རྨི་ལམ་གྱི་བརྩེ་བ།
བརྩེ་བའི་མངའ་ཐང་ལ་རྫོགས་མཐའ་མེད་པས།།
གནམ་སའི་བར་མཚམས་ལ་ཤོང་ཐབས་མི་འདུག།
དབུགས་ཀྱི་སྐུད་རྒྱུན་འདི་མ་ལྷོད་བར་དུ།།
སྒྱུ་མའི་བསླུ་བྲིད་ཀྱི་འགྲན་དུ་ལང་དགོས།།
འཁོར་བའི་ཕུན་ཚོགས་ཀྱི་མངལ་སྒོ་རེ་ན།།
དགའ་སྡུག་འདྲེས་མ་ཡི་རླུང་བུ་ཤུར་ཤུར།།
ཞེན་ཆགས་རི་མོ་ཡི་གས་སྲུབ་བར་ན།།
འདོད་མདུན་མིག་ཟུང་འདི་ཉམ་རེ་ཆུང་ངོ།།
ལོ་ཟླའི་དྲོད་འཁྱག་ལ་བརྟག་ཐབས་མེད་པས།།
ཕུགས་མདུན་གོམ་འགྲོས་ལ་མགོ་ཡོམ་འཁོར་འགྲོ།
ལང་ཚོའི་མེ་ཏོག་གི་མཛེས་སྡུག་བསམ་ན།།
ན་ཟུག་དུག་ཚེར་གྱིས་མགྲིན་པ་བརྣང་འགྲོ།
རིགས་འཕྲུལ་དངོས་ཟོག་གི་དཔལ་ཡོན་རྒྱས་པས།།
གདོད་མའི་གསེར་བྲིས་ཀྱི་དམ་བཅའ་བརྟན་པོ།།
སྦྲ་ཁྱིམ་སྨུག་པོ་ལྟར་རྒྱང་ལ་སྤྱུགས་དུས།།
དྭངས་གཤིས་སེམས་གཅོང་འདི་སྙིང་རེ་རྗེའོ།།
མེས་པོའི་གླགས་བུམ་གྱི་མེ་ལོང་ངོས་སུ།།
དུས་ཀྱི་མྱུར་ལམ་ཁྲོད་ཕྱིར་མིག་འཕངས་ཚེ།།
ཨ་མའི་ལྷག་བསམ་གྱི་ནུ་རིན་དཀར་པོ།།
འདས་སོང་ལོ་རྒྱུས་ཀྱི་རིས་སུ་འཐིམས་འདུག།
ཅི་བསམ་ལྷུན་འགྲུབ་ཀྱི་བསྐལ་བའི་ལས་ཤིག།
བདེན་པའི་རང་གཅུན་གྱིས་བཏུལ་ཐབས་མེད་ཀྱང་།།
རྒྱུ་འབྲས་གོ་ལྡོག་གི་གཡུལ་ས་འདི་ནས།།
རྣམ་དཀར་སེམས་བྱུང་ལ་བདག་པོ་ལོས་རྒྱག།
2011.3.6
རྩོམ་ཁུངས། ངེད་དྲ་བ།