ཆུ་ལེན་བུ་མོ།
མེ་ཏོག་ཡལ་འདབ་ལས་ཞོགས་པའི་ཉི་ཟེར་འཛུམས་དུས།།
བརྩེ་དུང་མར་ཁུ་འཁྱིལ་བའི་གཞོན་ནུ་མ་དེ་ཚོས།།
སེམས་ཀྱི་དཀའ་སྡུག་ཡོད་ཚད་རླུང་བུ་ལ་བསྐུར་གྱིན།།
འབྲོག་གླུ་སྙན་མོའི་དབྱངས་རྟ་མཁའ་དབྱིངས་ལ་འཐེན་འདུག།
དཔྱིད་ཀྱི་བསིལ་རླུང་ཡང་མོའི་རེག་བྱ་དེ་འཇམ་པོས།།
སྨན་ཤར་བུ་མོའི་གདོང་དཀྲིས་ལྷབ་ལྷུབ་རེ་བསྐྱོད་དུས།།
བཅུ་དྲུག་ལང་ཚོ་རྒྱས་པའི་གཞོན་ནུ་མའི་བཞིན་རས།།
ཉི་འོད་བཀྲག་མདངས་ཁྲོད་ན་བྱུ་རུ་དང་འདྲ་འོ།།
ལྷུང་ལྷུང་དལ་གྱིས་འབབ་པའི་ཆུ་མིག་དེ་བསིལ་མ།།
དར་དཀར་ཁ་བཏགས་ཅི་བཞིན་སྤང་ལྗོངས་ལ་རྒྱུ་ཞིང་།།
འགྲོ་དྲུག་སྐོམ་གདུང་སེལ་བའི་བདུད་རྩི་དེ་དྭངས་མ།།
ཆུ་ལེན་བུ་མོའི་ཟོ་ཁར་ལྟེམ་ལྟེམ་ངང་འཕྱོ་འདུག།
-------2011．3．5ཉིན་ཟི་ལིང་ནས།
རྩོམ་ཁུངས། ངེད་དྲ་བ།