ཕོར་བ།
འདི་ནི་ཆང་ཕོར་ཞིག་ཡིན་ཀྱང་རུང་ལ། ཇ་ཕོར་ཞིག་ཡིན་ཀྱང་བླ་སྟེ།
གང་ལྟར་ཕོར་བ་སིང་དི་རེ་ཆག་པས།
རྟེན་འབྲེལ་གྱི་མགོ་མ་འདི་ནས་ལོག་སོང་།
ཕོར་བ་ཆག་སོང་། ཕོར་བ་གྲུབ་བྱེད་ཀྱི་རྡུལ་ཕྲ་རབ་མང་པོ།
སྔོན་ཏག་ཏག་ལ་ད་དུང་ཕན་ཚུན་རྟེན་དང་འབྲེལ་བའི་ཚུལ་དུ་གཞི་གཅིག་ཏུ་གྲུབ་ཀྱང་།
ད་ནི་ཆག་རོ་མང་པོ་རང་སར་ཐོར་ཏེ་གཡས་ལོག་གཡོན་ཉལ།
ཆག་རོ་དེ་དག་གི་སྟེང་དུ་ཕོ་གསར་ཞིག་གམ། མོ་གསར་ཞིག་གི་མཛུབ་རིས་བབས་འདུག
ཡང་ན་བླ་མ་ཞིག་གི དཔོན་པོ་ཞིག་གི རྐུན་མ་ཞིག་གི
གས་ཆག་ཏུ་སོང་བའི་མཛུབ་རིས་བབས་འདུག
བལྟས་ན་ཕོར་བ་ཙམ་ཡིན་ཀྱང་།
ཕོར་བ་ནི་རྫས་མང་པོ་ལྷན་དུ་འདུས་ནས་གྲུབ་པ་ཞིག་ཡིན། ཕོར་བ་ནི་སྣོད་དུ་རུང་བ་ཞིག་ཡིན།
ཕོར་བའི་ནང་དུ་ཆང་འཐུང་ཆོག་ལ། ཇ་ཡང་ཅི་འདོད་དུ་བཞེས་ཆོག
དེ་བས་ཀྱང་། མིག་དབང་འཕྲོག་ཅིང་ཡིད་དབང་འགུག་པ་ནི།
ཕོར་བའི་ཕྱི་ངོས་ཀྱི་རི་མོ་དེ་དག་སྟེ།
དེ་ནི་གནའ་མི་བློ་གྲོས་ཅན་ཞིག་གི་ཕྱག་རྒྱུན་ཡིན་ནམ།
ཅི་འདྲའི་མིག་ལ་སྡུག་པ་ལ་ཨང་།
ཕོར་བ་སིང་དི་རེ་ཆག་པའི་སྐད་ཅིག་མ་དེར།
ཕོར་བས་ལོ་རྒྱུས་ཀྱི་མཛེས་སྡུག་ལ་བདེ་མོ་བཞག་ཚར་བས།
ད་ནས་བཟུང་རྒྱུན་འཛིན་གང་ཞིག་རབས་ཆད་དུ་གྱུར་ཅིང།
གསར་གཏོད་གང་ཞིག་དེབ་ཐེར་གྱི་གསེང་དུ་དུར་སྦས་བྱས།
ཁ་སང་གླུ་སྒྲ་ཡོད་ལ། ངུ་སྒྲ་ཡང་ཡོད།
ཁ་སང་ཕོར་བ་དེར་སུས་ཀྱང་གཙིགས་ཆེན་བྱེད་ཅིང་། མཆུ་སྒྲོས་ཡང་ཡང་སྦྱོར།
ཡིན་ཀྱང་། ད་ལྟ་ཕོར་བའི་རང་ཚུགས་ཡོངས་སུ་ཤོར་སོང་།ད་ལྟ་ཕོར་བ་དེ་ཕོར་བ་མིན།
ཕོར་ཆག་དེ་གད་སྙིགས་ཕོན་པོའི་གསེང་དུ་རྐང་ཆག་ལག་རྡུམ་ངང་འགྱེལ་ཅིང།
བདག་པོའི་ཅི་མི་སྙམ་པའི་གདོང་ལ་ཅེར་ནས། ཁ་སང་གི་ཚ་དྲོད་དྲན།
ངས་མཐོང་བའི་ཕོར་བ་འདི། ཆུ་ལས་བལྟམས་པ་ཡིན།
འོན་ཀྱང་། བརླན་གཤེར་ཡལ་སོང་།
ངས་མཐོང་བའི་ཕོར་བ་འདི། ས་ལས་འཁྲུངས་པ་ཡིན།
འོན་ཀྱང་། སྲ་མཁྲེགས་བོར་སོང་།
ཕོར་ཆག་འདི། རྨ་ཁ་རིགས་ཤིག་ལ་ཅིས་ཀྱང་གཏོགས་སྲིད།
ཡིན་ཀྱང་ཟུངས་ཁྲག་གི་བཞུར་རྒྱུན་གདོད་ནས་དབེན།
དེ་ལྟ་ནའང་། ཡོད་པ་ནས་ཡོད་པའི་བར་དང་། མེད་པ་ནས་མེད་པའི་བར་དུ།
ཕོར་བས་རང་འཁྲིར་བབས་པའི་འོས་འགན་རྫོགས་སོང་།
རེག་ཏུ་རུང་བ། འཛིན་དུ་རུང་བ། སྣོད་དུ་རུང་བ། ཕོར་བ་ནི་དེ་ཙམ་རེད།
དེས་ན་ཕོར་བ་ཆག་སོང་བ་དེ་མི་ཡུལ་དུ་གད་སྙིགས་ཇེ་མང་དུ་སོང་བ་ཙམ་ཡིན་ནམ།
ཕོར་བ་ཆག་སོང་། སིང་དེ་རེ་ཆག་སོང་།
ཆག་རོ་མང་པོའི་གསེང་དུ་ཕངས་སེམས་རླུང་ལྟར་ལྡང་ཡང་།
ལེ་བདའ་དང་འཁང་ར་རྡུལ་ལྟར་བབས་ཀྱང་།
ཕོར་བ་ཆག་སོང་བའི་དོན་དངོས་ལ་སུ་ཡང་གཡོལ་ཐབས་བྲལ།
འདི་ནི་མངོན་སུམ་སྟེ། ཡང་གཅིག་བཤད་ན་ཕོར་བ་ཆག་པ་ཙམ་ལ་དེ་འདྲའི་དོ་སྣང་བྱེད་དོན་མེད།
ལྷག་ཏུ་སེམས་ཁྲལ་བགྱི་དོན་ག་ལ་ཡོད།
མ་རེད་དམ། མ་རེད་དམ།
མ་གཞི། མཛེས་སྡུག་ལྡན་པ་དེ་དག
གས་སླ་བ། ཆག་སླ་བ་ཏག་ཏག་རེད།
2010/6/10/ཉིན་གྱི་ཞོགས་པར།
རྩོམ་ཁུངས། ཁྲི་སེམས་དཔའི་པོད་ཁུག