ལུག་བལ་ལས་འཇམ་པའི་ལྷོ་བཞུད་ཀྱི་སྤྲིན་དཀར་དང
མཚོ་མཐར་ཉུལ་བའི་ཁྲུང་ཁྲུང་སྐེ་རིང་ཉིས་འགྲོས་དེས་ཀྱང
ཡུན་རིང་སྡོམ་གཅུན་གྱིས་མནར་བའི་གྲྭ་རྐྱང་གི་སེམས་པར
ཅུང་ཟད་དཀྱེལ་ཡངས་ཀྱི་འཇིག་རྟེན་ཞིག་འཆར་དུ་བཅུག་ལ

ཤཱཀྱ་ཐུབ་ཀྱི་སྡོམ་ཚིག་རྐང་བཞི་མ་ཞིག་ལ་སེམས་པ་གླན་ནས
ཉི་འོད་ཀྱི་བཙའ་ཆགས་པའི་འདུ་ཁང་གི་རྒྱ་ཕིབས་ལ་ཅེར་བཞིན
རས་གཟན་གྱི་དྲོད་ཁོལ་རྐྱང་རྐྱང་གིས་རྡུལ་རླུང་གཡོར་ཏེ
ནམ་ཡང་དཀོན་མཆོག་གི་ཕྲིན་ལས་ལ་ཁ་གསབ་རྒྱག་རྩིས་ཡོད

གསོལ་འདེབས་དང་ཉལ་ཕྱག་གི་འོད་ཟེར་ངོ་གདོང་དུ་འཁྱིལ་ལ
མུན་ནག་གི་ཡོལ་བ་སྲབ་མོར་ཡུན་རིང་སྦར་ཤད་བྱས་མཐར
དཀའ་ཆེན་གྲངས་མེད་འགྲིམས་པའི་སེམས་དཔའི་སེ་གོལ་རེ་རེས
ཆེ་ཆུང་རན་པའི་དག་ཞིང་གི་སྒོ་འཕར་ཕྱེ་བར་སྒུག་ཡོད
                                      ༢༠༡༡  ༢   ༤    རེབ་གོང་ནས།།