ངའི་རང་གི་རྣ་བ་དང་མིག་ཟུང་ལ་ཡང་ཡིད་ཆེས་མི་ཐུབ་པའི་ཉིན་གུང་འདིར
ངའི་རང་གི་ཚོར་བ་དང་ན་ཟུག་ལ་ཡང་ཁ་ལོ་བསྒྱུར་མི་ཐུབ་པའི་ཉིན་མོ་འདིར
ཡུན་རིང་ཡུན་རིང་ལ་ཐུག་ཐབས་དབེན་པའི་བྱམས་ལྡན་གྱི་སློབ་དཔོན་དག་དྲན་བྱུང
ས་སྲོས་ཀྱི་གྲིབ་ངོགས་ནས་རིགས་རྒྱུད་ཅིག་གི་བདེ་སྡུག་གླུ་རུ་གྱེར་བའི་རྒྱང་རིང་གི་ཁྱོད་ཚོ་དྲན་བྱུང
ས་ཆེན་གྱི་མིག་ཆུས་འཁུར་བཞིན་པའི་མིའི་རིགས་ཀྱི་ཚེ་སྲོག་ཁྲི་ཕྲག
འདར་སྐྱོམས་ཀྱི་ཞེ་སྡང་གིས་གཞོམ་བཞིན་པའི་རིགས་དྲུག་གི་ཆོ་ངེའི་སྐད་དོད
ཞི་བདེ་དང་རང་དབང་གི་ཕ་མཐའ་ནས་ཤུགས་ཀྱིས་བསྐྱོད་འོངས

ཉི་ཧོང་བ  ས་ཆེན་གྱི་བརྡབ་གསིག་ལ་འཇིགས་སྐྲག་མ་སྐྱེས
མེས་པོའི་སྐྱེས་ཆེན་དག་གིས་ནམ་ཡང་ཁྱོད་ཚོར་ཞུམ་མི་སྲིད་པའི་དཔའ་ངར་སྦྱིན་པ་མིན་ནམ
རལ་གྲིས་རྩེ་མོ་ནས་ཤར་ཕྱོགས་པ་དབང་འདུལ་བྱེད་དུས་སུ་ཞིག་གི་སྤོབས་པ་ཉམས་སམ
སྒྱོགས་མདེལ་གྱི་རྡུལ་འཚུབ་ཁྲོད་མ་བུ་གྲངས་མེད་ཀྱི་སྐད་འབོད་རྒྱ་མཚོར་འཐིམས་དུས
ཁུར་མོང་གི་སྙིང་སྟོབས་ཁུར་བའི་རིགས་རྒྱུད་འདི་སྔར་བཞིན་ས་ཆེན་གྱི་ཡང་རྩེར་སྐྱོད་མྱོང

ས་ཆེན་ལ་བརྡབ་གསིག་ཤོར་ན་ཤོར་དུ་ཆུགས
མཚོ་ཆེན་གྱི་རྦ་རླབས་འཁྲུག་ན་འཁྲུག་དུ་ཆུགས
ང་ཚོས་ནམ་ཡང་ཉམས་མི་སྲིད་པའི་སེམས་ཤུགས་ཀྱི་སྙིང་སྟོབས་མཁའ་རུ་ཕྱར་ཏེ
ང་ཚོས་ནམ་ཡང་རྒྱལ་ཁའི་རོལ་དབྱངས་ཀྱི་མེ་དཔུང་ཤུགས་ཀྱིས་སྦར་ཏེ
ཉི་ཧོང་བའི་བླ་ན་མེད་པའི་ཚུགས་ཐུབ་ཀྱི་ཀུན་སྤྱོད་ལ་ཡི་རངས་བྱེད་བཞིན
ཉི་ཧོང་བའི་ཞུམ་པ་མེད་པའི་མཐའ་མཇུག་གི་རྒྱལ་ཁ་ལ་དཔའ་དར་འཐེན་བཞིན
ལོ་རྒྱུས་དང་ངག་རྒྱུན   དཔའ་ངར་དང་སྙིང་སྟོབས
སུ་ཡིས་ཀྱང་བརྗེད་ཐབས་མེད་པའི་ཉི་མའི་འབྱུང་གནས་འདི
དུས་གཏན་དུ་འཇིག་རྟེན་གྱི་ཡང་རྩེར་སྙེག་པའི་སྨོན་འདུན་གྱི་ལག་ཟུང་འདེགས
དུས་གཏན་དུ་ཉམས་པ་མེད་པའི་དཔའ་སྟོབས་ཀྱི་ལང་ཚོ་རིས་སུ་འབེབབ

ལང་ཚོ་ལ་གོད་རྒུད་ཙམ་ཤོར་བའི་ངའི་ཉི་ཧོང་བ
ཁྱོད་ཚོས་ནམ་ཡང་དྲང་བདེན་གྱི་མིག་ཟུང་ལས་ཡོ་གཟུར་གྱི་མདའ་མོ་མ་འཕངས་ལ
ཁྱོད་ཚོས་གཞན་གྱི་བྲང་གཞུང་ནས་གཏེར་ཁ་སྔོག་པའི་ཆོམ་རྐུན་གྱི་རང་གཟུགས་ཡང་བསྟན་མེད
ཁྱོད་ཚོས་རང་ལ་དབང་ཆོག་ཆོག་གི་ཉེན་ཁའི་དཔའ་ཀློང་ཉུལ་དུས
སྤོབས་པ་དང་སྙིང་སྟོབས་ཡོད་ཚད་སྦྱོང་བརྡར་ལས་ཐོན
མིག་ཆུ་དང་གདུང་སྡུག་ལ་ཁ་ཐག་རིང་བར་ཀྱིས 
ཉི་ཧོང་བ
ཞེས་སྤྱི་ལོ་༢༠༡༡ལོའི་ཟླ་༣པའི་ཚེས་༡༢སྟེང་ཉི་ཧོང་དུ་འགྲོ་བའི་གྲོགས་མོ་ཞིག་ལ་མྱ་ངན་གྱི་སྐད་དོད་དུ་བསྐུར་ནས་བྲིས་བ་ཡིན།