མཚན་མོ་འདིས་ང་བཟའ་བཞིན་ཡོད།
ངས་མཚན་མོ་གླེང་བཞིན་ཡོད།
ལྟོས་དང།  འཇིགས་རུང་གི་མཚན་མོ་ཞིག།
་་་་་་་་་་་་་་་་་་་་་་་་་་་་་་་
ཁ་སང་ཁྲོམ་ནས་འཐུག་པའི་བུ་མོ་དེ།
ཚ་རུའི་སྟོད་ལྭ་ཞིག་བསྣབས་ཡོད་ལ།
ཞལ་ཁེབས་ཤིག་བཀྱོན་འདུག།
ཅི་འདྲའི་ཡིད་དུ་འོངས་ཤིང་ཡ་མ་བཟུང་གི་མཚན་མོ་ཞིག།
བྱ་རྒྱལ་འུག་པ་དང་རལ་གྲི་ཚོ་གང་དུ་བཞུད་སོང།
མཚན་མོ་འདིར།  ང་གཅིག་པུ་ཡིན་པ་འདྲ།
ང་གཅིག་པུ་ཡིན་པ་འདྲ།
ངས་ཅི་ཞིག་བཙལ་ནས་ཡུན་རིང་འགོར་སོང།
ད་ལྟ་ཤེས་གསལ། མཚན་མོ་ནི་མཚན་མོའི་མཆེ་བའི་རྩེ་ལ་བསྐྱོན་འདུག།
ཅི་འདྲའི་མཛེས་སྡུག་ལྡན་པའི་མཆེ་བ་ཞིག།
ངས་ང་རང་བརྙེད་པ་ཧ་ཅང་འཕྱིས་སོང་བ་མིན་ནམ།
ཡེ་ཤེས་མཚོ་མོ་ལགས།
ངས་ཁྱེད་རང་རྒྱུན་དུ་ནས་གླེང་བཞིན་ཡོད།
མཚན་མོ་འདིས་མཚན་མོ་གླེང་བཞིན་ཡོད།
འོད་གསལ་ཡང་མིན་ལ་ནམ་མཁའ་ཡང་མིན།
མི་མགོ་སྐམ་པོ་ལྟ་བུའི་མཚན་མོ་ཞིག།
དོ་དགོང་གི་མཚན་མོ།
མཚན་མོ་དང་ང།
ད་དུང་ཁྲག།  
ཁྲག།    
ཁྲག།  
               
                        ༢༠༡༠ལོའི་ཟླ་༡༢པའི་ཚེས་༡༦གི་ཐོ་རངས་ཆུ་ཚོད་༤པར།
                                    གླིང་སྐོར་ལམ་ལས།