱ་ཕིབས་དང་ཇོ་ཁང་གི་གསེར་ཏོག་མིག་ལ་འཆར་གྱིན
ཕ་ཡུལ་ན་གླུ་གཞས་ལྟ་བུའི་སྙན་ངག་ཅིག་གྱེར་བཞིན་ཡོད
༢༠༡༡ ༡ ༡༤ཉིན་གྱི་མཚན་མོར་རྩེ་ཁོག་ཏུ།
རྩོམ་ཁུངས། ངེད་དྲ་བ།