རིག་པ་རྣལ་དུ་ཕབས་ཏེ་ཀྲོག་ཀྲོག་གིས་ཉན་ན།
འཇིག་རྟེན་འདིར་སྐྱེ་བ་སྦྲུལ་ཤུན་ལྟར་བརྗེས་ཀྱང་།
ནམ་ཡང་ཚོང་རྫས་རྫུན་མའི་ཁ་དོག་ལས།
མི་ཡུལ་ནས་ཚིག་འབྲུ་རློན་ཤ་ཅན་གྱི་བཀྲག་མདངས་མ་རྙེད།

སྐད་ཅིག་མར་འགད་རྫས་ལྟར་ཐོར་གས་སོང་ཡང་།
སླར་ཡང་ཤ་ཁྲག་ཐོར་ཤུལ་དེར་མིག་ཟུང་དར་ཅིག་ཕབས་ན།
བྱ་ཁྱུས་མུར་རྗེས་ཀྱི་སྲ་མཁྲེགས་རུས་པ་དག
ནམ་ཞིག་ཀེང་རུས་ཤིག་གི་ལྷུ་ལག་ལ་ཁ་གསབ་རྒྱག་རྩིས་ཡོད།

གསེར་མདོག་བཀྲ་བའི་རྟ་མཆོག་གི་རྨིག་སྒྲ་ཐོས་པ་ནས།
རླུང་ལ་བསྐུར་བའི་མཚེར་སྐད་རི་ལུང་འཁོར་བ་ནས།
ཁ་བ་ཞི་ཤུལ་ལྟ་བུའི་ཡུམ་ཆེན་གྱི་རྐང་རྗེས་འཚོལ་ཆེད།
འབྲོང་ཁྱུ་ཞིག་གི་ངུར་སྒྲ་ཉན་གྱིན་འགྲོ་མ་ཐུབ།
                     ༢༠༡༡ཟླ༣ཚེས༤ཉིན་རེབ་གོང་ནས།།