གཉིད་དུ་ཡུར་རྗེས་མནལ་ལམ་གྱི་དག་ཞིང་དེར།
སེམས་ལྷོད་ལ་བཞག་སྟེ་གཟབ་ནན་གྱིས་བལྟས་ན།
བཀྲག་མདངས་ལྡན་པའི་རས་ཡོལ་གྱིས་གདོང་ཕྱེད་བཏུམས་ལ།
རྨི་ལམ་གྱི་སྒོ་ལྕགས་གཏོར་ནས་རྐུན་མ་བཞིན་ནང་དུ་འཛུལ་མཁན།
སྔས་འབོལ་སྟེང་གི་བསྙེན་ཕྲེང་ལས་མདོ་འཛིན་གྱི་མུ་ཏིག་ཟད་པོ་དེ་རེད།

གྲྭ་རྐྱང་གི་ལུས་པོ་རྔུལ་ཆུས་བརླན་དྲག་པའི་མཚན་གུང་དེར།
དལ་བ་དལ་བུར་གཤོག་པ་མེད་པའི་འཕུར་ལྷབ་རྒྱག་གིན།
སྐར་མའི་གྲང་འདར་དང་འགྲན་ལ།
ཆུ་ཕྲན་འབབ་སྟངས་དང་ཡང་འགྲན་ཏེ   སྐད་གཟེངས་གུམ་སྟེ་བདག་ལ་འབོད་ཀྱིན
ལག་ཟུང་བསྲངས་ཏེ་བདག་ལ་རྙོབ་ཀྱིན།

ད་དུང་ཡང་ནས་ཡང་དུ   ལྷོད་ལ་བབ་པའི་འཇམ་མཉེན་གྱི་ལག་ཟུང་།
དཀར་ལ་དམར་བའི་མཆུ་སྒྲོས་ཀྱི་སྦྲང་རྩི།  
ཟླུམ་ལ་འཁྱིལ་བ་འོ་འཛིན་གྱི་རེག་བྱ་དག
ཡོད་ཚད་ནས་ཡོད་ཚད་གྱ་ནོམ་པར་བསྒྲིགས་ཏེ  ཤིན་ཏུ་བསྒྲིགས་ཏེ  ཧ་ཅང་བསྒྲིགས་ཏེ།
དབེན་པའི་རི་སུལ་གྱི་ཏིང་འཛིན་པ་དག་ངོ་མཚང་འབྲུ་གིན
དཀོན་མཆོག་དང་ལྷ་ཚོགས་ལ་ལེ་བདའ་བྱེད་ཀྱིན། 
                             སྤྱི་ལོ༢༠༡༡ཟླ༣ཚེས༨ཉིན་རིག་འབྱུང་རང་ཤག་ཏུ་བྲིས།།