ངའི་དྲན་ཀློང་ན་མེ་ལྟར་འབར་བ་དེ་ཁྱེད་ཡིན།
ངའི་རྒྱབ་ཕྱོགས་ན་རླུང་བཞིན་ལྡང་བ་དེ་ཁྱེད་ཡིན།
ཁྱེད་དང་བྲལ་རྗེས།
ཉི་མར་དྲོད་ཁོལ་མི་འདུག
སེམས་པ་གྲང་ཤུར་ཤུར།
ཟླ་བར་འོད་སྣང་མི་འདུག
སྣང་ཡུལ་མུན་འཐོམས་འཐོམས།
དཔྱིད་ཀྱི་ཁུ་བྱུག་འགགས་སོང༌།
དབྱར་ཀྱི་མེ་ཏོག་རྙིད་སོང༌།
སྟོན་གྱི་ཁྲུང་ཁྲུང་འཕུར་སོང༌།
དགུན་གྱི་ཁ་བ་སྐམ་སོང༌།
སེམས་པར་སིམས་པའི་བརྩེ་བ།
བརྩེ་བར་འཐིམ་པའི་སེམས་པ།
ཁྱེད་ཉིད་དྲན་པ་མིན་ན།
ཁྱེད་ཉིད་གླེང་བ་ཡིན་སྲིད།
དེ་ལྟར་དབུགས་ཀྱི་འབྱིན་རྔུབ།
སྙིང་གི་འཕར་ལྡིང༌།
མི་ཚེ་འདིའི་གོ་རིམ་ཧྲིལ་བོར།
ཁྱེད་ཉིད་ཁོ་ན་རྐྱང་འཁོར་སིལ་གྲངས་བཞིན་འཁོར་བ།
ངས་ཁྱེད་ལ་བཅངས་པའི་བརྩེ་དུང་ཡིན་ནམ།
ཁྱོས་ང་ལ་བཞག་པའི་ན་ཟུག་ཡིན།

རྩོམ་ཁུངས། ངེད་དྲ་བ།